ގަނޫނާޚިލާފަށް އެއްވާ ނަމަ ފިޔަވަޅު އަޅައި، މައްސަލަތައް ޝަރީއަތަށް ފޮނުވާނަން: ހޯމް މިނިސްޓްރީ
27 ޖުލައި 2017 | ބުރާސްފަތި 17:07ޣައިރު ގަނޫނީ އެއްވުންތަކުގައި ރައްޔިތުން ބައިވެރިނުވުމަށް ހޯމް މިނިސްޓްރީން ވަނީ ގޮވާލާފައި
ހޯމް މިނިސްޓަރ އަޒްލީން އަހުމަދު
ގަނޫނާޚިލާފު އަމަލު ހިންގާ ފަރާތްތަކާއި މެދު ފިޔަވަޅު އަޅާ މައްސަލަތައް ޝަރީއަތަށް ފޮނުވާނެކަމަށް ހޯމް މިނިސްޓްރީން ބުނެފިއެވެ.
ހޯމް މިނިސްޓްރީން ބުރާސްފަތި ދުވަހު ނެރެފައިވާ ބަޔާނެއގައި ބުނެފައި ވަނީ، ގައުމެއްގެ އެންމެ އިސް ވެރިޔަކު ރާއްޖެއަަށް ދަތުރުފުޅެއް ކުރެއްވި ދަނޑިވަޅެއްގައި، ގައުމުގައި ހަމަޖެހުމާއި އެއްބައިވަންތަކަން ނެތްކަން ދެއްކުމަށްޓަކައި ހަގީގަތާ ޚިލާފު މަންޒަރުތަކެއް ބޭރުގެ ފަރަތްތަކަށް ދެއްކުމަށް ދިވެހިންގެ މަދުބަޔަކު މަގުތަކަށް ނުކުމެ ބުދަ ދުވަހުގެރޭ ހިންގާފައި ވަނީ ގާނޫނާ ޚިލާފު އަމަލުތަކެއް ކަމަށެވެ. އަދި އެފަރާތްތަކުން މިނިވަން ދުވަހުގެ އިހްތިފާލުތަކަށް ހުރަސްއެޅޭ ގޮތަށް ކަންކަން ކޮށްފައިވާ ކަމަށް ހޯމް މިނިސްޓްރީން ވަނީ ތުހުމަތުކޮަށްފައެވެ.
ހޯމްމިނިސްޓްރީން ބުނީ ގައުމުގެ ހަމަޖެހުމަށް ބުރޫއަރާ އެފަދަ ނާތަހުޒީބު އަމަލު ހިންގާ ފަރާތްތަކާ މެދު ގާނޫނީ ފިޔަވަޅު އަޅާނޭ ކަމަށެވެ. އަދި ރައްޔިތުންގެ މެދުގައި ފިތުނަ ފަސާދަ އުފެދޭ ޣައިރު ގަނޫނީ އެއްވުންތަކުގައި ރައްޔިތުން ބައިވެރިނުވުމަށް ވަނީ ގޮވާލާފައެވެ.
އަދި ކަނިވާ ސަރަހައްދު ނޫން ސަރަހައްދެއްގައި އެއްވެސް ބާވަތެއްގެ އެއްވުމެއް ފުލުހުންގެ ޚާއްސަ ހުއްދައަކާ ނޫން ގޮަތަކަށް ނުބޭއްވޭނޭ ކަމަށް ހޯމް މިނިސްޓްރީގެ ބަޔާނުގައި ވެއެވެ.ގާނޫނާއި ޚިލާފު އެއްވުންތަކުގައި ހައްޔަރުކުރެވޭ ފަރަތްތަކާ މެދު ގާނޫނީ ފިޔަވަޅު އަޅައި، އެ ފަރާތްތަކުގެ މައްސަލަ ޝަރީއަތަށް ފޮނުވާނޭ ކަމަށް ހޯމް މިނިސްޓްރީން ވަނީ ބުނެފައެވެ.
ހޯމް މިނިސްޓްރީން މިހެން ބުނެފައިވާ އިރު މައްސަލަ ބަލާ ޝަރީއަތަށް ފޮނުވުމަކީ ހޯމް މިނިސްޓްރީގެ މެންޑޭޓްގެ ތެރޭގައި ހިމެނޭކަމެއް ނޫނެވެ. އަދި މައްސަލަ ތަހުގީގު ކުރުން ފިޔަވާ، މައްސަލަ ބަލާ ޝަރީއަތަށް ފޮނުވުމަކީ ޕްރޮސެކިއުޓާ ޖެނެރަލް ކުރައްވަން ޖެހިވަޑައިގަންނަވާ ކަމެކެވެ.
