ކޮވިޑް-19 ފެތުރުނަ ނުދިނުމަށް ގެސްޓްހައުސްތަކުން ސަމާލުކަމެއް ދިނުމަށް އެދެފި
11 މާރިޗު 2020 | ބުދަ 02:10ސަރުކާރުން އަޅަމުންދާ ފިޔަވަޅުތަކަށް ވަނީ ތައުރީފް ކޮށްފައި
ގެސްޓްހައުސް އެސޯސިއޭޝަން އޮފް މޯލްޑިވްސްއިން ބޭއްވި ބައްދަލުވުމެއްގެ ތެރެއިން
ކޮވިޑް-19 ގެ ހަ ކޭސްއެއް ރާއްޖެއިން ފެނިފައިވާއިރު، އެ ވައިރަސް އިތުރަށް ފެތުރުނަ ނުދިނުމަށްޓަކައި ގެސްޓްހައުސްތައް ހިންގާ ފަރާތްތަކުން ހާއްސަ ސަމާލުކަމެއް ދިނުމަށް ގެސްޓް ހައުސް އެސޯސިއޭޝަން އޮފްދަ މޯލްޑިވްސް އިން އެދެފިއެވެ.
އެ އެސޯސިއޭޝަނުން ބުދަ ދުވަހު އާއްމުކޮށްފައިވާ ބަޔާނެއްގައި ވަނީ، ކޮވިޑް-19 ފެތުރެން ފަށާފައިވާ މި ދަނޑިވަޅުގައި ރައީސް އިބްރާހީމް މުހައްމަދު ސޯލިހު އާއި ޓޫރިޒަމް މިނިސްޓްރީއާއި ދައުލަތުގެ މުއައްސަސާތަކުން ވައިރަހާ ދެކޮޅަށް ކުރަމުންދާ މަސައްކަތްތަށް ފާހަގަކޮށް އެ ފަރާތްތަކަށް ޝުކުރު އަދާކޮށްފައެވެ.
އެގޮތުން، ކޮވިޑް-19 ގެ އަލާމާތްތައް ފެންނަ ފަރާތްތައް ކަރަންޓިން ކުރުމާއި ފަރުވާދެވޭނެ އިންތިޒާމުތައް ހަމަޖެއްސުމުގެ ގޮތުން ބ.އަތޮޅު ފަރުކޮޅުފުށީގައި ގާއިމް ކުރެވުނު ކަރަންޓީން ފެސިލިޓީ އާއި ކ.އަތޮޅު ވިލިވަރުގައި، އެންމެ 10 ދުވަސްތެރޭގައި ޓޫރިޒަމް ޓްރަސްޓް ފަންޑް އިން ހަރަދު ކޮށްގެން 30 ކޮޓަރިގެ ކަރަންޓީން ފެސިލިޓީއެއް ގާއިމު ކުރެވިފައިވާކަން ފާހަގަ ކޮށްފައެވެ.
ގެސްޓް ހައުސް އެސޯސިއޭޝަނުން ބުނީ، މި ނާޒުކު ދަނޑިވަޅުގައި ގެސްޓް ހައުސްތަކަށް ބޭނުންވާ އެހީތެރިކަމަށް ސަރުކާރުގެ އިދާރާތަކުގެ ފުރިހަމަ އެއްބާރުލުން ބޭނުންވާ ކަމަށެވެ. އޭގެ ތެރޭގައި، ޓޫރިޒަމް މިނިސްޓްރީއަށް ގެސްޓް ހައުސްތަކުން ދުވަހުން ދުވަހަށް ފޮނުވަންޖެހޭ މައުލޫމާތުތައް ލިބޭކަން ކަށަވަރު ކުރުމާއި، މައުލޫމާތު ފޮނުވަންޖެހޭ އީމެއިލް ތަކަށް ލިބޭ މެއިލްތަކަށް ދުވަހުން ދުވަހަށް އިޖާބަ ދިނުމާއި، ގުޅުން ކަނޑައަޅާފައިވާ ނަމްބަރުތަކާއި ހޮޓްލައިންތަކަށް ވަގުތުން ވަގުތަށް އިޖާބަދިނުން ހިމެނޭ ކަމަށެވެ.
އަދި އޭގެ އިތުރުން، ކޮވިޑް-19 އިތުރަށް ފެތުރުނަ ނުދިނުމަށްޓަކައި ގެސްޓްހައުސްތައް ހިންގާ ފަރާތްތަކުންހާއްސަ ސަމާލުކަމެއް ދިނުމަށް މި އެސޯސިއޭޝަންގެ ފަރާތުން ވަނީ އެދިފައެވެ. ސަރުކާރުގެ އިދާރާތަކުން ދެމުންގެންދާ އިރުޝާދުތަކަށް ފުރިހަމައަށް އަމަލުކުރުމާއި، އަންގަމުންދާ އެންގުންތަކަށް އެންމެ ފުރިހަމައަށް އިޖާބަދިނުމަށްވެސް އެ އެސޯސިއޭޝަނުން ވަނީ އެދިފައެވެ.
ކޮވިޑް-19 އަށް ރާއްޖެއިން ޕޮޒިޓިވްވެފައިވަނީ ހަ ބިދޭސީންނެވެ. އެ މީހުންނަށް ފަރުވާދެމުންދާ ކަމަށާއި، އެމީހުންގެ ހާލު ރަނގަޅު ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ ބުނެފައެވެ.
