ބާސްކެޓްބޯލް އެސޯސިއޭޝަން އޮފް މޯލްޑިވްސްއިން އިންތިޒާމްކޮށްގެން ބާއްވާ ފަސްވަނަ އިންޓަސްކޫލް ތްރީއޮންތްރީ ބާސްކެޓްބޯލް މުބާރާތް ފަސްކޮށްފިއެވެ.

ބާސްކެޓްބޯލް އެސޯސިއޭޝަނުން މައުލޫމާތު ދޭ ގޮތުގައި މި މަހުގެ 15 ވަނަ ދުވަހާ 16 ވަނަ ދުވަހު ބޭއްވުމަށް ހަމަޖެއްސި މި މުބާރާތް މޫސުން ގޯސްވުމުގެ ސަބަބަން މި މަހަގެ 21 އިން ފެށިގެން 23 ވަނަ ދުވަހާ ހަމަޔަށް ބޭއްވުމަށް ވަނީ ނިންމާފައެވެ. މޫސުން ލަފާކުރެވޭ ގޮތަށް ބެލުމަށްފަހު، އަދި ސްކޫލްތަކާ މަޝްވަރާ ކުރުމަށްފަހު އެކުވެނި އައުޓްޑޯ ކޯޓުގައި ބާއްވަން ހަމަޖެއްސި މުބާރާތް މިހާރު ބާއްވަން ހަމަޖެހިފައިވަނީ އިސްކަންދަރު ސްކޫލުގެ އިންޑޯ ބާސްކެޓް ކޯޓުގައެވެ.

މި މުބާރާތުގައި ނުވަ ސްކޫލަކުން ބައިވެރިފައިވާއިރު 14 އަހަރުން ދަށުގެ އަންހެން ކުދިންގެ އިވެންޓާ ފިރިހެން ކުދިންގެ އިވެންޓުގެ އިތުރުން 16 އަހަރުން ދަށުގެ އަންހެން ކުދިންގެ އިވެންޓް އަދި ފިރިހެން ކުދިންގެ އިވެންޓް ބާއްވާނެއެވެ.

މި މުބާރާތަކީ 2012 ވަނަ އަހަރުން ފެށިގެން ކޮންމެ އަހަރަކު އެއްފަހަރު ބާއްވަމުން އަންނަ މުބާރާތެކެވެ.