ބާސާ އާއި ނާޕޮލީ ކުޅޭ މެޗަށް ސަޕޯޓަރުން ނުވައްދަން ނިންމައިފި

ޔޫރަޕުގައި ހަލުވިކަމާއިއެކު މިހާރު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ބާސެލޯނާ ދަނޑުގައި ނާޕޮލީއާ ދެކޮޅަށް ޔުއެފާ ޗެމްޕިއަންސް ލީގުގެ ގަދަ 16 ގައި ބައްދަލުކުރާ މެޗަށް ސަޕޯޓަރުން ނުވައްދާން ނިންމައިފިއެވެ.

ސްޕެއިންގެ ކެޓަލޯނިއާ ސަރުކާރުގެ ހެލްތު ޗީފް ޖޯން ގުއިސް ބުނީ މި ނިންމުން ކެޓަލޯނިއާގެ ސަރުކާރުން ނިންމީ އާންމުންގެ ސިއްހަތަށް ބެލުމުގެ ގޮތުން ކަމަށެވެ.

ބާސާ އަދި ނާޕޮލީގެ މެޗުގެ އިތުރުން ޔޫއެފާއިން ވަނީ ފްރާންސްގެ ޕީއެސްޖީ އަދި ޑޯޓުމުންޑް ބައްދަލުކުރާ މެޗަށް ވެސް ސަޕޯޓަރުންނާއި ނުލާ ކުޅުމަށް ނިންމައިފައެވެ. އަދި ސްޕެއިންގެ ގެޓާފޭ އާއި އިޓަލީގެ އިންޓަ މިލާން ޔޫރަޕާ ލީގުގައި ކުޅޭ މެޗު ވެސް ކުޅޭނީ ސަޕޯޓަރުންނާއި ނުލައެވެ.

ބާސާ އާއި ނާޕޮލީގެ މެޗަށް ސަޕޯޓަރުން ނުވައްދާން ނިންމީ އިޓަލީގައި މިހާރު ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ކަމަށް މީޑިއާ ރިޕޯޓްތައް ބުނެއެވެ.

ކޮރޯނާވައިރަސް (ކޮވިޑް-19) ގެ ސަބަބުން އިޓަލީގައި އެއްވެސް ކުޅިވަރު ހަރަކާތެއް ނުހިންގުމަށް އިޓަލީ ސަރުކާރުން ވަނީ ނިންމައިފައެވެ. އިޓަލީގައި ކުޅިވަރު ހަރަކާތްތައް ހުއްޓާލަން ނިންމިއިރު، މީގެ ކުރިންވެސް ވަނީ އިޓާލިއަން ލީގުގެ ބައެއް މެޗުތައް ފަސްކޮށްފައެވެ. އަދި ބައެއް މެޗުތައް ކުޅެފައިވަނީ ސަޕޯޓަރުން ނުވައްދައެވެ.

އިޓަލީގައި 9000 އަށް ވުރެ ގިނަ މީހުންނަށް މިހާތަނަށް މި ބަލި ޖެހިފައިވާއިރު، މި ބައްޔާ ގުޅިގެން އިޓަލީން ވަނީ 400 އަށް ވުރެ ގިނަ މީހުން މަރުވެފައެވެ.

ދުނިޔޭގެ ގިނަ ގައުމުތަކުން ކޮރޯނާ ވައިރަސް މިހާރު ފެނިފައިވާއިރު، ގިނަ ގައުމުތަކުން އަންނަނީ ސަލާމަތީ ފިޔަވަޅުތައް ވަރުގަދަ ކުރަމުންނެވެ. އެގޮތުން އިޓާލިއަން ލީގުގެ އިތުރަށް ފްރެންޗް ލީގުގެ ބައެއް މެޗުތައްވެސް މިހާރު އަންނަނީ ފަސް ކުރަމުންނެވެ. އަދި ޓޯކިޔޯގައި ބޭއްވުމަށް ހަމަޖެހިފައިވާ އޮލިމްޕިކް ގޭމްސް އާމެދު ސުވާލު އުފެދިފައިވާއިރު، މި އަހަރު ބާއްވަން ހަމަޖެހިފައިވާ ޔޫރޯ ފުޓްބޯޅަ މުބާރާތާއި މެދު ވެސް ވަނީ ސުވާލު އުފެދިފައެވެ.