ކޮވިޑް-19: މީހުން އެއްވާ ތަންތަނަށް ނުދިއުމަށް ނައިބް ރައީސް ގޮވާލައްވައިފި
14 މާރިޗު 2020 | ހޮނިހިރު 05:42އާއްމު ސާފުތާހިރުކަމަށް އިސްކަންދޭންޖެހޭ
ނައިބް ރައީސް ފައިސަލް ނަސީމް
ކޮވިޑް-19 އިން ރައްކާތެރިވުމަށް މީހުން އެއްވާ ތަންތަނަށް ނުދިއުމަށް ނައިބު ރައީސް ފައިސަލް ނަސީމް ގޮވާލައްވައިފިއެވެ.
ކޮވިޑް-19 އިން ރައްކާތެރިވުމަށް ސަރުކާރުން ގިނަ މަސައްކަތްތަކެއްކުރާކަން ފާހަގަކުރައްވައި ނައިބު ރައީސް ފައިސަލް ވިދާޅުވީ ކޮވިޑް-19 އިން ރައްކާތެރިވެ ތިބުމަށް ޢާންމު ސާފުތާހިރުކަމަށް އިސްކަންދޭންޖެހޭ ކަމަށެވެ.
އެގޮތުން ގިނަގިނައިން އަތްދޮވެ، މީހުން އެއްވާ ތަންތަނަށް ނުދިއުމަށް އެމަނިކުފާނު އިލްތިމާސްކުރެއްވިއެވެ.
ނައިބު ރައީސް ފައިސަލް ވިދާޅުވީ މިދަނޑިވަޅުގައި ކަމާ ބެހޭ އިދާރާތަކުންދޭ އިރުޝާދުތައް އަޑުއަހާ އެއަށް ޢަމަލުކުރަންޖެހޭ ކަމަށެވެ.
މީހުން އެއްވެ އުޅޭ ތަންތަނަށް ނުދިއުމަށް ނައިބު ރައީސް ގޮވާލައްވާފައިވާއިރު، ދިވެހި ސަރުކާރުން މަސައްކަތް ކުރަމުން ދަނީ އިތުރަށް މި ބަލި ފެތުރުނަނުދީ ރައްކާތެރިކުރެވޭނެ ދުވަހެއް ހޯދުމަށްޓަކައި ކަމަށް ސަރުކާރުން އެކުލަވާލާފައިވާ ކޮވިޑް-19 ގެ ޓާސްކްފޯސްގެ ތަރުޖަމާނު މަބްރޫކް އަޒީޒް ވަނީ ވިދާޅުވެފައެވެ. ކޮންމެ ބޭފުޅަކުވެސް ފަރުދީ ޒިންމާ އަދާ ކޮށް ތެދުވެރިވުމަށް ގޮވާލެއްވިއެވެ.
މިހާތަނަށް ރާއްޖެއިން ކޮވިޑް-19 އަށް 09 މީހަކު ވަނީ ޕޮޒިޓިވްވެފައެވެ. މިއެންމެންނަކީ ބިދޭސީންނެވެ.
