ކޮވިޑް-19: ވައިރަސްއާ ގުޅިގެން ސޫރިޔަވަންޝީ ރިލީޒް ކުރުން ފަސްކޮށްފި
13 މާރިޗު 2020 | ހުކުރު 05:17ފިލްމް ރިލީޒްކުރުން ފަސްކުރިކަން ހާމަކޮށްފައިވަނީ ބުރާސްފަތި ދުވަހު
ސޫރިއަވަންޝީގެ ޕޯސްޓަރު
ކޮވިޑް -19 އާ ގުޅިގެން އަކްޝޭ ކުމާރާއި ކެޓްރީނާ ކެއިފް ލީޑް ރޯލުން ފެނިގެންދާ ފިލްމު "ސޫރިޔަވަންޝީ" ރިލީޒް ކުރުން ފަސްކޮށްފިއެވެ.
ފިލްމު ރިލީޒްކުރުން ފަސްކުރިކަން ފިލްމުގެ ޑައިރެކްޓަރ ރޯހިތު ޝެޓީ ވަނީ މިދިޔަ ބުރާސްފަތި ދުވަހު ހާމަކޮށްފައެވެ.
ސޯޝަލް މީޑިއާގައި ރޯހިތު ޝެޓީ ޢާންމުކޮށްފައިވާ ބަޔާނުގައި ވަނީ މި ފިލްމުގެ މަސައްކަތް ކުރަމުންދާތާ އަހަރަކަށްވުރެ ގިނަ ދުވަސް ވެފައިވާ ކަމަށާއި މި ފިލްމު އުފެއްދުމަށްޓަކައި ބުރަ މަސައްކަތް ކޮށްފައިވާ ކަމަށެވެ.
އަދި މި ފިލްމުގެ ޓްރެއިލާ ބެލުމަށްފަހު ލިބުނު ތަރުޙީބަށް ބަލާފައި މި ފިލްމު އޯޑިއަންސް ބަލއިގަންނާނެ ކަމުގެ ޔަޤީންކަން އެބައޮތް ކަމަށް އޭނާ ބުނެއެވެ.
ކޮވިޑް-19 އާ ގުޅިގެން ފިލްމު ރިލީޒްކުރުން ފަސްކުރުމަށް ނިންމާފައިވާ ކަމަށާއި ފިލްމު ރިލީޒް ކުރާނެ ދުވަހެއް ފަހުން އިޢުލާން ކުރާނެ ކަމަށް ވަނީ ބުނެފައެވެ. އަދި އޯޑިއަންސަށް ފުރިހަމަ ސިއްޙަތަކައް ވެސް ވަނީ އެދިފައެވެ.
ކޮވިޑް-19 އާއި ގުޅިގެން އިންޑިއާގެ ވެރިރަށް ނިއު ދިއްލީގެ ތިއޭޓަރުތައް ވަނީ މިހިނގާ މާރޗު މަހުގެ 31 އާ ހަމައަށް ބަންދުކޮށްފައެވެ.
