ލޯކަލް ކައުންސިލް އިންތިޚާބު ފަސްކޮށްދިނުމަށް އެމްއާރްއެމުން އެދިއްޖެ
މާލީ ގޮތުން ބޮޑު އިސްރާފަކަށް ވެގެން ހިނގައިދާނެ: އެމްއާރްއެމް
ެއެމްއާރްއެމްގެ ރައީސް، ރައީސް މައުމޫން އަބްދުލްގައްޔޫމް
ކޮވިޑް-19 އަށް ޕޮޒިޓިވްވި 8 މީހަކު ރާއްޖެއިން ފެނުމާއި ގުޅިގެން، ކުރިޔަށް އޮތް ލޯކަލް ކައުންސިލްގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު ފަސްކޮށް ދިނުމަށް މަޝްވަރާ ކޮށްދިނުމަށް ސަރުކާރު ކޯލިޝަނުގައި ހިމެނޭ މޯލްޑިވްސް ރިފޯމް މޫވްމެންޓް (އެމްއާރްއެމް) އިން އިލެކްޝަން ކޮމިޝަން (އީސީ) ގައި އެދިއްޖެ އެވެ.
އިންތިޚާބު ފަސްކޮށްދިނުމަށް އެދި އެމްއާރްއެމުން އީސީއަށް ފޮނުވި ސިޓީއެއްގައި ބުނެފައިވަނީ، މި ވަގުތަކީ ކުރިޔަށް އޮތް ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބަށް ތައްޔާރުވަމުންދާ ވަގުތު ކަމަށެވެ. ނަމަވެސް މިވަގުތު ޙާލަތު އޮތް ގޮތުން ދައުލަތުން އެތައް މިލިއަން ރުފިޔާއެއް ޚަރަދުކޮށްގެން ބާއްވާ މި ދެ އިންތިޚާބުގައި ވޯޓުލުމަށް އެކަށޭނަ ޢަދަދަކަށް ރައްޔިތުން ނުނިކުމެ، އިންތިޚާބަކީ ރައްޔިތުންގެ އެއްބާރުލުން ނުލިބޭ، މާލީ ގޮތުން ކުރެވޭ އިޞްރާފަކަށް ވެދާނެކަމަށް އެ ޕާޓީން ދެކޭކަމަށެވެ.
އެމްްއާރްއެމުން ބުނީ، ކެނޑިޑޭޓުންނަށް ޤާނޫނުއަސާސީން ލިބިދީފައިވާ ތާއީދު ހޯދުމުގެ ޙައްޤު ލިބިގަތުމަށްވެސް ހުރަސްތަކެއް ހުރި ދަނޑިވަޅެއް ކަމަށް އެ ޕާޓީން ދެކޭ ކަމަށެވެ. އެހެން ކަމުން ސިޔާސީ ޕާޓީ ތަކާއި އަދި ކަމާއި ގުޅުންހުރި މުއައްސަސާތަކާއި މަޝްވަރާކުރުމަށް ކައުންސިލް އިންތިޚާބު ފަސްކޮށްދިނުމަށް އެމްއާރްއެމުން އިސީއަށް ފޮނުވި ސިޓީގައި ވަނީ ބުންޏެވެ.
އަންނަ މަހުގެ ހަތަރު ވަނަ ދުވަހު ބޭއްވުމަށް ހަމަޖެހިފައިވާ އިންތިޚާބު ފަސްކޮށްދިނުމަށް އެމްއާރްއެމުން އެދިފައިވާއިރު، ކޮވިޑް-19 އާ ގުޅިގެން އިންތިޚާބު ފަސްކުރުން އެއީ އެންމެ ބުއްދިވެރި ގޮތްކަމަށް ޞިއްޙީ ތަޖުރިބާކާރުން ދަނީ ބުނަމުންނެވެ. އަދި ރައްޔިތުންގެ މަޖިލީހުގެ ބައެއް މެންބަރުންވެސް ދަނީ އިންތިޚާބު ފަސްކުރަން ގޮވާލަމުންނެވެ. އެކަމަކު އިންތިޚާބު ފަސްކުރަން ނިންމާފައިނުވާ ކަމަށް އީސީން ވަނީ މީގެ ކުރިން ބުނެފައެވެ. ކޮވިޑް-19 އާ ގުޅިގެން ސިޔަސީ ޕާޓީތަކުން ކުރިޔަށް ގެންދިޔަ ޙަރަކާތްތައްވަނީ ވަގުތީ ގޮތުން މެދުކަނޑާލާފައެވެ.
