ކޮވިޑް-19: އެމެރިކާގެ މަޝްހޫރު މިއުޒިކް ފެސިޓިވަލެއް 34 އަހަރުތެރޭ ފުރަތަމަ ފަހަރަށް ކެންސަލްކޮށްފި
7 މާރިޗު 2020 | ހޮނިހިރު 03:24އިވެންޓް ކެންސަލްކޮށްފައިވަނީ ކޮވިޑް-19 ގެ ބިރުވެރިކަން ބޮޑުވެފައިވާތީ
ކޮވިޑް-19 ދުނިޔޭގެ އެކި ޤައުމުތަކުގައި ދަނީ ފެތުރެމުން
ދުނިޔޭގެ އެކި ކަންކޮޅުތަކުގައި ހަލުވިކަމާއެކު ފެތުރެމުންދާ ނޮވެލްކޮރޯނާވައިރަސް (ކޮވިޑް-19) އާ ގުޅިގެން އެމެރިކާގެ މަޝްހޫރު މިއުޒިކް ފެސްޓިވަލެއްކަމަށްވާ "ސައުތް ބައި ސައުތް ވެސްޓް" ކެންސަލްކޮށްފިއެވެ.
މާރޗު މަހު ބޭއްވުމަށް ހަމަޖެހިފައިވާ މި އިވެންޓް އިންތިޒާމްކުރާ ފަރާތްތަކާ ހަވާލާދީ ބީބީސީގައި ރިޕޯޓްކޮށްފައިވާ ގޮތުން މިއީ ފާއިތުވި 34 އަހަރުތެރޭ މި އިވެންޓް ކެންސަލްކުރި ފުރަތަމަ ފަހަރެވެ. އެގޮތުން އިވެންޓް ކެންސަލްކޮށްފައިވަނީ ކޮވިޑް-19 ގެ ބިރުވެރިކަން ބޮޑުވެ، އިވެންޓް ބޭއްވުމަށް ހަމަޖެހިފައިވާ ޓެކްސަސްގެ ވެރިރަށް އޮސްޓިންގައިވެސް އާންމު ކާރިސާގެ ޙާލަތު އިއުލާނު ކޮށްފައިވާތީއެވެ.
މި އިވެންޓް ކެންސަލްކޮށްފައިވަނީ އޮސްޓިންގެ މޭޔަރ ސްޓީވް އެޑްލަރގެ އޯޑަރަކަށެވެ. މޭޔަރުގެ މި ނިންމެވުމުގެ ކުރިންވެސް މި އިވެންޓްގައި ބައިވެރިވުމަށް ހަމަޖެހިފައިވާ ބޮޑެތި ކުންފުނިތައް އިވެންޓުގައި ބައިވެރި ނުވުމަށް ނިންމާފައިވާއިރު، އޭގެ ތެރޭގައި އެޕަލް، އެމެޒޯން، ޓްވިޓަރ އަދި ފޭސްބުކް ހިމެނެއެވެ.
ކޮންމެ އަހަރަކުވެސް ބާއްވާ މި އިވެންޓަކީ ޓެކްނޮލޮޖީއާއި، މިއުޒިކް ދާއިރާގެ ގިނަ ފަރާތްތައް ބައިވެރިވެގެން ކުރިއަށްދާ އިވެންޓެކެވެ. އެގޮތުން ފާއިތުވި އަހަރުވެސް މި އިވެންޓުގައި 74،000 އަށްވުރެ ގިނަ މީހުން ބައިވެރިވެފައިވާއިރު، އޭގެ ތެރެއިން 19،000 އަށްވުރެ ގިނަ މީހުންނަކީ އެމެރިކާއިން ބޭރުން އައި މީހުންނެވެ.
އެމެރިކާގެ އެކި ހިސާބުތަކުން ކޮވިޑް 19ގެ އަސަރު 200 އަށްވުރެ ގިނަ މީހުންނަށް ކޮށްފައިވާއިރު، 14 މީހަކު މި ވައިރަސްގައި މަރުވެފައިވެއެވެ.
