ޝަހީދުންގެ ދުވަހުގެ މުނާސަބަތުގައި ބާއްވާ ޖަލްސާ މިއަހަރު ނުބާއްވާގޮތަށް މިނިސްޓަރ އޮފް ހޯމް އެފެއަރޒުން ނިންމައިފިއެވެ.
ހޯމް މިނިސްޓްރީން ބުނީ ކޮވިޑް-19 އިން ރައްކާތެރިވުމަށް ގިނަ މީހުން ބައިވެރިވާ ހަރަކާތްތައް ނުބޭއްވުމަށް ކަމާގުޅުންހުރި މުއައްސަސާތަކުން ބާރުއަޅަމުންދާތީ، ކޮންމެ އަހަރަކު ޝަހީދުންގެ ދުވަހުގެ މުނާސަބަތުގައި ބާއްވާ ޖަލްސާ މިއަހަރު ނުބާއްވާ ގޮތަށް ނިންމާފައިވާ ކަމަށެވެ.
މިނިސްޓްރީގެ އެކްޒެކްޓިވް ކޮމިޓީގެ ލަފާގެ މަތިން މިގޮތަށް ނިންމި ނަމަވެސް ޝަހީދުންގެ ދުވަހުގެ މުނާސަބަތުގައި ކުރިޔަށް ގެންދަން ރާވާފައިވާ ގިނަ މީހުންގެ އެއްވުން ނުހިމެނޭ ހަރަކާތްތައް ކުރިއަށްދާނެ ކަމަށެވެ.
ޝަހީދުންގެ ދުވަހަކީ ކޮންމެ ހިޖުރީ އަހަރެއްގެ ޝައުބާން މަހުގެ އެއްވަނަ ދުވަހެވެ. މި ދުވަސް ހާއްސަ ވަނީ، ޕޯޗުގީޒުންގެ އަތްދަށުން ދިވެހިން ސަލާމަތް ކުރަން ހަނގުރާމަ ކުރެއްވަނިކޮށް ޝަހީދުވި، ޝަހީދު އަލި ރަސްގެފާނަށެވެ.
ރާއްޖެއިން ކޮވިޑް-19އަށް 11 މީހަކު ޕޮޒިޓިވްވެފައިވާއިރު، ރައްކާތެރިކަމުގެ ފިޔަވަޅު އެޅުމަށް އެޗްޕީއޭއިން ދަނީ އިލްތިމާސްކުރަމުންނެވެ. އަދި އާންމުން އެއްވެ އުޅޭ ތަންތަނަށް ނުދިއުމަށް ވެސް ވަނީ އަންގާފައެވެ.
