ކޮވިޑް-19: ރާއްޖޭގެ އެކި ހިސާބުތަކުގައި އެކްސްކަރޝަން ހުއްޓުމަށް އަންގައިފި
މަނާކޮށްފައިވަނީ މިހާރުން ފެށިގެން 10 ދުވަހުގެ މުއްދަތަށް
ފަތުރުވެރިންތަކެއް އެކްސަކަރޝަންގައި
ރާއްޖޭގެ އެކި ހިސާބުތަކުގައި އެކްސްކަރޝަންތައް ހިންގުން ހުއްޓުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އަންގައިފިއެވެ.
އެޗްޕީއޭ އިން ބުނީ މިގޮތަށް އަންގާފައިވަނީ ކޮރޯނާވައިރަސް (ކޮވިޑް-19) އިން ރައްކާތެރިކުރުމަށް ޢާންމު ޞިއްޙަތު ރައްކާތެރިކުރުމުގެ ޤާނޫނުގެ 34 ވަނަ މާއްދާގެ (ރ) ގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތައް ލިބިފައިވާ ޤާނޫނީ ބާރުގެ ތެރެއިން ކަމަށެވެ.
އެޗްޕީއޭ އިން ވަނީ އެކްސްކަރޝަންގެ ގޮތުގައި އެއްވެސް ރަށަކުން، ރިސޯޓަކުން، ސަފާރީއަކުން އަދި ގެސްޓްހައުސްއަކުން މީހުން އައުމާއި ދިޔުން މިހާރުން ފެށިގެން 10 ދުވަހުގެ މުއްދަތަށް ހުއްޓާލުމަށް އަންގާފައެވެ.
އަދި މިކަމާ ގުޅިގެން ކަމާބެހޭ އިދާރާތަކާއި، ރިޒޯޓުތަކާއި، ގެސްޓްހައުސްތަކާއި، ސަފާރީތައް އޮޕަރޭޓްކުރާފަރާތްތަކާއި އެކްސްޓަރޝަންތައް ރާވައި ހިންގާ އެހެނިހެން ފަރާތްތަކުން މި އެންގުމަށް ޢަމަލުކުރުމަށް އެޗްޕީއޭ އިން ވަނީ އިލްތިމާސްކުރައްވާފައެވެ.
މިގޮތަށް އެޗްޕީއޭ އިން އަންގާފައިވާއިރު އެކްސްކަރޝަންގެ ގޮތުގައި އެއްވެސް ތަނަކުން މާލެ ޞަރަޙައްދަށް މީހުން އައުންވެސް ވަނީ މަނާކޮށްފައެވެ. އަދި ކޮވިޑް-19 ރޯގާއާ ގުޅިގެން، މީހުން ދިރިއުޅޭ ރަށްރަށަށް އެކްސްކަރޝަންއަށް ދިއުމާއި، މީހުން ދިރިއުޅޭ ރަށްރަށުން ފަތުރުވެރިން ރިސޯޓުތަކަށާއި، ސަފާރީތައް ފަދަ ތަންތަނަށް އެކްސްކަރޝަންއަށް ދިއުން ވެސް މިހާރުން ފެށިގެން ހުއްޓާލުމަށް ވެސް ވަނީ އަންގާފައެވެ.
