ސްލޮވޭނިއާއިން އައި ދިވެއްސެއްގެ ގައިން ކޮވިޑް-19 ގެ އަލާމާތްތައް ފެނިގެން ޓެސްޓްކުރަނީ
16 މާރިޗު 2020 | ހޯމަ 19:44ދިވެހި މީހާގެ ގައިން ޝައްކުކުރެވޭ އަލާމާތްތައް ފެނުނީ ޓްރެވަލް ކްލިނިކަށް ދެއްކުމުން
ކޮވިޑް-19 ގެ ޓާސްކްފޯހުގެ ތަރުޖަމާނު މަބްރޫކް އަޒީޒު
ސްލޮވޭނިއާއިން ރާއްޖެ އައި ދިވެއްސެއްގެ ގައިން ކޮރޯނާވައިރަސް، ކޮވިޑް-19ގެ އަލާމާތްތައް ފެނިގެން ފަރުކޮޅުފުށީގައި އެކަހެރިކޮށް ޓެސްޓު ކުރަން ފަށައިފިއެވެ.
ކޮވިޑް-19 ޓާސްކް ފޯހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މަބްރޫކު އަޒީޒު ވިދާޅުވީ، ސްލޮވޭނިއާއިން އައި އެ މީހާގެ ގައިން ބަލީގެ އަލާމާތްތައް ފެނުނިގެން އެކަހެރި ކުރީ މާލެހިޔާ ފުލެޓް ފުރަގަހުގައި ހަދާފައިވާ ޓްރެވަލް ކްލިނިކަށް ދިޔުމުން ކަމަށެވެ.
މަބްރޫކް ވިދާޅުވީ ބައްޔަށް ޝައްކުވި ދިވެހި މީހާ ފަރުކޮޅުފުށީގައި އެކަހެރިކޮށް، ޓެސްޓު ކުރުމުގެ މަސައްކަތް ކުރަމުންދާ ކަމަށެވެ.
މީގެ އިތުރުންވެސް ޓްރެވަލް ކްލިނިކަށް ދައްކާ ފަރާތްތަކުގެ ތެރެއިން ރޯގާގެ އަލާމާތްތައް ހުންނަ ފަރާތްތައް ގޭގައި އައިސޮލޭޓް ވުމަށް ވެސް ކުލިނިކުން އިރުޝާދު ދެމުން ގެންދާނެކަމަށެވެ.
ރާއްޖޭގައި ކޮވިޑް-19 އަށް ޕޮޒިޓިވްވެފައި ތިބީ 13 މީހުންނެވެ. އެއީ ކުރެއްދޫ ރިސޯޓުން ފަސް މީހުންނާއި ކުރަމަތި ރިސޯޓުން ދެ މީހުންނާއި ސޭންޑީސް ބަތަލާ ރިސޯޓުން ދެ މީހުންނާއި އަނަންތަރާ ދިގު ރިސޯޓުން ދެ މީހުން އަދި އައިލެންޑް ސަފާރީ ބޯޓުން ދެ މީހުންނެވެ. އަދި މި ހުރިހާ އެއްމެންނަކީ ވެސް ބިދޭސީންނެވެ.
