މިއަށްވުރެ ފުރިހަމައަށް އެމްޑީޕީ ސަރުކާރެއް މިހާތަނަށް ހިނގާފައެއް ނެތް: ރައީސް ނަޝީދު
7 މާރިޗު 2020 | ހޮނިހިރު 08:30ށްރަށަށް ވަޑައިގެން ރައްޔިތުންގެ ކަންބޮޑުވުންތައް ވަރަށް ގާތުން ބަލަމުން ދަން
\"ރަށްވެހި ފެސްޓިވަލް\" ފެށުމުގެ ރަސްމިއްޔާތުގައި ރައީސް ނަޝީދު ވާހަކަ ދައްކަވަނީ
ރައްޔިތުންނަށް ވެފައިވާ ވައުދުތައް ފުއްދުމަށްޓަކައި ސަރުކާރުންނާއި ވަޒީރުން ވަރަށް ބޮޑަށް މަސައްކަތް ކުރަމުންދާކަމަށާއި އެކަންތައް ރައްޔިތުންނަށް ވަރަށް ގާތުން ފެންނާނެކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ އަންހެނުންގެ ރޫހުގެ ފަރާތުން ހޮނިހިރު ދުވަހު ފަށާފައިވާ "ރަށްވެހި ފެސްޓިވަލް" ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ރާއްޖެ ބަދަލުކޮށް އިސްލާހު ކުރާނީވެސް އެމްޑީޕީންކަމަށާއި ވެރިކަން ބަދަލުވުމާއެކު ގިނަ ކަންތައްތަކެއް ރައްޔިތުންނަށް ސާބިތުވެފައިވާކަމަށެވެ.
އެގޮތުން ތައުލީމީ ނަޒަރިއްޔާއިން ބަލާލިކަމުގައިވިޔަސް އަދި ރައްޔިތުނަށް އިޖްތިމާއީ ރައްކާތެރިކަން ކަށަވަރުކުރުމަށް އެމްޑީޕީގެ ސަރުކާރުން ގިނަ މަސައްކަތްތަކެއް ކޮށް ހާލަތު ބޮޑުތަނުން ބަދަލުކޮށްފައިވާކަމަށް ވަނީ ފާހަގަކުރައްވާފައެވެ. ރަސްމިއްޔާތުގައި އިތުރަށް ވާހަކަ ދައްކަވަމުން ރައީސް ނަޝީދު ވިދާޅުވީ، މިއަށްވުރެން ފުރިހަމަ އެމްޑީޕީގެ ސަރުކާރެއް މިހާތަނަށް ހިނގާފައިނެތްކަމަށެވެ.
ރައީސް ނަޝިދު ވިދާޅުވީ އެޕްރީލް 4 ގައި އޮންނަ ލޯކަލް ކައުންސިލް އިންތިހާބް އެމްޑިޕީން ކާމިޔާބުކުރާނީ ރައީސް ސޯލިހު ރައްޔިތުންނަށް ވެފައިވާ ވައުދުތައް ފުރިހަމައަށް ފުއްދަމުން ރައްޔިތުންނަށް އެނގެމުން ދާތީކަމަށާއި ރަށްރަށަށް ވަޑައިގެން ރައްޔިތުންގެ ކަންބޮޑުވުންތައް ވަރަށް ގާތުން ބަލަމުން ދާކަމަށެވެ. ރައީސް ނަޝީދު ވިދާޅުވީ އެމްޑީޕީން ވި ވައުދުތައް ފުއްދުމަށްޓަކައި އިންތިހާއަށް މަސައްކަތް ކުރަމުން ދާކަމަށާއި ނިކުމެ ބޮޑަށް ހިންދެމިލައި އިސްސަފުގައި ތިބެން ވެއްޖެކަމަށެވެ.
ރައީސް ނަޝީދު ވިދާޅުވީ ކުރީ ސަރުކާރުތަކުން ނިގުޅައިގަނެވިފައިވާ ބާރުތައް ކައުންސިލްތަކަށް އަނބުރައި ހޯދައިދީފައިވާ ކަމަށާއި މިއަދު ރައްޔިތުން ނިކުމެ ތިބީ 33 އިންސައްތަ އަންހެނުންގެ ބައިވެރިކަމާއެކު ރަށްވެރިކަން ކޮށް ރަަށަށް ތަރައްގީކުރުމަށް ނިންމައި އެ މަސައްކަތް ކާމިޔާބުކުރުމަށްކަމަށެވެ. އަދި އެކަން ތަނަވަސް އަޢުލަބިއްޔަތަކުން ކާމިޔާބުކުރާނެކަމަށް ރައީސް ނަޝީދު ވަނީ ވިދާޅުވެފައެވެ.
