ކުލި ކޮންޓްރޯލްކުރަން ގޮވާލާ ޕެޓިޝަން މަޖިލީހަށް ހުށައަޅައިފި
800 މީހުން ވަނީ ޕެޓިޝަންގައި ސޮއިކޮށްފައި
ވެރިރަށް މާލޭގެ މަތިން ނަގާފައިވާ މަންޒަރެއް
800 އަށް ވުރެ ގިނަ މީހުންގެ ސޮއާއެކު މާލޭގެ ކުލި ކޮންޓްރޯލު ކުރުމަށް ގޮވާލާ ގަރާރެއް ރައްޔިތުންގެ މަޖިލީހަށް ހުށައަޅައިފިއެވެ.
އެ ޕެޓިޝަނަކީ މާލޭގައި ކުއްޔަށް ދިރިއުޅޭ މީހުންނަށް ހާއްސަކޮށް އުފެއްދުމަށް މަސައްކަތްކުރި މާލޭ ޓެނަންޓްސް ޔޫނިއަން (އެމްޓީޔޫ) އިން އިސްނަގައިގެން މަސައްކަތް ކުރި ޕެޓިޝަނެކެވެ. މި ޕެޓިޝަންގައި މަޖިލީސް މެމްބަރެއްގެ ގޮތުގައި ސޮއިކުރެއްވީ ކެންދޫ ދާއިރާގެ މެމްބަރު އަލީ ހުސައިންއެވެ. އެމްޓީޔޫ އިން ބުނީ، ޕެޓިޝަންގައި ސޮއެކުރުމުގެ މަސައްކަތް ކުރިޔަށް ގެންގޮސްފައިވަނީ އެ ޔޫނިއަނުން ރާވައިގެން ކޮންމެ ހަފްތާގެ ބަންދެއްގައެވެ.
މަޖީލިހަށް ހުށައެޅި ޕެޓިޝަންގައި ކުލީގެ މައްސަަލަ އަށް އެކަށީގެންވާ ގޮތުގެ މަތިން ފިޔަވަޅު އަޅައި ހައްލު ކުރުމަށް މަޖިލީހުންނާއި ސަރުކާރުން މަސައްކަތް ނުކުރާކަން ފާހަގަކުރުމާއި އެކު މައްސަލަ އަކީ މަޖިލީހުންނާއި ސަރުކާރުން ވަގުތުން ވަގުތަށްވެސް ސީރިޔަސް މައްސަލައެއް ކަމަށް ފާހަގަކޮށްފައިވެއެވެ.
މާލޭ ޓެނަންޓްސް ޔޫނިއަންއަކީ ރަޖިސްޓްރީ ކޮށްގެން ހިންގާ ކުލިދައްކާ މީހުންގެ ޔޫނިއަން އެކެވެ. މިއީ މާލޭގައި ކުއްޔަށް ދިރިއުޅެމުން އަންނަ މީހުންގެ ވޭނާއި ތުރާތަށް ހިއްސާކުރުމަށާއި، އަދި ކުއްޔަށް ދިރިއުޅެ މީހުންގެ އަޑަށް ރަސްމީ ސިފައެއް ދިނުމުގެ ގޮތުން އުފެދިފައިވާ ޖަމިއްޔާއެކެވެ.
