ޖުމްހޫރީ ޕާޓީއަކީ ވިޔަފާރި ކުންފުންޏެއް ކަހަލަ ޕާޓީއެއް، ހަރުދަނާ ސިޔާސަތެއް "އެބޭފުޅުން" ނުގެންގުޅޭނެ: ވައްޑެ
ޕްރައިމަރީއެއް ބޭއްވި ހަމައެކަނި ޕާޓީއަކީ އެމްޑީޕީ
ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަޙީދު
ޖުމްހޫރީ ޕާޓީއަކީ ވިޔަފާރި ކުންފުންޏެއްކަހަލަ ޕާޓީއެއް، އެމްޑީޕީ ގެންގުޅޭ ފަދަ ހަރުދަނާ ސިޔާސަތެއް "އެބޭފުޅުން" ނުގެންގުޅޭކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަޙީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ވަހީދު ވިދާޅުވީ އަންނަ އޭޕްރީލް މަހުގެ 4 ވަނަ ދުވަހު ބާއްވާ ލޯކަލް ކައުންސިލް އިންތިހާބުގައި ރައްޔިތުންނަށް އުންމީދީ ސިޔާސަތަކާއިގެން ނިކުތް ހަމައެކަނި ޕާޓީއަކީ އެމްޑީޕީކަމަށާއި ދެން ހުރި ޕާޓީތަކުން "ޕްރައިމަރީގަނޑެއް" ނުބާއްވާކަމަށެވެ. މިސާލެއް ނަންގަވަމުން ވަހީދު ވިދާޅުވީ، ޖުމްހޫރީ ޕާޓީގެ ފަރާތުން ވަރަށް ފޯރިގަދަ ޕްރައިމަރީއެއް ބާއްވާ ވާހަކަ ނޫސްތަކުގެ ފަލަސުރުހީތަކުން ފެނުމުން ހަގީގަތް ބަލާލިއިރު، ވޯޓް ފޮށި ބަހައްޓާފައިވަނީ އެންމެ ދެ ރަށުގައިކަމަށެވެ. ވަހީދު ވިދާޅުވީ ކޯލިޝަންގެ ތެރޭގައި ހިމެނޭ ޖުމްހޫރީ ޕާޓީއަކީ ރާއްޖޭގައި ހިމެނޭ އެންމެ މުއްސަނދި އެއް ބޭފުޅާ އުފައްދަވައިގެން އުޅޭ ވިޔަފާރި ކުންފުންޏެއް ކަހަލަ ޕާޓީއެއްކަމަށާއި އެމްޑީޕީން ގެންގުޅޭ ފަދަ ހަރުދަނާ ސިޔާސަތުތަކެއް އެބޭފުޅުން ނޯންނާނެކަމަށެވެ.
އިތުރަށް ވާހަކަދައްކަވަމުން މެމްބަރު ވަހީދު ވިދާޅުވީ، އެބޭފުޅާ ނިސްބަތްވާ ރ އަތޮޅުގެ އެތައް ރަށެއްގެ ޕީޕީއެމް ކެންޑިޑޭޓުން ޕޯސްޓަރުގައި ލިޔާނެ ޝިއާރެއް ހޯދުމަށް ގުޅާކަމަށެވެ. ވަހީދު ވިދާޅުވީ އެ ޕާޓީތަކުގައި ލާމަރުކަޒީ ނިޒާމުން ރާއްޖޭ ހިންގައި ރަށްތަކެއް ގެންނާނެ ތަރައްގީގެ ވިސްނުމެއް އަދި ވިއްކާނެ ސިޔާސަތެއްވެސް ނެތްކަމަށެވެ. ވަހީދު ވަނީ ކައުންސިލް އިންތިހާބަށް އެހެން ޕާޓިތަކުން ނިކުންނަނީ ރަށެއް ތަރައްގީ ކުރާނެ އެއްވެސް އިލްމެއް ހިލްމެއް ސިޔާސަތެއް ހުރެގެނެއްނޫންކަމަށް ވިދާޅުވެ އިދިކޮޅުފަރާތްތަކަށާއި އެހެން ޕާޓީތަކަށް ވަރަށް ބޮޑަށް ފާޑުވިދާޅުވެފައެވެ. ވަހީދު ވިދާޅުވީ، އެއާއި ހިލާފަށް އެމްޑީޕީން ނިކުންނަނީ ލިޔެ ބަޔާންކުރެވިފައިވާ ސިޔާސަތުތަކާއި އެކުގައިކަމަށެވެ.
ކައުންސިލްތަކަށް މާލީ ބާރުވެރިކަންދީ ލާމަރުކަޒުކުރުމަކީ އެމްޑީޕީން ރައްޔިތުންނަށް ރިޔާސީ އިންތިހާބުގައި ވި ވައުދެއްކަމަށާއި ގާނޫނަށް ބޮޑެތި އިސްލާހުތަކެއް ގެނެސް ބޭއްވޭ ފުރަތަމަ އިންތިހާބުގައި ރައްޔިތުންނާއި ގާތުން ރައްޔިތުންގެ ކަންބޮޑުވުންތަކަށް ހައްލު ހޯދައިދޭނެ މެމްބަރުން ހޮވަންޖެހޭކަމަށެވެ ވަހީދު ވިދާޅުވިއެވެ. އަދި އެފަދަ ފިކުރެއް ގެންގުޅޭ ހަމައެކަނި ޕާޓީއަކީ އެމްޑީޕީކަމަށާއި ކައުންސިލް އިންތިހާބުން އެމްޑީޕީއަށް ވޯޓުދޭންޖެހެނީ އެ ސަބަބާއި ހުރެކަމަށް މެމްބަރު ވަހީދު ވަނީ ތަކުރާރުކޮށް ފާހަގަކުރައްވާފައެވެ.
