ކޮވިޑް-19: ގުޅިގެން މަސައްކަތްކުރެއްވުމަށް މޯދީ ހުށަހެޅުއްވި ހުށަހެޅުމަށް ރައީސުލްޖުމްހޫރިއްޔާ މަރުޙަބާ ވިދާޅުވެއްޖެ
13 މާރިޗު 2020 | ހުކުރު 10:26ކޮވިޑް-19 އިން އަރައިގަތުމަށް ގުޅިގެން މަސައްކަތް ކުރުން މުހިންމު
ރައީސް ސޯލިހުއާއި އިންޑިއާގެ ބޮޑުވަޒީރު ނަރެންދްރަ މޯދީ
ސާރކުގެ މެންބަރު ޤައުމުތަކުން ކޮވިޑް-19 އާއި ހަނގުރާމަކުރުމަށް އެކަށީގެންވާ ވަރުގަދަ އިސްތިރާޖީއެއް އެކުލަވާލުމަށް ހުށަހަޅުއްވި ހުށަހެޅުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު މަރުޙަބާ ވިދާޅުވެއްޖެއެވެ.
އިންޑިއާގެ ބޮޑުވަޒީރު ނަރެންދްރަ މޯދީ މިކަން ހުށަހަޅުއްވާ ކުރެއްވި ޓްވީޓަށް ޖަވާބުދެއްވައި ރައީސުލްޖުމްހޫރިއްޔާ ވިދާޅުވީ ކޮވިޑް-19 އިން އަރައިގަތުމަށް ގުޅިގެން މަސައްކަތް ކުރުން މުހިންމުކަމަށެވެ. އަދި މޯދީގެ ހުށަހެޅުމަށް މަރުޙަބާ ދަންނަވާ، ޞަރަޙައްދީގޮތުން ކުރެވޭ މިމަސައްކަތައް ދިވެހި ސަރުކާރުގެ ފުރިހަމަ އެއްބާރުލުން ލިބޭނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ އަރުވާފައެވެ.
ހުކުރު ދުވަހު މޯދީ ވަނީ ކޮވިޑް-19 ގެ ޙާލަތާއި ގުޅިގެން ގިނަ ޓްވީޓްތަކެއް ކުރާއްވާފައެވެ.
އޭގެ ތެރެއިން އެއް ޓްވީޓެއްގައި ވަނީ ސާރކުގެ މެންބަރު ޤައުމުތަކުން ކޮވިޑް-19 އާއި ހަނގުރާމަކުރުމަށް އެކަށީގެންވާ ވަރުގަދަ އިސްތިރާޖީއެއް އެކުލަވާލުމަށް ހުށަހަޅުއްވާފައެވެ.
އެމަނިކުފާނު ވިދާޅުވީ ދެކުނު އޭޝިޔާގެ ރައްޔިތުން ދުޅަހެޔޮ ޞިއްހަތެއްގައި ބޭތިއްބުމަށް މަގުފަހިކުރުވާނެ ކަންތައްތަކާއި ބެހޭ ގޮތުން ވީޑިއޯ ކޮންފަރެންސްގެ ޒަރީއާއިން މަޝްވަރާތައް ކުރިޔަށް ގެންދެވިދާނެކަމަށެވެ. އަދި ގުޅިގެން މަސައްކަތްކޮށް ދުނިޔެއަށް މިކަމުގައި މިސާލެއްގެގޮތުގައި ދެއްކިދާނެކަމަށެވެ.
މޯދީގެ އެހެން ޓްވީޓެއްގައި ވިދާޅުވެފައިވަނީ، މުޅު ދުނިޔެ ކޮވިޑް-19ގެ ޝިކާރައަކަށް ވެފައިވާއިރު، އެކި ސަރުކާރުތަކުންނާއި ޤައުމުތަކުގެ ރައްޔިތުން އެންމެ އެކަށީގެންވާގޮތުގައި އެއާއި ހަނގުރާމަކުރުމަށް މަސައްކަތްކުރަމުންދާކަމަށެވެ.
ދުނިޔޭގެ އާބާދީގެ ބޮޑުބައެއް ހިއްސާކުރާ ދެކުނު އޭޝިޔާގެ ރައްޔިތުން މި ބަލިން މިންޖުކުރުމަށާއި، އެމީހުންގެ ދުޅަހެޔޮކަން ކަށަވަރުކުރުމަަށް ކުރެވެން އޮތް ހުރިހައި ކަމެއް ކުރައްވާނޭކަމުގެ ޔަޤީންކަން މޯދީ ވަނީ ދެއްވާފައެވެ.
