ކ. މާލެ
|
14 މާރޗް 2020 | ހޮނިހިރު 15:28
ޓޮޕް ފައިވް ލީގުގެ މެޗުތަކުގެ ތެރެއިން
ޓޮޕް ފައިވް ލީގުގެ މެޗުތަކުގެ ތެރެއިން
ގެޓީ އިމޭޖަސް
ކޮރޯނާވައިރަސް (ކޮވިޑް-19)
ކޮވިޑް-19: ދުނިޔޭގެ ފުޓްބޯޅަ ހުއްޓުމަކަށް
 
ކްލަބުތަކަށް މާލީ ގޮތުން ބޮޑެތި ގެއްލުންތަކަކާއި ކުރިމަތިލާން ޖެހޭނެ
 
ޔޫރަޕުގެ ބޮޑެތި ހުރިހާ ލީގެއްގެ މެޗުތައް ވަނީ ފަސްކޮށްފައި
 
ޔޫރަޕުގެ ލީގުތަކުގައި ކުޅޭ ބައެއް ކުޅުންތެރިން ވަނީ މި ބައްޔަށް ޕޮޒިޓިވްވެފައި

ޑިސެމްބަރު މަހުގެ ފަހުކޮޅު ދުނިޔެ ސިއްސުވާލީ ޗައިނާގެ ވުހާން ސިޓީން ފެނުނު ކޮރޯނާވައިރަސް (ކޮވިޑް-19) އިންނެވެ. ވަރުގަދަ ޗައިނާއަށް ލޮޅުމެއް އަރުވާލާ ކޮވިޑް-19 ގެ ސަބަބުން އެގައުމުގެ ވުހާން ސިޓީ އެއްކޮށް ހުއްޓުވާލިއެވެ. ކޮންމެއަކަސް ދައްކަން މިއުޅެނީ ކޮވިޑް-19 ގެ ސަބަބުން ޗައިނާއަށްވި ގެއްލުމުގެ ވާހަކައެއް ނޫނެވެ. ދުނިޔޭގެ އެންމެ ގިނަ ބަޔަކު ފޯރިނަގާ ކުޅިވަރު ފުޓުބޯޅައަށް ކޮވިޑް-19 ގެ ސަބަބުން ލިބުނު ގެއްލުންތަކުގެ ވާހަކައެވެ. ފުޓުބޯޅަ މިއިން ދުވަހަކުވެސް ނުވެއްޓޭވަރުގެ އަނދަވަޅަކަށް ވައްޓާލި ވާހަކައެވެ. ކުޑަ ގޮތައްކަށް ބުނާނަމަ މުޅި ފުޓުބޯޅަ ހުއްޓުމަކަށް ގެނުވި ވާހަކައެވެ.

ފުޓުބޯޅައިގެ އެންމެ ނަން މަޝްހޫރު ސަރަހައްދުތަކުގެ ލީގުތައް މިހާރު ވަނީ މެދު ކަނޑާލާފައެވެ. އެގޮތުން ޕްރިމިއަރ ލީގާއި، އިޓާލިއަން ލީގާއި، ސްޕެނިޝް ލީގާއި، ފްރެންޗް ލީގުގެ އިތުރުން ޖަރުމަން ލީގުގެ މެޗުތައް ވަނީ މެދުކަނޑާލާފައެވެ. މީގެއިތުރުން ޔޫރަޕުގެ އެންމެ ބޮޑު ދެ މުބާރާތް ކަމަށްވާ ޔުއެފާ ޗެމްޕިއަންސް ލީގާއި، ޔުއެފާ ޔޫރޮޕާ ލީގު ވަނީ ފަސްކޮށްފައެވެ.

ކްލަބުތަކަށް މާލީ ގޮތުން ބޮޑެތި ގެއްލުންތަކެއް ކުރިމަތިވެފައިވާ ކަމަށް ކްލަބުތަކުން ބުނަމުން އަންނައިރު، ޔޫރަޕުގެ ކްލަބުތަކަކީ ވިޔަފާރި އުސޫލުން ހިންގަމުންދާ ކްލަބުތަކެކެވެ. އެ ކްލަބުތަކުން ފައިސާ ހޯދާ ގޮތްތަކަށް ބަލާއިރު މެޗުބަލަން ދަނޑަށްވަންނަ ސަޕޯޓަރުންނަށް ޓިކެޓު ވިއްކައިގެންނާއި ޖާޒީ ވިއްކުން ހިމެނެއެވެ.

ދުނިޔޭގެ ފުޓުބޯޅައިގެ މައި އިދާރާ ފީފާއިން ނެރުނު ބަޔާނެއްގައި ބުނެފައިވަނީ ކޮވިޑް-19 ގެ ސަބަބުން ކުރިން ބާއްވާން ރާވާފައި ހުރި ބޮޑެތި މުބާރާތްތައް ނުބޭއްވިދާނެ ކަމަށާއި މެޗުތައް ކުޅުމަށްވުރެ ކުޅުންތެރިންގެ ސިއްހަތު މުހިންމު ކަމަށެވެ.

ކޮވިޑް-19 ގެ ސަބަބުން ބައެއް ކްލަބުތަކުގެ ކުޅުންތެރިންނާއި އޮފިޝަލުން މިހާރު ވަނީ ކަރަންޓީނު ކުރެވިފައެވެ. އެގޮތުން ޔުވެންޓަސްގެ ހުރިހާ ކުޅުންތެރިންނާއި އޮފިޝަލުން ކަރަންޓީނު ކުރީ އެ ޓީމުގެ ޑިފެންޑަރ ޑެނިއެލް ރުގާނީ ކޮވިޑް-19 އަށް ޕޮޒިޓިވް ވުމުންނެވެ. ރުގާނީ ޕޮޒިޓިވް ވުމުގެ ކުރިން އެ ކްލަބުގެ 23 އަހަރުން ދަށުގެ ޓީމު ވަނީ ކަރަންޓީނު ކޮށްފައެވެ. އިޓާލިއަން ލީގުން ކޮވިޑް-19 އަށް ޕޮޒިޓިވްވި ދެވަނަ ކުޅުންތެރިޔަކީ ސަމްޕްޑޯރިއާގެ ފޯވާޑް މަނޯލޯ ގަބިއަޑިނީ އެވެ. އުމުރުން 28 އަހަރުގެ ގަބިއަޑިނީ ކޮވިޑް-19 އަށް ޕޮޒިޓިވްވިކަން ސަމްޕްޑޯރިއާއިން ވަނީ ކަށަވަރުކޮށްދީފައެވެ.

އިޓާލިއަން ލީގުގެ އިތުރުން އިނގިރޭސިވިލާތުގެ ޓީމުތައް ވެސް ވަނީ ކޮވިޑް-19 ގެ ބިރާ ކުރިމަތިލާން ޖެހިފައެވެ. އެގޮތުން ލެސްޓާ ސިޓީގެ ތިން ކުޅުންތެރިން ސެލްފް އައިސޮލޭޝަނަށް ވަނީ ގޮސްފައެވެ. ލެސްޓާގެ ކޯޗު ބްރެންޑަން ރޮޖާސް ބުނީ މި ތިން ކުޅުންތެރިން ސެލްފް އައިސޮލޭޝަނަށް ދިޔައީ ކޮވިޑް-19 ގެ އަލާމަތްތައް ފެނުމާއި ގުޅިގެން ކަމަށެވެ. ލެސްޓާގެ ކުޅުންތެރިންގެ އިތުރުން ވާދަވެރި މެންޗެސްޓާ ސިޓީގެ ޑިފެންޑަރު ބެންޖިމިން މެންޑީ ވެސް ވަނީ ސެލްފް އައިސޮލޭޝަނަށް ގޮސްފައެވެ. މެންޑީ ސެލްފް އައިސޮލޭޝަނަށް ދިޔައީ އޭނާގެ އާއިލާ މެމްބަރެއްގެ ފަރާތުން ކޮވިޑް-19 ގެ އަލާމަތްތައް ފެނުމާއި ގުޅިގެންނެވެ.

އިނގިރޭސި މީޑިއާތައް ބުރާސްފަތި ދުވަހުގެރޭ ސިއްސުވާލީ އާސެނަލްގެ ކޯޗު މިކޭލް އާޓެޓާ ކޮވިޑް-19 އަށް ޕޮޒިޓިވްވި ހަބަރާއިއެކުގައެވެ. އާޓެޓާ ކޮވިޑް-19 އަށް ޕޮޒިޓިވްވުމާއިއެކު އާސެނަލް ކުޅުންތެރިންނާއި އޮފިޝަލުން މިހާރު ވަނީ ކަރަންޓީނުކޮށްފައެވެ. އާޓެޓާގެ އިތުރުން އިނގިރޭސި ކްލަބު ޗެލްސީގެ ފޯވާޑް ކަލުމް ހަޑްސަން-އޮޑޯއި ވެސް ވަނީ ކޮވިޑް-19 އަށް ޕޮޒިޓިވްވެފައެވެ. މި ކަން ޗެލްސީއިން ވަނީ ކަށަވަރުކޮށްދީފައެވެ.

ކޮވިޑް-19 ޖެހުނު މީހުންގެ އަދަދު 145،673 ކަށް އަރައިފައިވާއިރު މި ބަލީގައި 5436 މީހުން ވަނީ މަރުވެފައެވެ. ދުނިޔޭގެ ގިނަ ގައުމުތަކުން ކޮރޯނާވައިރަސް (ކޮވިޑް-19) މިހާރު ފެނިފައިވާއިރު، ގިނަ ގައުމުތަކުން އަންނަނީ ސަލާމަތީ ފިޔަވަޅުތައް ވަރުގަދަ ކުރަމުންނެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
0%
ކޮމެންޓް