ލާމަރުކަޒީ ނިޒާމު ފުނޑުފުނޑުކޮށްލުމަށް ސަރުކާރަށް ދޫ ނުދިނުމަށް ސިޓީ ކައުންސިލަރުންގެ ކިބައިން ރައީސް ނަޝީދު އެދިވަޑައިގެންފި

ކުރީގެ ރައީސުލްޖުމްހޫރިއްޔާ އަދި އެމް.ޑީ.ޕީގެ ރައީސް މުޙައްމަދު ނަޝީދު މާލޭ ސިޓީ ކައުންސިލަށާއި އައްޑޫ ސިޓީ ކައުންސިލަށް އަލަށް އިންތިޙާބުވެވަޑައިގަތް މެމްބަރުންނާއި ބައްދަލުކުރައްވައިފިއެވެ.

އަލަށް އިންތިޚާބުވި ސިޓީ ކައުންސިލަރުންނާއި ރައީސް މުހައްމަދު ނަޝީދު ބައްދަލުކުރެއްވީ، އަންގާރަދުވަހު ފޯން ކޮންފަރރެންސް މެދުވެރިކުރައްވައެވެ. މި ބައްދަލުކުރެއްވުން އޮތީ ކޮންމެ ކައުންސިލަކާއި ވަކިން އެމް.ޑީ.ޕީ ސެކްރެޓޭރިއަޓްގެ ކޮންފަރރެންސް ހޯލްގައިކަމަށް އެމްޑީޕީން މައުލޫމާތުދެއެވެ.

މި ބައްދަލުކުރެއްވުމުގައި އަލަށް އިންތިޙާބުވެވަޑައިގެންނެވި ކައުންސިލަރުންނަށް ރައީސް ނަޝީދު ވަނީ މަރުޙަބާ ދަންނަވާފައެވެ. އަދި ލާމަރުކަޒީ ނިޒާމުގެ ދަށުން ރާއްޖެ ހިންގުމުގެ މުހިންމުކަމާއި އެނިޒާމުގެ ފުނޑުފުނޑު ކޮށްލުމަށް ސަރުކާރުން ސިލްސިލާކޮށް ކުރައްވަމުން ގެންދަވާ މަސައްކަތަށް ދޫނުދެއްވާ ކުރިއަށް ވަޑައިގަތުމަށް ހިއްވަރުދެއްވިކަމަށް އެމްޑީޕީން ބުނެއެވެ.

ވަކިވަކިން ބޭއްވުނު މި ބައްދަލުކުރެއްވުންތަކުގައި މާލޭ ސިޓީ އަދި އައްޑޫ ސިޓީގެ މިހާރުގެ ކައުންސިލްގެ މެމްބަރުންވެސް ބައިވެވަޑައިގެންނެވިއެވެ. އަދި އެ މެމްބަރުން މިހާތަނަށްކޮށްދެއްވި މަސައްކަތަށް ރައީސް މުޙައްމަދު ނަޝީދު ވަނީ ޝުކުރު އަދާކުރައްވާފައެވެ.