ފުލުގައި އޮތް ނޯވިޗުން ލެސްޓާ ބަލިކޮށްފި

އިނގިރޭސި ޕްރިމިއަރ ލީގުގެ ތާވަލުގެ ފުލުގައި އޮތް ނޯވިޗް ސިޓީން ތިންވަނައިގައި އޮތް ލެސްޓާ ސިޓީ ބަލިކޮށްފިއެވެ.

ހުކުރު ދުވަހުގެރޭ ކުޅުނު މެޗުން ލެސްޓަރގެ މައްޗަށް ނޯވިޗް ކުރިހޯދީ 1-0 އިންނެވެ.

ރޭގެ މޮޅާއެކު ފުލުގައި އޮތް ނޯވިޗް ވަނީ 28 މެޗުން 21 ޕޮއިންޓު ހަމަކޮށްފައެވެ. މި މެޗުން ބަލިވި ލެސްޓަރ ތާވަލުގެ ތިންވަނައިގައި އޮތީ ކުޅުނު 28 މެޗުން 50 ޕޮއިންޓާއެކު އެވެ. ދެވަނައިގައި އޮތް ސިޓީއަށް 27 މެޗުން ވަނީ 57 ޕޮއިންޓު ލިބިފައެވެ.

ނޯވިޗްގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުންވެސް ފެނިގެންދިޔައީ ހަމަހަމަ ކުޅުމެކެވެ. މެޗުގެ ދެވަނަ ހާފު ފަށައިގެން ހަތަރުވަނަ މިނެޓުގައި ލެސްޓަރގެ ފޯވަރޑް ކެލެޗީ އިހެނާޗޯ ލަނޑެއް ކާމިޔާބުކުރި ނަމަވެސް، އޭގެ ކުރިން އޭނާގެ އަތުގައި ބޯޅަ ޖެހުމުން ވީއޭއާރް އިން ވަނީ އެ ލަނޑު ބާތިލުކޮށްފައެވެ.

މި މެޗުގައި ނޯވިޗުން ލީޑު ނެގީ މެޗުގެ 70 ވަނަ މިނެޓުގައެވެ. މެކްސް އާރޮންސް ތަނަވަސްކޮށްދިން ފުރުސަތެއްގައި މި ލަނޑު އެޓީމަށް ކާމިޔާބުކޮށްދިނީ ޒުވާން ޑިފެންޑަރ ޖަމާލް ލެވިސް އެވެ. މިއީ އުމުރުން 22 އަހަރުގެ ޖަމާލް، އޭނާގެ ކެރިއަރުގައި ކާމިޔާބުކުރި ދެވަނަ ލަނޑެވެ.

ލީގުގައި ހުކުރު ދުވަހުގެރޭ ކުޅުނު މެޗުން ލެސްޓަަރ އަތުން ނޯވިޗް މޮޅުވިއިރު، ލީގުގައި ދެން އެޓީމުން މެޗެއް ކުޅޭނީ އަންނަ މަހުގެ ހަތްވަނަ ދުވަހު އެވެ. އެ ދުވަހު ނޯވިޗް ނުކުންނާނީ ޝެފީލްޑް ޔުނައިޓެޑާ ދެކޮޅަށެވެ. އަދި ލީގުގައި ލެސްޓަރ ސިޓީން ދެން މެޗެއް ކުޅޭނީ އަންނަ މަހުގެ 10 ވަނަ ދުވަހު އެވެ. އެ ދުވަހު ލެސްޓަރ ނުކުންނާނީ އެސްޓަން ވިލާއާ ދެކޮޅަށެވެ.