ފޭކް ޕާސްޕޯޓަކާއެކު ރޮނާލްޑީނިއޯ ހައްޔަރުކޮށްފި

ފޭކް ޕާސްޕޯޓަކުން ޕެރަގުއާއީއަށް އެތެރެވާން އުޅުމުން، ބްރެޒިލްގެ ކުރީގެ މަޝްހޫރު ފުޓުބޯޅަ ކުޅުންތެރިޔާ ރޮނާލްޑީނިއޯ ހައްޔަރު ކޮށްފިއެވެ.

މީޑިއާ ރިޕޯޓްތައް ބުނާ ގޮތުން ބްރެޒިލްގެ މަޝްހޫރު ފުޓުބޯޅަ ކުޅުންތެރިޔާ ރޮނާލްޑީނިއޯ ޕެރެގުއާއީގެ ފުލުހުން ހައްޔަރުކުރީ އެ ގައުމަށް ފޭކް ޑޮކިޔުމެންޓްތަކާއެކު އެތެރެވާން މަސައްކަތް ކުރުމުންނެވެ.

މިކަން ޕެރެގުއާއީގެ ޕްރޮސެކިއުޓަރގެ އޮފީހުން ވަނީ ކަށަވަރުކޮށްދީފައެވެ. ޕެރެގުއާއީގެ ޕްރޮސެކިއުޓަރގެ އޮފީހުން ބުނީ ރޮނާލްޑީނިއޯގެ އިތުރުން އޭނާގެ ބޭބެ ރޮބާޓޯ އަސީސީ ހައްޔަރުކުރެވިފައިވާ ކަމަށެވެ. ރޮނާލްޑީނިއޯ އާއި އޭނާގެ ބޭބެ ހައްޔަރުގައި ބަހައްޓައިގެން ތަހުގީގު ކުރިޔަށް ގެންދިޔުމަށް ޕެރެގުއާއީގެ ދަށު ކޯޓުން ނިންމައިފައިވާ ކަމަށް ވެސް ރިޕޯޓުތައް ބުނެއެވެ.

މިކަން ރޮނާލްޑީނިއޯގެ ވަކީލު ސާޖިއޯ ކުއިރޯޒް ވެސް ވަނީ ބޭރުގެ މީޑިއާތަކަށް ކަށަވަރުކޮށްދެއްވާފައެވެ. ބޭރުގެ މީޑިއާތަކަށް ދެއްވި ބަޔާނުގައި އޭނާ ވިދާޅުވީ ރޮނާލްޑީނިއޯ އާއި އޭނާގެ ބޭބެ ހައްޔަރުކޮށްފައިވާ ކަމަށާއި، ރޮނާލްޑީނިއޯ ހައްޔަރުކުރީ ފޭކް ޕާސްޕޯޓެއް ބޭނުން ކޮށްގެން ޕެރެގުއާއީ އަށް އެތެރެވުމަށް އުޅުނު މައްސަލައިގައި ކަމަށެވެ. އަދި ރޮނާލްޑީނިއޯ އާއި އޭނާގެ ބޭބެގެ މައްސަލަ ގާތުން ބަލަމުން އަންނަ ކަމަށް ވެސް ސާޖިއޯ ވިދާޅުވިއެވެ.

ރޮނާލްޑީނިއޯ އަކީ ބްރެޒިލް އިން 2002 ވަނަ އަހަރު ވޯލްޑް ކަޕް ތަށި އުފުލާލިއިރު އޭރުގެ ގައުމީ ޓީމުގައި މުހިންމު ދައުރެއް އަދާކުރި ކުޅުންތެރިޔެކެވެ. އަދި ވޯލްޑްކަޕްގެ އެންމެ މޮޅު ކުޅުންތެރިޔާގެ މަގާމު އޭނާ ވަނީ ދެ ފަހަރު ހޯދައިފައެވެ. މީގެ އިތުރުން ރޮނާލްޑީނިއޯ ވަނީ ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާގެ މަގާމު ވެސް ހޯދާފައެވެ.