އަންނަ ލޯކަލް ކަައުންސިލް އިންތިޚާބުގެ ކަންކަން އިތުރަށް ކުރިއަށް ގެންދާނެ ގޮތާ ބެހޭގޮތުން އިލެކްޝަންސް ކޮމިޝަން (އީސީ)ގެ ނިންމުން އާދިއްތަ ދުވަހު އިއުލާން ކުރާނެކަމަށް އެ ކޮމިޝަނުން ބުނެފިއެވެ.

އޭޕްރީލްމަހުގެ 4 ވަނަ ދުވަހު ބާއްވަން ނިންމި ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިޚާބު އޭޕްރީލް މަހުގެ 18 ވަނަ ދުވަހަށް ފަސްކުރަން އިލެކްޝަންސް ކޮމިޝަނުން ވަނީ ނިންމާފައެވެ. އެގޮތަށް ނިންމީ ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖެއިން ވެސް ފެނިފައިވާތީ ރައްކާތެރިކަމުގެ ފިޔަވަޅެއްގެ ގޮތުންނެވެ.

އިލެކްޝަންސް ކޮމިޝަނުގެ ނައިބު ރައީސް އަހުމަދު އަކްރަމް ކުރެއްވި ޓްވީޓެއްގައި ވިދާޅުވީ ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިޚާބު އިތުރަށް ކުރިއަށް ގެންދާނެ ގޮތާ މެދު އެ ކޮމިޝަނުން ގައުމީ ލަފާ ދޭ ކޮމެޓީއާ އެކު މަޝްވަރާކޮށްފައިވާ ކަމަށެވެ. އެކަމާ މެދު އެ ކޮމިޝަނުގެ ނިންމުން އާދިއްތަ ދުވަހު ހާމަ ކުރާނެ ކަމަށް އަކްރަމް ވިދާޅުވި އެވެ. އަދި ހާލަތު ބަދަލުކުރެވޭނީ އެންމެން އެކުގައި މަސައްކަތް ކޮށްގެން ކަމަށް ވެސް އަކްރަމްގެ ޓްވީޓްގައި ވިދާޅުވެފައިވެ އެވެ.

ކައުންސިލް އިންތިޚާބު ފަސްކުރަން އީސީން ނިންމީ އެގޮތަށް ބައެއް ޕާޓީތަކުން ވެސް އެދެމުން ދަނިކޮށެވެ. އަދި އެކަމަށް އާންމުންވެސް ވަނީ ގޮވާލާފައެވެ.

އިންތިޚާބު ލަސްކުރުމާއި ގުޅޭގޮތުން އީސީން ބުނެފައިވަނީ މިހާރު އިންތިޚާބު ބާއްވަން ނިންމާފައިވާ ތާރީޚަކީ ގާނޫނީ ގޮތުން އިންތިޚާބު ފަސް ކުރެވޭނެ އެންމެ ފަހުގެ ތާރީޚު ކަމަށެވެ. އަދި އެއަށް ވުރެ ފަސް ކުރެވޭނީ ކޯޓު އަމުރަކުން ކަމަށާއި އަދި މިހާރު އޮތް މިންވަރަށް ވުރެ ހާލަތު ގޯސްވެއްޖެ ނަމަ އެކަމަށް ހައްލު ހޯދަން ކޯޓަށް ދާނެ ކަމަށް ވެސް އެ ކޮމިޝަނުން ބުނެފައިވެ އެވެ.

ރާއްޖޭގައި މީގެކުރިންވެސް އިންތިޚާބުތައް ފަސްކޮށްފައިވެ އެވެ.