ސީއެންއެންއާ ގުޅިގެން ރާއްޖެ އިޝްތިހާރު ކުރަނީ
ދިވެހިންގެ ޘަޤާފަތާއި މަސައްކަތްތެރިކަން ދައްކާލެވިގެން ދާނެ
ރާއްޖެ އިޝްތިހާރު ކުރުމަށް ސީއެންއެންއާއެކު އެއްބަސްވުމުގައި ސޮއިކުރުން
މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) އިން ސީއެންއެން އާ ގުޅިގެން ރާއްޖެ އިޝްތިހާރު ކުރުމުގެ އެއްބަސްވުމެއްގައި ސޮއިކޮށްފިއެވެ.
އެކަމާ ގުޅޭގޮތުން އެމްއެމްޕީއާރްސީން ނެރުނު ބަޔާނެއްގައި ބުނީ، މި ކެމްޕެއިން ކުރިޔަށް ގެންދިޔުމަށް ހަމަޖެހިފައިވަނީ އަންނަ މާރޗު މަހުން ފެށިގެން ތިން މަސް ދުވަހުގެމުއްދަތަށް ކަމަށެވެ. އެގޮތުން މި ކެމްޕެއިންގެ ޒަރިއްޔާއިން ރާއްޖޭގެ ޤުދުރަތީ ރީތިކަމާއި، ދިވެހިންގެ ޘަޤާފަތާއި މަސައްކަތްތެރިކަން ދައްކާލެވިގެން ދާނެ ކަމަށާއި، ފަތުރުވެރިންނަށް އެންމެ އެކަށީގެންވާ މަންޒިލްގެ ގޮތުގައި ރާއްޖެ ޕްރޮމޯޓްކުރުމަށް މި ކެމްޕެއިންގައި މަސައްކަތްތަކެއް ކުރެވޭނެކަމަށް ބަޔާނުގައި ބުނެފަައިވެއެވެ.
އޭގެ އިތުރުން، މި ކެންޕެއިން އަމާޒުކުރެވިފައިވަނީ ސައުތް އޭޝިއާ، އޭޝިއާ ޕެސިފިކް، މިޑްލް އީސްޓް، އެފްރިކާ އަދި ޔޫރަޕްގެ މާކެޓްތަކަށް ކަމަށާއި، ކެމްޕެއިންގެ ދަށުން ސީ.އެން.އެން ގެ ޚަބަރު ޗެނަލްތަކާއި، ވެބްސައިޓްގެ އިތުރުން މީސްމީޑިއާގައިވެސް ރާއްޖޭގެ ފޮޓޯ އަދި ވީޑިއޯތައް ޝާއިއު ކުރެވިގެންދާނެކަމަށް އެމްއެމްޕީއާރްސީން ބުނެއެވެ.
އެމްއެމްޕީއާރްސީން އިތުރަށް ބުނީ، މި ކެންޕެއިންގެ މަޤްސަދަކީ، ސީ.އެން.އެން އާއި ގުޅިގެން ދިވެހިރާއްޖޭގެ ފަތުރުވެރިކަން އިތުރަށް އިޝްތިހާރުކުރުން ކަމަށާއި، ދިވެހިރާއްޖެ ފަތުރުވެރި މަންޒިލެއްގެ ގޮތުގައި ބޭރުގެ މީޑިއާ މެދުވެރިކޮށް ދައްކައި ދިނުން ކަމަށެވެ.
އޭގެ އިތުރުންވެސް އެމްއެމްޕީއާރްސީން ވަނީ ދިވެހިރާއްޖެ މަގުބޫލު ފަތުރުވެރި މަންޒިލެއްގެ ގޮތުގައި ޕްރޮމޯޓްކުރުމަށް 23 މާކެޓަކަށް އަމާޒުކޮށްގެން ގިނަހަރަކާތްތަކެއް ރާވާފައެވެ.
