ސަފާރީތަކުގެ ކުންޏާއި އާންމު ކުނި އެއްކޮށްގެން ސައިޓަށް ގެނައުމަކީ މަނާ ކަމެއް:ވެމްކޯ
16 މާރިޗު 2020 | ހޯމަ 08:34މުވައްޒަފުންނާއި އާންމު ފަރުދުންގެ ރައްކާތެރިކަމަށް ދަނީ ފިޔަވަޅު އަޅަމުން
ވެމްކޯގެ މާލެ ސައިޓް
ސަފާރީތަކުގެ ކުންޏާއި, އާންމު ކުނި އެއްކޮށްގެން ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)ގެ އެއްވެސް ސައިޓަކަށް ގެނައުމަކީ މަނާކަމެއްކަމެއް ކަމަށް އެކުންފުނިން ބުނެފިއެވެ.
ވެމްކޯއިން ބުނީ ދިވެހިރާއްޖެ އާއި، ދުނިޔޭގެ އެކި ގައުމުތަކުގައި ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން، އެކޯޕަރޭޝަންގެ މުވައްޒަފުންނާއި އާންމު ފަރުދުންގެ ސަލާމަތާއި ރައްކާތެރިކަމަށް ތަފާތު ފިޔަވަޅުތައް އަޅަމުންދާ ކަމަށެވެ.
ވެމްކޯއިން ބުނީ ކަސްޓަމަރުން ވެމްކޯގެ ސައިޓުތަކަށް ގެންނަ ކުނީގެ ތެރޭގައި ސަފާރީ އުޅަނދުފަހަރުން ގެންނަ ކުނި ހިމެނޭކަން ފާހަގަކުރެވިފައިވާ ކަމަށެވެ. އަދި، ސަފާރީތަކުގެ ކުންޏާއި އާންމު ކުނި އެއްކޮށްގެން ގެނައުމާއި، އަމިއްލަ އެއްގަމު އުޅަނދު ގެންގުޅޭ ފަރާތްތަކުން ސަފާރީ އުޅަނދު ފަހަރުގެ ކުނި ވެމްކޯގެ އެއްވެސް ސައިޓަކަށް ގެނައުމަކީ މަނާކަމެއް ކަމަށެވެ.
ސަފާރީ އުޅަނދުފަހަރުން ހުޅުމާލެ ސައިޓަށް ކުނި ގެންނަކަމުގައި ވާނަމަ، ވެމްކޯގެ ސައިޓް ސްޕަވައިޒަރުގެ ނަންބަރު 7871666 އާ ގުޅައި، ކޯޕަރޭޝަނުގެ ލަފަޔާއި އިރުޝާދުގެ ދަށުން ކުނި ގެނައުމަށް ވެމްކޯއިން ވަނީ އިލްތިމާސްކޮށްފައެވެ. އަދި މިގޮތަށް ގެނެވޭ ކުނި ހުންނަންވާނީ ކޮތަޅަށް ލެވި ރަނގަޅަށް ބަންދު ކުރެވިފައި ކަމަށާއި، ބަންދު ނުކޮށް ގެނެވޭ ކުނި ސައިޓުން ބަލައިނުގަންނާނެ ކަމަށް ވެމްކޯއިން ބުނެއެވެ.
މީގެ އިތުރުން ވެމްކޯއިން ބުނީ ސަފާރީ ތަކުން ގެންނަ ކުނި މިނޫންގޮތަކަށް ގެނައުމަކީ، މިވަގުތަށް ރައްކާތެރި ކަމަކަށް ނުފެންނާތީ، އެންމެންގެ ސަލާމަތާއި ރައްކާތެރިކަމަށް މިއުސޫލަށް ކަސްޓަމަރުން އަމަލުކުރުމަށް އެދޭ ކަމަށެވެ. މިގޮތަށް އަމަލުނުކުރާ ފަރާތްތައް ފާހަގަ ކުރެވިއްޖެނަމަ، އެފަރާތްތަކާމެދު ފިޔަވަޅު އެޅޭނެ ކަމަށް ވެސް ވެމްކޯއިން ބުނެއެވެ.
މިދަނޑިވަޅުތަކުގައި ކަސްޓަމަރުންގެ ފަރާތުން ލިބެމުންދާ އެހީތެރިކަމާއި އެއްބާރުލުމަށް ވެމްކޯއިން ފާހަގަކުރެއެވެ.
