ޗައިނާގެ އެހީއަށް ސަރުކާރުން ނޫނެކޭ ބުނިކަމަށް ވިދާޅުވެ ޝިޔާމް އިތުރުފުޅުހައްދަވައިފި

ކޮވިޑް-19 އާ ގުޅިގެން ދިވެހި ސަރުކާރަށް އެހީވެދިނުމުގެ ގޮތުން ޗައިނާއިން ފޯރުކޮށްދޭން އުޅުނު އެހީއަށް، ސަރުކާރުން ނޫނެކޭ ބުނި ކަމަށް ވިދާޅުވެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހުމަދު ޝިޔާމް އިތުރުފުޅު ހެއްދެވިކަން ހާމަވެއްޖެއެވެ.

ބުރާސްފަތި ދުވަހު ޝިޔާމް ކުރެއްވި ޓްވީޓެއްގައި ވިދާޅުވީ ޗައިނާއިން އެ ގައުމުގެ ރެސްޕިރޭޓަރީ ފިޒީޝަނުންނާއި ޕަލްމޮނޮލިޖިސްޓުން ހިމެނޭ ޓީމަކާއެކު މެޑިކަލް ސަޕްލައި ފޯރުކޮށްދޭން ޗައިނާ ސަރުކާރުން ހުށައެޅުމުން ސަރުކާރުން "ރިޖެކްޓް" ކޮށްފައިވާ ކަމަށެވެ. އަދި އެހެން ކަންކުރެއްވި ސަބަބު އޮޅުންފިލުވައިދެއްވަން ރައީސް ސޯލިހު އަރިހުން އެދިވަޑައިގަތެވެ.

މިކަމާއި ގުޅިގެން އެމްޑީޕީގެ ބައެއް މަޖިލިސް މެމްބަރުންނާއި އެ ޕާޓީއަށް ތާއިދުކުރައްވާ ބައެއް ފަރާތްތަކުން ވަނީ ޝިޔާމް އިތުރުފުޅު ހައްދަވާ ކަމަށް ވިދާޅުވެ ޓްވީޓްކޮށްފައެވެ. އަދި މިޒާތު ދޮގު މައުލޫމާތު މިފަދަ ހައްސާސް ދަނޑިވަޅެއްގައި ރައްޔިތުންނާ ހިއްސާކުރުމަކީ ދަށު ދަރަޖައިގެ އަމަލެއްގެ ގޮތުގައި ސިފަކުރައްވާފައިވެއެވެ.

މިކަން އޮޅުންފިލުއްވައިދެއްވުމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު އަރިހުން ބައެއް ފަރާތްތަކުން އެދިވަޑައިގަތެވެ. ދިވެހި ސަރުކާރުން ޗައިނާގެ ހުށައެޅުމަކަށް ނޫނެކޭ ބުނެފައިވޭތޯ މީހަކު ކުރި ސުވާލަކަށް ޖަވާބުދެއްވަމުން އެމްބަސެޑަރ ޒަންގް ވިދާޅުވީ ނޫނެކޭއެވެ.

ޗައިނާ އެމްބެސެޑަރު ވިދާޅުވީ، ރާއްޖެއަށް އެހީ ފޯރުކޮށްދިނުމުގެ މަޝްވަރާތައް ދިވެހި ސަރުކާރާއެކު ކުރިޔަށްދާ ކަމަށެވެ. އަދި ޗައިނާ އާއި ރާއްޖޭގެ ހާލަތާ ގުޅިގެން، ރާއްޖޭގެ ކެބިނެޓުގައި ހިމެނިވަޑައިގަންނަވާ ވަޒީރުންނާއެކު ގާތުން މުއާމަލާތް ކުރެވެމުންދާ ކަމަށް ވިދާޅުވިއެވެ.

ދެ ގައުމުން ގުޅިގެން މަސައްކަތް ކުރެވޭނެ ދާއިރާތައް ބަލަމުންދާ ކަމަށާއި، ރާއްޖޭގެ ހާލަތާމެދު ހަމްދަރުދީވާ ހާލު ދިވެހިންގެ ފަރާތުން ލިބެމުންދާ ތާއިދުގެ ބަލައިގަންނަ ކަމަށް ޒަންގް ވިދާޅުވިއެވެ.

ރާއްޖެއިންވެސް ވަނީ ޗައިނާއަށް ދިމާވި ބަލިމަޑުކަމުގެ ހާލަތާއި ގުޅިގެން އެހީ ވެދީފައެވެ. އެގޮތުން ދިވެހި ސަރުކާރުން ވަނީ ޗައިނާގެ ރައްޔިތުންނަށް އެއް މިލިއަން މަސް ދަޅު ހަދިޔާކޮށްފައެވެ.

ކޮވިޑް-19 ފުރަތަމަ ފެނުނު ގައުމު ކަމުގައިވާ ޗައިނާއިން ވަނީ މި ބަލި ކޮންޓްރޯލް ކުރުމުގައި ވަނީ ބޮޑެތި ކުރިއެރުންތަކެއް ހޯދާފައެވެ. ދުނިޔޭގެ ސިއްހަތު ޖަމިއްޔާ، ޑަބްލިޔުއެޗްއޯއިން ވެސް ވަނީ ޗައިނާ ސަރުކާރުން ކުރި މަސައްކަތަށް ތައުރީފުކޮށްފައެވެ.