އަންނަ ހަފްތާގައި ޓްރެވަލް ކްލިނިކެއް ހުޅުވޭނެ

ކޮރޯނާ ވައިރަސް ބޮޑަށް ފެތުރެމުންދާ ޤައުމުތަކުން އަންނަ މީހުން ޑޮކްޓަރަށް ދެއްކުމަށް އަންނަ ހަފްތާގައި ޓްރެވަލް ކްލިނިކެއް ހުޅުވިގެންދާނެ ކަމަށް ކޮވިޑް-19 އާ ގުޅިގެން ބޭއްވި ޕެނަލް ޑިސްކަޝަންގައި ހާމަކޮށްފިއެވެ.

މި ޕެނަލް ޑިސްކަޝަންގައި ވާހަކަދައްކަވަމުން ޑރ ނަޒްލާ ވިދާޅުވީ އަންނަ ހަފްތާގައި ޓްރެވަލް ކްލިނިކެއް ހުޅުވިގެންދާނެ ކަމަށެވެ. އަދި އެ ވައިރަސް ބޮޑަށް ފެތުރެމުންދާ ޤައުމުތަކުން އަންނަ މީހުން ޓްރެވަލް ކްލިިނިކަށް ގޮސް ދައްކައިގެން ކުރިއަށްދެވޭނެ ކަމަށެވެ. އެގޮތުން އެފަދަ ގައުމުތަކުން އަންނަ ފަރާތަކުން ޖެހޭނީ ވަކި ހޮޓްލައިން ނަމްބަރަކަށް ގުޅުމަށް ކަމަށް ޑރ ނަޒްލާ ވިދާޅުވިއެެވެ.

Advertisement

ޕެނަލް ޑިސްކަޝަންގައި އިތުރަށް ޑޮކްޓަރުން ހާމަކުރެއްވި މައުލޫމާތުތަކަށް ބަލާއިރު ހުރިހާ ބައިނަލްއަޤުވާމީ ބަނދަރުތަކުގައި ސްކްރީން ކުރުމުގެ އިންތިޒާމް ހަމަޖެހިފައިވާނެ ކަމަށް ވިދާޅުވެފައިވެއެވެ. އަދި މިހާތަނަށް އެއްލައްކަ އަށާވީސްހާސް ހަސަތޭކަ ފަންސާސް ހަތް މީހަކު ސްކްރީން ކުރެވިފައިވާ ކަމަށާއި ނުރައްކާ ބޮޑު ޤައުމުތަކުން މީހުން އައުމުގެ އިތުުރުން އެ ޤައުމުތަކުން ދަތުރުކުރާ ފްލައިޓްތައް އައުން ވަނީ ހުއްޓުވިފައި ވެސް ޕެނަލް ޑިސްކަޝަންގައި ވަނީ ފާހަގަކުރައްވާފައެވެ.

އެގޮތުން ރާއްޖެއައުން އެންމެ ފުރަތަމަ ހުއްޓާލާފައިވަނީ ޗައިނާއިން އަންނަ ނުވަތަ ޗައިނާގައި ޓްރާންސިޓް ކޮށްފައި އަންނަ ފްލައިޓްކަން ފާހަގަކުރައްވާ ވިދާޅުވީ މިހާރު ޗައިނާގެ އިތުރުން، އިރާނުން އަންނަ ކްރޫޒް ލައިނަރތަކާއި، ސައުތް ކޮރެއާގެ ޑޭގޫ، ޖިއޮންބޮކް، ބޫސާން، ސޯލް، ޖިއޮންގީ އަދި ޖިއޮންގނަމް އިން ޓްރެވަލް ރެސްޓްރިކްޝަންތަކެއް (ދިވެހިން ނޫން މީހުންނަށް) ވަނީ ނެރެފައި ކަމަށެވެ. ނަމަވެސް އިރާނާއި ސައުތް ކޮރެއާއިން ރާއްޖެ އަންނަ ދިވެހިން ވެސް 14 ދުވަހުގެ ކަރަންޓީން މުއްދަތު ފުރިހަމަ ކުރަންޖެހޭނެ ކަމަށް ވެސް ޕެނަލް ޑިސްކަޝަންގައި ވިދާޅުވިއެވެ.

ކޮވިޑް 19 އާ ގުޅިގެން ކަންބޮޑުވާ ކަމެއް ދިމާވެއްޖެ ނަމަ 1676 އަށް ގުޅުއްވުމަށް ޑޮކްޓަރުން ވަނީ އިލްތިމާސްކުރައްވާފައެވެ. އެގޮތުން އެ ނަންބަރަށް ހިލޭ ގުޅައިގެން މައުލޫމާތު ސާފު ކުރެވޭނެ ކަމަށާއި އެ ނަމްބަރަށް ގުޅާ ކޮންމެ މީހެއްގެ މައުލުމާތު ވަކިން ނޯޓުކޮށް، ބެލިގެންދާނެ ކަމަށެވެ.