ޔުއެފާ ޗެމްޕިއަންސް ލީގުގައި ޖަރުމަންގެ އާރުބީ ލެއިޕްޒީގުން އެންމެ ފަހުގެ ރަނަރަޕް ޓޮޓެންހަމް ހޮޓްސްޕާސް ބަލިކޮށް ފުރަތަމަ ފަހަރަށް ކުއާޓާ ފައިނަލަށް ދަތުރު ކޮށްފިއެވެ.

ލެއިޕްޒީގުގެ ދަނޑުގައި ކުޅުނު މި މެޗު އެޓީމުން ކާމިޔާބުކުރީ 3-0 ގެ ނަތީޖާއަކުންނެވެ. އެ ޓީމު ކުއާޓާ ފައިނަލަށް ދަތުރުކުރީ 4-0 ގެ އެގްރިގޭޓް ނަތީޖާއިން ކުރި ހޯދައިގެންނެވެ. ފުރަތަމަ ލެގުގައި ލެއިޕްޒީގުން ވަނީ ޓޮޓެންހަމްގެ ދަނޑުގައި 1-0 ގެ ނަތީޖާއަކުން އެޓީމު ބަލިކޮށްފައެވެ.

އަނިޔާގެ ގިނަ މައްސަލަތަކެއް ކުރިމަތިވެފައިވާ ޓޮޓެންހަމްގެ ފޯވާޑެއްގެ ގޮތުގައި އަންގާރަ ދުވަހުގެރޭ ކުޅުނު މެޗުގައި ކުޅުނީ މިޑްފިލްޑަރު ޑެލި އަލީ އެވެ. ފޯވާޑް ހެރީ ކޭން އާއި ސޮން ހެއުން-މިން އަށް ވަނީ އަނިޔާވެފައެވެ.

އަންގާރަ ދުވަހުގެރޭ ލެއިޕްޒީގަށް ދެ ލަނޑު ޖަހައިދިނީ އުމުރުން 20 އަހަރުގެ މާސެލް ސަބިޓްޒާ އެވެ. އޭނާ ޖެހި ދެ ލަނޑު ހުއްޓުވުމަށް ޓޮޓެންހަމްގެ ގޯލްކީޕަރު ހޫގޯ ލޮރިސް އަށް މާބޮޑު މަސައްކަތެއް ނުކުރެވުނެވެ. ދެން ލެއިޕްޒީގަށް ލަނޑު ޖަހައިދިނީ ބެންޗުން ކުޅެން އެރި އެމިލް ފޯސްބާގް އެވެ.

މެޗަށްފަހު ވާހަކަ ދައްކަމުން ޓޮޓެންހަމްގެ ކޯޗު ހޯސޭ މޮރީނިއޯ ބުނީ މެޗަށް ނުކުތީ ދެވަނަ ބުރަށް ދެވޭނެ ކަމުގެ އަޒުމުގައި ކަމަށާއި ނަމަވެސް މި މެޗުގައި ވެސް ފެނިގެންދިޔައީ ފުރަތަމަ މެޗުގައި ވެސް ކުޅުންތެރިންގެ ފަރާތުން ފެނުނު ގޯސްތައް ކަމަށެވެ. މީގެ އިތުރުން މޮރީނިއޯ ބުނީ މިވަގުތު ޓޮޓެންހަމް އޮތީ ވަރަށް އުނދަގޫ ހާލަތެއްގައި ކަމަށާއި، އެއާއި ހިލާފަށް ލައިޕްޒިންގ ގެ ކުޅުން ޓޮޓެންހަމް އަށް ވުރެ ހާސްގުނަ ވަރުގަދަ ކަމަށާއި އެހެން ކަމުން މި މޮޅު އެޓީމަށް ހައްގު ކަމަށެވެ.