ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް ޖެހިގެން އެމެރިކާގައި ފުރަތަމަ މީހާ މަރުވުމާއެކު ވޮޝިންގޓަންގައި ކުއްލި ޙާލަތުގެ ޢަމަރު އިޢުލާންކޮށްފި އެވެ.

އެމެރިކާގެ އޮފިޝަލުން ބުނާގޮތުގައި މަރުވި މީހާއަކީ އުމުރުން 50 އަހަރުތައް ގުނަމުންދާ ފިރިހެނެކެވެ. އަދި އެމީހާއަކީ ޞިއްޙީ ގޮތުން އެކި މައްސަލަތައް ދިމާވެފައިވާ މީހެއްކަމަށް އެމެރިކާއިން ބުނެއެވެ. މި މީހާ މަރުވެފައިވަނީ ވޮޝިންގޓަންގެ ހުޅަނގު އުތުރު ސްޓޭޓެއް ކަމަށްވާ ކިންގ ކައުންޓީނެވެ. މި މީހާއަކީ މިވައިރަސް ފެތުރެމުންދާ އެއްވެސް ޤައުމަކަށް އަދި އެފަދަ ހިސާބަކަށްވެސް ދަތުރުކޮށްފައި ނުވާ މީހެއްކަމަށް އެމެރިކާގެ ލޯކަލް ހެލްތު އޮފިޝަލުން ބުނެއެވެ.

މި މީހާ މަރުވުމާއެކު އެމެރިކާގެ ރައީސް ޑޮނަލްޑް ޓްރަމްޕް ވަނީ ނޫސްވެރިންގެ ބައްދަލުވުމެއް ބާއްވާފަ އެވެ. އަދި އިތުރު މީހުންނަށް މި ވައިރަސް ޖެހުމުގެ ފުރުޞަތު ބޮޑުކަމަށް ޓްރަމްޕް ވަނީ ވިދާޅުވެފަ އެވެ. މީގެއިތުރުން ނޫސްވެރިންގެ ބައްދަލުވުމުގައި ވައިރަސް ޖެހިގެން މަރުވެފައިވަނީ އަންހެނެއްކަމަށް ޓްރަމްޕް ވިދާޅުވުމުން ފަހުން އެމެރިކާގެ ހެލްތު އޮފިޝަލުން ބުނެފައިވަނީ މަރުވެފައިވަނީ ފިރިހެނެއް ކަމަށެވެ.

މި މީހާ މަރުވުމާއެކު ވޮޝިންގޓަންގެ ގަވަރުނަރ ޖޭ އިންސްލީ ވަނީ ވޮޝިންގޓަން އިން އިތުރު މީހުންނަށް މިވައިރަސް ޖެހިދާނެތީ ކުއްލި ޙާލަތުގެ އަމުރު އިޢުލާންކޮށްފަ އެވެ. ކުއްލި ޙާލަތުގެ އަމުރު އިޢުލާން ކޮށްފައި މިވަނީ އެމެރިކާގެ ކެލިފޯނިއާ، އޮރެގަން އަދި ވޮޝިންގޓަންގެ އޮފިޝަލުން މިވައިރަސް ފެތުރިފައިވާ ތަންތަނަށް ނުދާ މީހުންގެ ފުށުން ވައިރަސް ފެންނަމުންދާތީ އެކަމުގެ ކަންބޮޑުވުން ފާޅުކޮށްފައި ވަނިކޮށެވެ.

ހޮނިހިރު ދުވަހު ވޮޝިންގޓަންގެ އޮފިޝަލުން ބުނެފައިވަނީ ލޯކަލް ނަރސިންގ ހޯމް އަކުން ކޮރޯނާވައިރަސް ފެތުރެމުގެ ފުރުޞަތު އޮތްކަމަށް ފެންނާތީ އެކަން ބަލަމުންދާކަމަށެވެ. މީގެއިތުރުން އެމެރިކާއިން ވަނީ އިތުރު ޤައުމުތަކައް، އެޤައުމުގެ ރައްޔިތުން ދަތުރުކުރުން މަނާކޮށްފަ އެވެ. އޮފިޝަލުން ބުނާގޮތުން އިރާނާއި އިޓަލީ އަދި ސައުތު ކޮރެއާއަށް އެމެރިކާގެ ރައްޔިތުން ދަތުރުކުރުމަކީ މަނާކަމެކެވެ. މިހާތަނަށް އާއިރު ދުނިޔޭގެ 57 ޤައުމަކުން 85،000 މީހުންނަށްވުރެ ގިނަ މީހުންނަށް މިވައިރަސް ވަނީ ޖެހިފައެވެ.

މިހާތަނަށް އެމެރިކާއިން މިވައިރަސް 62 މީހުންނަށް ޖެހިފައިވެ އެވެ. އަދި އެކަކު އެމެރިކާގައި މަރުވެފައިވާއިރު، މީގެކުރިން ވުހާންއިންވެސް ވަނީ އެމެރިކާ މީހަކު މި ވައިރަސް ޖެހިގެން މަރުވެފައެވެ.

އެމެރިކާގެ ރައީސް ޓްރަމްޕް ވިދާޅުވެފައިވަނީ އެ ޤައުމު ވަނީ މިވައިރަސް އަށް ތައްޔާރުވެފައި ކަމަށެވެ. އަދި ވައިރަސް ޖެހިގެން މީހަކު މަރުވެފައި ވީނަމަވެސް އަދި އެ ޤައުމުގެ ރައްޔިތުން ހާސްވެ ކަންބޮޑުނުވުމަށް ޓްރަމްޕްވަނީ އެދިވަޑައިގަންނަވާފަ އެވެ.