ހުޅުމާލޭގައި ކުޑަ ކުއްޖަކަށް އަނިޔާކުރިކަމުގެ ތުހުމަތުގައި އިންޑިއާ ޑޮކްޓަރަކު ހައްޔަރުކޮށްފި
13 މާރިޗު 2020 | ހުކުރު 10:41އަނިޔާ ކުރާ ވީޑިއޯ ފުލުހުންނަށް ވަނީ ހުށަހަޅާފައި
ހުޅުމާލޭގެ މަގެއް
ހުޅުމާލޭގައި ކުޑަ ކުއްޖަކަށް އަނިޔާކުރިކަމުގެ ތުހުމަތުގައި ސްޕީޗް ތެރަޕީ ދޭ އިންޑިއާ ޑޮކްޓަރަކު ހައްޔަރުކޮށްފިއެވެ.
ފުލުހުން ބުނީ މާރޗުމަހުގެ 12 ވަނަ ދުވަހުރޭ 22:56 ހާއިރު ހުޅުމާލޭގައި 06 އަހަރުގެ ފިރިހެން ކުއްޖަކަށް ސްޕީޗް ތެރަޕީ ދޭ ޑޮކްޓަރެއް، އެކުއްޖާގެ ކަންފަތުގައި ހިފާ އަނިޔާކޮށްފައިވާކަމަށް ބުނާ މައްސަލައެއް ފުލުހުންނަށް ހުށަހަޅާފައިވާ ކަމަށެވެ.
މި މައްސަލައިގައި ފުލުހުން ބެލިބެލުމުން، އެޑޮކްޓަރު އެކުއްޖާއަށް ތެރަޕީ ދެނީ އަމިއްލަ ހައިސިއްޔަތުން (ޕްރައިވެޓް ޕްރެކްޓިސްގެ ތެރެއިން) ކުއްޖާގޭގައި ކަމަށާއި، އޭނާއަށް އަނިޔާކުރާ މަންޒަރު ފެންނަ ވީޑިއޯ ފުލުހުންނަށް ލިބިފައިވާ ކަމަށެވެ.
ފުލުހުން ބުނީ މިހާދިސާ ހިނގާފައިވަނީ މިމަހުގެ 11 ވަނަ ދުވަހުގެ ރޭ ވަގުތެއްކަމަށް މައުލޫމާތު ލިބިފައިވާ ކަމަށެވެ. އަދި ކުޑަކުއްޖަކަށް ޖިސްމާނީ އަދި ނަފްސާނީ އަނިޔާކުރި މައްސަލައިގެ ތުހުމަތުގައި މިމަހުގެ 12 ވަނަ ދުވަހުގެ 2:45 ހާއިރު ކޯޓު އަމުރެއްގެ ދަށުން އެ ޑޮކްޓަރު ހައްޔަރުކޮށްފައިވާ ކަމަށެވެ.
މިމައްސަލާގައި ހައްޔަރުކުރީ 34 އަހަރުގެ އިންޑިއާ ޑޮކްޓަރެއް ކަމަށް ފުލުހުން މައުލޫމާތުދެއެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
