ކޮވިޑް-19 އަށް ޕޮޒިޓިވްވެގެން އެޑްމިޓްކުރި މީހާގެ ހާލު ދެރަ
13 މާރިޗު 2020 | ހުކުރު 17:15ފަަރުވާދެމުންދަނީ 70 އަހަރުގެ މީހަކަށް
ދަރުމަވަންތަ ހޮސްޕިޓަލް
ކޮވިޑް-19 އަށް ޕޮޒިޓިވްވި މީހުންގެ ތެރޭގައި ދަރުމަވަންތަ ހޮސްޕިޓަލުގައި ފަރުވާދެމުންދާ މީހާގެ ހާލު ދެރަ ކަމަށް ސަރުކާރުން ހާމަކޮށްފި އެވެ.
ދަރުމަވަންތަ ހޮސްޕިޓަލްގެ 11 ވަަނަ ފްލޯގައި ފަރުވާދެމުންދަނީ 70 އަހަރުގެ މީހެކެވެ. ދަރުމަވަންތަ އަށް އެމީހާ ބަދަލުކޮށްފައިވަނީ އިތުރު ފަރުވާދޭން ވެގެންނެވެ. އެއީ ކޮން ރިސޯޓަކުން ގެނައި މީހެއް ކަމެއް ސަރުކާރުން ހާމައެއް ނުކުރެއެވެ.
ކޮވިޑް-19 ޓާސްކް ފޯހުން ހުކުރު ދުވަހުގެރޭ ދަރުބާރުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިންދިރާ ގަންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ އެތެރެ ހަށީގެ ހާއްސަ ޑރ. މޫސާ މުރާދު ވިދާޅުވީ، 70 އަހަރުގެ މީހާ ހޮސްޕިޓަލަށް ގެނައި ދުވަހާއި އަޅާބަލާއިރު އެމީހާގެ ހާލަތު ބަލި ކަމަށެވެ.
ޑރ. މުރާދު ވިދާޅުވީ، އެމީހާގެ ހާލަތު ގޯސްވެދާނެ ކަމަށް ލަފާކުރެވޭތީ އޭނާގެ ހާލު ވަރަށް ގާތުން ބަލަމުންދާ ކަމަށާއި، ވެންޓިލޭޓަރަށްލާ ހިސާބަށް އޭނާގެ ހާލު ގޯސްނުވާ ކަމަށެވެ. ޑރ. ވިދާޅުވީ، އެމީހާގެ ގައިގައި ހުން ނެތް ކަމަށާއި، ނަމަވެސް މި ބައްޔަކީ ގޮތް ނޭނގެ ބައްޔަކަށްވާތީވެ އެމީހާގެ ހާލު ރަނގަޅެކޭ ނުދެންނެވޭނެ ކަމަށެވެ.
އެ ރޯގާ ޖެހޭ މީހުންގެ ތެރެއިން ހާލަތު ގޯސްވާ މީހުންނަސް ސަރުކާރުން ހަމަޖައްސާފައިވަނީ ދަރުމަވަންތަ ހޮސްޕިޓަލުގެ 11 ވަނަ ފްލޯއެވެ. އެ ތަނުގައި އެއް ފަހަރާކާ 10 މީހަކަަށް ފަރުވާދެވޭނެ ކަމަށް މީގެ ކުރިން ބޭއްވި ޕްރެސްކޮންފަރެންސެއްގައި ޑރ މުރާދު ވަނީ ވިދާޅުވެފައެވެ.
