ކޮވިޑް-19: ބޭރު ޤައުމުތަކުގައި ތިބި ދިވެހިން ރާއްޖެ އައުމަށް ފޮރިން މިނިސްޓްރީން އެހީވާނެ: މަބްރޫކް
މައުލޫމާތު ސާފުކުރަން ފޮރިން މިނިސްޓްރީގެ ހޮޓްލައިން 7983400 ނަންބަރަށް ގުޅުމަށް އެދިފައިވޭ
ކޮވިޑް-19 ގެ ޓާސްކްފޯހުގެ ތަރުޖަމާނު މަބްރޫކް އަޒީޒް
ބޭރު ޤައުމުތަކުގައި ތިބި ދިވެހިން ރާއްޖެއައުމަށް ފޮރިން މިނިސްޓްރީން އެހީވާނެ ކަަމަށް ކޮވިޑް-19 ގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
އަންގާރަ ދުވަހުގެ ރޭ ދަރުބާރުގޭގައި އޮތް ނޫސްވެރިންގެ ބައްދަލުވުމުގައި ވާހަކަދައްކަވަމުން މަބްރޫކް ވިދާޅުވީ ބޭރު ޤައުމުތަކުގައި ތިބި ދިވެހިން ޚާއްޞަކޮށް ލޮކްޑައުން ކުރެވިފައިވާ ޤައުމުތަކުގައި ތިބި ދިވެހިން ގެނައުމުގެ އިންތިޒާމު ހަމަޖެއްސުމުގެ މަސައްކަތް ފޮރިން މިނިސްޓްރީން ކުރަމުންދާއިރު އެކަމާއި ގުޅިގެން އެއްވެސް މަޢުލޫމާތެއް ސާފުކުރަން އޮތްނަމަ ފޮރިން މިނިސްޓްރީގެ ހޮޓްލައިން 7983400 ނަންބަރަށް ގުޅުމަށް އެދޭ ކަމަށެެވެ.
ނޫސްވެރިންގެ ބައްދަލުވުމުގައި އިތުރަށް ވާހަކަ ދައްކަވަމުން މަބްރޫކް ވިދާޅުވީ ކޮންމެހެން ޒަރޫރީ ބޭނުމަކަށް ނޫނީ ކުރަންޖެހޭ ދަތުރެއް ނުކުރުމަށް ރައްޔިތުންނަށް ކަމާބެހޭ ވުޒާރާތަކުން އިލްތިމާސް ކުރާ ކަމަށެވެ. އަދި ދަތުރުކުރާކަމަށްވާނަމަ އެކަން ހެލްތު މިނިސްޓްރީއަށް އަންގާ ރަޖިސްޓަރ ކުރުމަށް ވެސް މަބްރޫކް ވަނީ އެދިވަޑައިގެންފައެވެ.
މިވަގުތާއި ހަމައަށް 73 މީހެއްގެ ސާމްޕަލް ނެގިފައިވާއިރު 65 ސާމްޕަލް ނެގެޓިވްވި ކަމަށާއި އަދި 2 ކޭހުގެ ނަތީޖާ ނުލިބިވާކަން މަބްރޫކް ފާހަގަކުރެއްވިއެވެ. ފަރުކޮޅުފުށީގައި މިވަގުތު އައިސޮލޭޝަންގައި 15 މީހުން ބެހެއްޓިފައިވާއިރު ވިލިވަރުގައި 9 މީހުން ކަރަންޓީން ކުރެވިފައިވެއެެވެ.
