ހިޔާނާތުގެ ބައިވެރިން ދުނިޔޭގެ ކޮންމެ ތަނެއްގައި ތިއްބަސް އިންސާފުގެ ކުރިމައްޗަށް ގެންނާނަން: އިންތި

ރާއްޖޭގައި ހިންގާފައިވާ ޚިޔާނާތްތަކުގައި ބައިވެރިވި މީހުން ދުނިޔޭގެ ކޮންމެ ތަނެއްގައި ތިބި ނަމަވެސް އިންސާފުގެ ކުރިމައްޗަށް ގެންނާނެ ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.

އާދިއްތަ ދުވަހުގެރޭ ރާއްޖެޓީވީގެ "ފަލަސުރުޚީ" ޕްރޮގުރާމުގައި ވާހަކަދައްކަވަމުން އިންތި ވިދާޅުވީ، ކޮރަޕްޝަނުގެ ތުހުމަތު ކުރެވޭ ފަރާތްތައް އިންސާފުގެ ކުރިމައްޗަށް ގެނައުން ލަސްވެގެން ދިއުމަކީ ވަރަށް ގިނަ ބައެއްގެ ކަންބޮޑުވުމެއް ކަމަށާއި، އެ ފަރާތްތަކުގެ މައްޗަށް ހަލުވި މިނެއްގައި ތަހުޤީޤު ހިންގަންޖެހޭނެ ކަމަށެވެ. ނަމަވެސް އެފަދަ ފަރާތްތަކަށް ފިލައިގެން ދިއުމުގެ ޖާގައެއް ނޯންނާނެ ކަމަށާއި، ކޮންމެ ތަނެއްގައި ތިއްބަސް ޤާނޫނު އައިސް ހަމަކުރާނެކަމުގެ ޔަޤީންކަން އޮތްކަމަށް އިންތި ވިދާޅުވިއެވެ.

އެގޮތުން ސިޔާސީ ވެރިކަން ވެއްޓުމާއެކު ބޮޑެތި ތުހުމަތުތައް ކުރެވޭ ވަރަށް ގިނަ ފަރާތްތައް ސިޔާސީ މައިދާނުން ގެއްލިގެން ދިޔަކަން ފާހަގަކުރައްވައި އިންތި ވިދާޅުވީ، އެ ފަރާތްތަކުގެ މައްޗަށްވެސް ތަހުޤީޤުތައް ހިންގޭނެ ކަމަށާއި، ތަހުޤީޤުތައް ނުހިންގިއްޖެ ނަމަ ރައްޔިތުން މި ސަރުކާރަށް ކުރާ އިތުބާރު ގެއްލޭނެ ކަމަށެވެ.

އިންތި އިތުރަށް ވިދާޅުވީ، ކުރިއަށް އޮތް ލޯކަލް ކައުންސިލް އިންތިޚާބަށް ތައްޔާރުވުމުގެ ގޮތުން އެމްޑީޕީން ގިނަ ޙަރަކާތްތަކެއް ރާވާފައިވާ ކަމަށާއި، ލާމަރުކަޒީ ޤާނޫނުގައި ބުނާ ކަންކަން ތަންފީޒުކޮށްދޭނީ އެމްޑީޕީން ކަމަށެވެ. އެގޮތުން އިނދިކޮޅު ފަރާތްތަކަކީ ލާމަރުކަޒީ ނިޒާމު ޤަބޫލުނުކުރާ ބައެއްކަން މާޒީގައި ހާމަވެފައިވާކަން ފާހަގަކުރައްވައި އިންތި ވިދާޅުވީ، ލާމަރުކަޒު ކުރުމުގެ ތަޞައްވަރު އޮތް ޕާޓީއަށް އިންތިޚާބު ކާމިޔާބުކޮށްދިނުން އެދޭ ކަމަށެވެ.