ކޮވިޑް-19: ބަލިން ރައްކާތެރިވުމުގެ ފިޔަވަޅު އެޅުމަށް ކައުންސިލްތަކަށް އެލްޖީއޭއިން އަންގައިފި

ކޮވިޑް-19 އާއި ގުޅިގެން ރާއްޖޭގެ ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައިވާތީ މި ބަލިން ރައްކާތެރިވުމަށް ރަށު އަދި އަތޮޅު ފެންވަރުގައި އެޅެން ހުރި ރައްކާތެރިކަމުގެ ފިޔަވަޅު އެޅުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ކައުންސިލްތަކަށް އަންގައިފިއެވެ.

އެލްޖީއޭއިން ނެރުނު ނޫސްބަޔާނެއްގައި ބުނެފައިވަނީ ކޯވިޑް-19 އަކީ ދުނިޔޭގައި ހަލުވިކަމާއެކު ފެތުރެމުންދާ ބަލި މަޑުކަމެއްކަމަށް ދުނިޔޭގެ ޞިއްހަތު ޖަމްޢިއްޔާއިން ވަނީ ކަނޑައަޅާފައިވާ ކަމަށެވެ. އަދި ރާއްޖެއަށް މި ބަލީގެ ނުރައްކާއޮތް މިންވަރު ވަޒަންކޮށް އާއްމު ޞިއްޙަތު ރައްކާތެރިކުރުމުގެ ޤާނޫނުގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތުގެ ލަފާގެ ދަށުން މިނިސްޓަރ އޮފް ހެލްތު މިހާރު ރާއްޖޭގައި "ޞިއްޙީ ކުއްލި ނުރައްކަލުގެ ހާލަތު" އިޢުލާން ކުރައްވާފައިވާތީ، މިކަމުން ރައްކާތެރިވުމުގެ ގޮތުން ރަށު ފެންވަރުގައި އާއި އަތޮޅު ފެންވަރުގައި އެޅެން ހުރި ރައްކާތެރިކަމުގެ ފިޔަވަޅުތައް، ފަންނީ ބޭފުޅުންގެ މަޝްވަރާގެ މަތިން، އެޅުމަކީ ވަރަށް މުހިއްމުކަމެއް ކަމަށެވެ.

މިގޮތުން، މިބަލިން ރައްކާތެރިވުމަށް ރަށުފެންވަރުގެ ޓާސްކްފޯސް އާއި ގުޅިގެން ބައެއް ކަންކަން ކުރުމަށް އެ އޮތޯރިޓީން ވަނީ ހުރިހާ ކައުންސިލްތަކަކަށް އަންގާފައެވެ.

އެގޮތުން އަންގަފައިވާ އެންގުންތަކަކީ

1. މީހުން އެއްތަނަކަށް އެއްކޮށްގެން ބާއްވާ ބައްދަލުވުންތައް ކޮންމެހެން ބާއްވަން ޖެހިއްޖެ ހާލަތެއްގައި މެނުވީ ނުބޭއްވުން،

2. ރަށްރަށުގައި ހުންނަ އާއްމު ޕާކުތަކާއި ކުޅިވަރު ދަނޑުތަކާއި އާއްމުން އެއްވާ ތަންތަނަށް އެއްވެ އުޅުން ރައްކާތެރި ނޫންކަމަށް ރައްޔަތުންނަށް އިރުޝާދު ދެއްވުން،

3. އެކިކަހަލަ ކުޅިވަރު މުބާރާތް ރަށުގައި އެއްވެސް ފަރާތަކުން ނުހިންގުމަށް ބާރުއެޅުން،

4. ހުންއައިސް ރޯގާޖެހިފައި ތިބޭ މީހުން އާންމުތަންތަނަށް ނުނިކުމެ ގޭގައި ތިބުމަށް އިރުޝާދުދިނުން،

5. ރިސޯޓު ތަކުގައާއި ރަށުން ބޭރުގައި ވަޒީފާ އަދާކުރާ މުވައްޒަފުންގެ ދަފްތަރެއް އެކުލަވާ ބެލެހެއްޓުން

6. އެކި ގޮތްގޮތުން ރަށަށް ޒިޔާރަތްކުރާ ރައްވެހިންނާއި އެފަރާތްތައް ދަތުރުކުރި މަގުތައް ދެނެގަތުން،

7. ރަށުގައި ދުއްވާ ލާންޗު، ދޯނި، ބޯޓު ފަދަ އުޅަނދުތަކުގައި އެކިރަށްރަށަށް ދަތުރުކުރާ މީހުންގެ މަޢުލޫމާތު އެފަދަ އުޅަނދުތައް އޮޕަރޭޓްކުރާ ފަރާތްތަކުން ހޯދައި ބެލެހެއްޓުން،

8. އަތޮޅުގެ އެއްރަށުން އަނެއްރަށަށް ނުގޮސް ނުވާވަރުގެ މުހިންމު ބޭނުމެއް އޮވެގެން މެނުވީ ދަތުރު ނުކުރުމަށް ރަށުގެ ރަށްވެހީންނަށް އިރުޝާދު ދިނުން،

9. މިސްކިތްތަކާއި އާންމުން އެއްވާ ތަންތަން ސާފުކޮށް ސެނިޓައިޒްކޮށް ބެލެހެއްޓުން.

10. މިވަގުތަށް ކޮންމެހެން ކުރުން ލާޒިމްނޫން ދަތުރުތައް ނުކުރުމާއި އެއްރަށުން އަނެއްރަށަށް ކޮންމެހެން ދާންޖެހޭ

އަސާސީ ބޭނުންތައް ފިޔަވައި އެހެނިހެން ބޭނުންތަކު ރަށްރަށަށް މީހުން ނުދިއުމަކީ އަތޮޅުތެރޭގައި މި ބަލި ފެތުރުން ކޮންޓްރޯލްކުރުމަށް ކުރެވޭނެ ވަރަށް މުހިންމު ކަމެއްކަމަށް ވެސް އެލްޖިއޭއިން ވަނީ ފާހަގަކޮށްފައެވެ.