ދެ ސަފީރަކަށް ރުހުން ނުދިނުމަށް ކޮމެޓީން ފާސްކޮށްފި

ރައީސް އިބްރާހިމް މުހައްމަދު ސޯލިހްގެ ފަރާތްޕުޅުން ދެ ޤައުމެއްގެ ސަފީރުކަމަށް ކަނޑައެޅުއްވި ބޭފުޅުންނަށް ރުހުން ނުދިނުމަށް ރައްޔިތުންގެ މަޖިލީހުގެ ޤައުމީ ސަލާމަތުގެ ކޮމެޓީން ފާސްކޮށްފި އެވެ.

ކޮމެޓީން އެގޮތަށް ފާސްކޮށްފައިވަނީ ބުރާސްފަތި ދުވަހު ބޭއްވި ކޮމެޓީގެ ބައްދަލުވުމުގަ އެވެ.

ސަރުކާރުގެ މެޖޯރިޓީ އޮންނަ ޤައުމީ ސަލާމަތުގެ ކޮމެޓީގެ އަޤުލަބިއްޔަތުން ރުހުން ނުދިނުމަށް ނިންމާފައިވަނީ ތައިލެންޑްގައި ހުންނަވާ ސަފީރަކަށް މުހައްމަދު ޖިނާހު، މއ. ތިބްރޯޒް އަދި ސައުދީ އަރަބިއްޔާގައި ހުންނަވާ ސަފީރަކަށް މުހައްމަދު ޚަލީލް، ގ. އުތުރުގެއާގެ އަށެވެ. ޖުމްލަ 3 ބޭފުޅެއްގެ ނަންފުޅު ކޮމެޓީން ދިރާސާކުރިއިރު، ޗައިނާގައި ހުންނަވާ ސަފީރަކަށް އައިޝަތު އަޒީމާ، މ. ބީނާފުށި އައްޔަން ކުރަން ފެންނަ ކަމަށް ކޮމެޓީން ވަނީ ފާސްކޮށްފަ އެވެ.

ޖިނާހާއި ޚަލީލަށް ރުހުން ދޭން ނުފެންނަ ކަމަށް ހުށަހެޅުއްވީ މަރަދޫ ދާއިރާގެ މެމްބަރު އިބްރާހިމް ޝަރީފް އެވެ. އެ ހުށަހެޅުމަށް ތާއީދުކުރެއްވީ ވައިކަރަދޫ ދާއިރާގެ އެމްޑީޕީ މެމްބަރު މުހައްމަދު ނާޒިމް އެވެ.

އެ ދެބޭފުޅުންނަށް ރުހުން ނުދިނުމަށް ކޮމޭޓީން ނިންމިނަމަވެސް، އެ ދެ ބޭފުޅުންގެ ނަންފުޅުވެސް މުޅި މަޖިލީހުގެ ތަޅުމަށް ހުށަހަޅާނެ އެވެ. އަދި އެ ނަންފުޅުތައް މުޅި މަޖިލީހުގެ ތަޅުމުން ތާއީދު ލިބިއްޖެނަމަ އެ ބޭފުޅުން މަޤާމަށް އައްޔަނުކުރާނެ އެވެ.

މީގެކުރިން ކޮމެޓީން ވަނީ 8 ބޭފުޅަކަށް ރުހުން ދިނުމަށް ފާސްކޮށްފަ އެވެ. އަދި އެ 8 ބޭފުޅުންގެ ނަންފުޅަށް މުޅި މަޖިލީހުންވެސް ވަނީ ތާއީދުކޮށްފަ އެވެ.