ދެވަނަ ޑިވިޝަން ފުޓުބޯޅަ މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދި އާދަމް ނިޒާމް (ކިތުނަ) މާޒިޔާ ސްޕޯޓްސް އެންޑް ރެކްރިއޭޝަނަށް ބަދަލުވެއްޖެ އެވެ.

ރާއްޖެ ޓީވީ ސްޕޯޓްސް އަށް މައުލޫމާތު ދެމުން މާޒިޔާ ޓީމުގެ އޮފިޝަލަކު ބުނީ ،ކިތުނަ އާއި އެކު މަޒިޔާއިން އެއްބަސްވުމަކަށް އާދެވިފައިވާ ކަމަށާއި، އަންގާރަ ދުވަހުން ފެށިގެން ކިތުނަ މާޒިޔާ ޓީމުގެ ފަރިތަކުރުން ތަކުގައި ބައިވެރިވާނެ ކަމަށެވެ. މާޒިޔާއިން ބުނީ ކިތުނަ އޭއެފްސީ ކަޕުގައި މާޒިޔާ ޓީމަށް ކުޅޭނެ ކަމަށެވެ.

ކިތުނަ ވަނީ އޭނާ މަސައްކަތްކުރާ ރިސޯޓުން ރިލީޒް ލިބުމާއެކު ގައުމީ ޓީމުގެ ފަރިތަކުރުންތަކުގައި ވެސް ބައިވެރިވާން ފަށައިފައެވެ. މިއީ ކިތުނަ ގައުމީ ސްކޮޑުގައި ހިމެނުނު ފުރަތަމަ ފަހަރުވެސް މެއެވެ. މީގެ ކުރިން ކިތުނަ ވަނީ 19 އަހަރުން ދަށުގެ ގައުމީ ސްކޮޑުން ޖާގަ ހޯދާފައެވެ.

ދެވަނަ ޑިވިޝަނުގައި މޮޅު ކުޅުމެއް ދެއްކި ކިތުނައަށް ގައުމީ ސްކޮޑުން ޖާގައެއް ދިން އެއް ސަބަބަކީ މާޒިޔާ އަށް ކުޅެމުން އަންނަ ތަޖުރިބާކާރު ފޯވަރޑް އަސަދުﷲ އަބްދުﷲ އަށް އަނިޔާވެ، ކުޅުމާއި ދުރަށް ދާން ޖެހުމުންނެވެ. އަސަދުﷲ އަށް އަނިޔާވީ އޭއެފްސީ ކަޕް ޕްލެއި އޯފްގައި މާޒިޔާ އަދި ބެންގަލޫރު އެފްސީ މާލޭގައި ބައްދަލުކުރި މެޗުގެ ތެރެއިންނެވެ.

މިއަހަރުގެ އޭއެފްސީ ކަޕުގެ ގްރޫޕް ސްޓޭޖުން މާޒިޔާ ވަނީ ޖާގަ ހޯދާފައެވެ. ގްރޫޕު ސްޓޭޖްގެ ޖާގައެއް މާޒިޔާ އަށް ލިބުނީ ޕްލެއި އޯފްގައި ބެންގަލޫރު އެފްސީ ބަލިކުރުމަށް ފަހުގައެވެ.

ގްރޫޕު ސްޓޭޖުގައި މާޒިޔާ ވާދަކުރަން ޖެހޭނީ ގްރޫޕު އީ ގައެވެ. އެ ގްރޫޕުގައި ހިމެނެނީ ރާއްޖޭގެ ޓީސީ ސްޕޯޓްސް ކްލަބުގެ އިތުރުން، އިންޑިއާގެ އައި ލީގުގެ ޗެމްޕިއަން ޗެންނާއީ ސިޓީ އާއި ބަންގްލަދޭޝްގެ ބަޝުންދަރާ ކިންގްސް އެވެ.