ދުނިޔޭގެ އެކި ކަންކޮޅުތަކުގައި ހަލުވިކަމާއެކު ފެތުރެމުންދާ ނޮވެލް ކޮރޯނާވައިރަސް (ކޮވިޑް-19) އާ ގުޅިގެން ރިޕަބްލިކް އޮފް އަޔަރލެންޑްގެ ސުކޫލެއް 14 ދުވަހަށް ބަންދުކުރަން އެ ޤައުމުގެ ސަރުކާރުން ނިންމައިފިއެވެ.

އަޔަރލެންޑްގެ ނޭޝަނަލް ޕަބްލިކް ހެލްތް އެމަރޖެންސީ ޓީމާ ހަވާލާދީ ބައިނަލްއަޤުވާމީ މީޑިއާތައް ބުނާގޮތުން އަޔަރލެންޑްގެ އިރުމަތީ ސަރަޙައްދެއްގެ މީހަކު ހޮނިހިރު ދުވަހު ކޮވިޑް-19 އަށް ޕޮޒިޓިވް ވެފައިވާއިރު، އޭނާއަކީ ސުކޫލުގެ ދަރިވަރުންނާ ޓީޗަރުންނާ ބައްދަލުކުރާ އަދި "ކްލޯސް ކޮންޓެކްޓް" ގިންތީގައި ހިމެނޭ މީހެކެވެ.

އޭގެ އިތުރުން، ބުރާސްފަތި ދުވަހު އިރުމަތީ އަޔަރލެންޑްއިން އަންހެނަކު ކޮވިޑް-19 އަށް ޕޮޒިޓިވްވެފައިވާއިރު، މި ދެމީހުންނަކީވެސް އިޓަލީއިން މިވައިރަސްގެ ކޭސްތައް ފެނިފައިވާ ސަރަޙައްދަކުން އެނބުރި އައި ދެ މީހުންކަމަށް ބީބީސީގައި ރިޕޯޓްކޮށްފައިވެއެވެ.

އަޔަރލެންޑް ގެ ޗީފް މެޑިކަލް އޮފިސަރ ޑރ ޓޯނީ ހޮލޮއަންއާ ހަވާލާދީ ބީބީސީގައި ރިޕޯޓްކޮށްފައިވަނީ ވައިރަސްއާ ގުޅިގެން އަޅަންޖެހޭ މުހިއްމު ފިޔަވަޅުތައް އަޅާނެ ކަމަށާއި، ހާމަ ކުރަންޖެހޭ ތަފްސީލުތައް ހާމަކުރައްވާނެ ކަމަށެވެ. އަދި ވައިރަސްގެ ނުރައްކާ އޮތުމާއެކު ރިޕަބްލިކް އޮފް އަޔަރލެންޑް ގެ މި ސުކޫލު ބަންދުކޮށްފައިވަނީ ހަދަންޖެހޭ ރިސްކް އެސެސްމަންޓްތައްވެސް ހެދުމަށް ފަހުކަމަށް ރިޕޯޓްތައް ބުނެއެވެ.

އޭގެ އިތުރުން، އަޔަރލެންޑްގެ ޑިޕާޓްމަންޓް އޮފް ފޮރިން އެފެއާޒްއިން ވަނީ އިޓަލީގެ ސަރަޙައްދުތަކަށް މި ދުވަސްވަރު ދަތުރު ނުކުރުމަށްވެސް އިލްތިމާސްކޮށްފައެވެ.