ސްޕެއިންގެ ރެއާލް މެޑްރިޑަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަށް ވުރެ ބާސެލޯނާއަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީ މޮޅު ކަމަށް ބްރެޒިލްގެ ފުޓްބޯޅަ ލެޖެންޑް ރޮނާލްޑީނިއޯ ބުނެފިއެވެ.

ޒުވާން ކުޅުންތެރިއެއްގެ ގޮތުގައި މެސީ ދުނިޔެއަށް ތައާރަފްވަމުން އައި ދަނޑިވަޅުގައި ރޮނާލްޑީނިއޯ ދިޔައީ ބާސެލޯނާއާ އެކު ދުނިޔޭގެ ފުޓްބޯޅައިގެ ރަސްކަން ކުރަމުންނެވެ. ފުޓްބޯޅައިގައި މެސީއަށް އެތަކެއް ކުރިއެރުންތަކެއް ހޯދައިދިން ރޮނާލްޑީނިއޯއަކީ މެސީގެ ފުރަތަމަ ލަނޑުޖެހުމަށް އެހީތެރިވި ކުޅުންތެރިޔާ ވެސް މެއެވެ. މި ދެ ކުޅުންތެރިން އެކުގައި ބާސެލޯނާއަށް ބޮޑު ކާމިޔާބުތަކެއް ހޯދައިދިންއިރު ޕެޕް ގާޑިއޯލާ ބާސާގެ ކޯޗުކަމާ ހަވާލުވުމަށް ފަހު ރޮނާލްޑީނިއޯ އެ ޓީމު ދޫކޮށް އިޓަލީގެ އޭސީ މިލާނަށް ބަދަލުވިއެވެ.

މެލޭޝިއާ އަށް މިހާރު ކުރަމުންދާ ދަތުރުގައި ނޫސްވެރިންނާ ވާހަކަ ދައްކަމުން ރޮނާލްޑީނިއޯ ބުނީ މެސީއާ އެއް ޓީމެއްގައި އޭނާއާ އެކު ކުޅުމަށް އަދިވެސް ބޭނުންވާ ކަމަށެވެ. ރޮނާލްޑީނިއޯ ބުނީ މެސީއާ އެކު ކުޅުމަށް އޭނާ ބޭނުންވި ވަގުތު އޭރު ނުލިބުނު ކަމަށާއި އޭރު މެސީއަކީ ޒުވާން ކުޅުންތެރިޔަކަށް ވުމާ އެކު އޭނާއަށް އޭރު ޓީމުން މާ ގިނަ ފުރުސަތުތަކެއް ނުލިބޭ ކަމަށެވެ. އެހެންކަމުން އަނެއްކާ ވެސް އެއް ދަނޑެއްގައި މެސީއާ އެކު ކުޅުމަކީ ވަރަށް ބޭނުންވާ ކަމެއް ކަމަށް ރޮނާލްޑީނިއޯ ބުނެފައި ވެއެވެ. އޭނާ ބުނީ މެސީ އަދި ރޮނާލްޑޯގެ ތެރެއިން އޭނާއަށް އަބަދުވެސް ބުނެވޭނީ މެސީއަކީ މޮޅު ކުޅުންތެރިޔާ ކަމަށެވެ.

ޔޫރަޕްގައި ރޮނާލްޑީނިއޯ ވިދާލީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އާއެކުއެވެ. މިދިޔަ ހޫނު މޫސުމުގެ ޓްރާންސްފާގައި އެ ޓީމުން ދުނިޔޭގެ ޓްރާންސްފާގެ ރެކޯޑު މުގުރާލީ ބާސާއަށް ކުޅެމުންދިޔަ ބްރެޒިލްގެ ތަރި ނޭމާ ގެނައުމަށެވެ. ނޭމާ އެ ޓީމަށް ގެނައީ ޗެމްޕިއަންސް ލީގު ހޯދުމުގެ އުއްމީދުގައެވެ. އެހެން ނަމަވެސް ރެއާލް މެޑްރިޑް އަތުން ބަލިވެ ޕީއެސްޖީ ވަނީ ޗެމްޕިއަންސް ލީގުން ކަޓާފައެވެ. އެކަމާ ގުޅޭ ގޮތުން ވާހަކަ ދައްކަމުން ރޮނާލްޑީނިއޯ ބުނީ މޮޅު ކުޅުންތެރިން ޓީމަށް ގެނައި ނަމަވެސް ތަށި ހޯދާނެ ޓީމެއް ބިނާކުރުމަށް ވަގުތު ނަގާނެ ކަމަށެވެ. އެގޮތުން ކުރިޔަށް އޮތް އަހަރުތަކުގައި ޕީއެސްޖީ ޗެމްޕިއަންސް ލީގު ނަގާނެ ކަމަށް ގަބޫލުކުރެވޭ ކަމަށް ރޮނާލްޑީނިއޯ ބުނެފައިވެއެވެ. ރޮނާލްޑީނިއޯއަށް ޗެމްޕިއަންސް ލީގު ކާމިޔާބުކުރެވުނީ 2006 ވަނަ އަހަރު ބާސެލޯނާއާ އެކުއެވެ.

ރޮނާލްޑީނިއޯގެ ކެރިއަރުގައި ޔޫރަޕު އަދި ދެކުނު އެމެރިކާގެ އެންމެ ބޮޑު ޓީމުތަކުގައި ކާމިޔާބު ގިނަ ސީޒަންތަކެއް ހޭދަކުރިއެވެ. ހަމައެހެންމެ ބްރެޒިލްގެ ގައުމީ ޓީމާއެކު ވެސް އޭނާ ވަނީ ވޯލްޑް ކަޕެއްގެ އިތުރުން ކޮޕާ އެމެރިކާއެއް ވެސް ކާމިޔާބުކޮށްފައެވެ. އޭނާ ބުނީ ކުޅުން ހުއްޓާލެވުނު ގޮތާ މެދު އެއްވެސް ވަރަކަށް ދެރަނުވާ ކަމަށާއި އޭނާ ކުޅުން ހުއްޓާލީ އެތަކެއް ޓްރޮފީތަކެއް ހޯދުމަށް ފަހު ކަމަށެވެ. އޭނާ ބުނީ ޓީމުތަކާ އެކު އަދި އަމިއްލަ ނަފްސަށް ކަނޑައެޅި ޓާގެޓުތައް ހާސިލްވި ކަމަށާއި އެހެންކަމުން ކުޅުން ހުއްޓާލެވުނީ ވަރަށް ހިތްހަމަޖެހިގެން ކަމަށެވެ.

ރޮނާލްޑޯއަށް ވުރެ މެސީ މޮޅު ކަމަށް ބުނެފައިވާއިރު ވޭތުވެދިޔަ 10 އަހަރު ތެރޭ އެންމެ މޮޅު ކުޅުންތެރިޔާގެ އެވޯޑު ހޯދާފައި ވަނީ މި ދެ ކުޅުންތެރިންގެ ތެރެއިން ކޮންމެވެސް އެއް ކުޅުންތެރިޔެކެވެ. ރޮނާލްޑޯ އަދި މެސީ ވެސް ވަނީ ދުނިޔޭގެ އެންމެ މޮޅު ކުޅުންތެރިޔާގެ އެވޯޑު ފަސް ފަހަރު ހޯދާފައެވެ. ރޮނާލްޑީނިއޯގެ ކެރިއަރުގައި އޭނާއަކީ ވެސް ދުނިޔޭގެ އެންމެ މޮޅު ކުޅުންތެރިޔާގެ އެވޯޑު ދެ ފަހަރެއްގެ މަތިން ހާސިލުކުރި ކުޅުންތެރިޔެކެވެ.