އިތުރު ދެ މައްސަލައެއްގައި ރައީސް ޔާމީން މާދަމާ ފުލުހަށް ހާޒިރުކުރަނީ
ރައީސް ޔާމީން ފުލުހަށް ހާޒިރު ކުރުމަށް އަންގާފައިވަނީ ބުރާސްފަތި ދުވަހުގެ 2:00 އަށް
ކުރީގެ ރައީސް އަބްދުﷲ ޔާމީން
ޖަލު ޙުކުމެއް ތަންފީޒުކުރައްވަމުންގެންދަވާ ކުރީގެ ރައީސް ޢަބްދުﷲ ޔާމީން އިތުރު ދެ މައްސަލައެއްގައި ބުރާސްފަތި ދުވަހު ފުލުހަށް ހާޒިރުވުމަށް އަންގައިފިއެވެ.
ރައީސް ޔާމީނުގެ ޤާނޫނީ ވަކީލުންގެ ޓީމުގެ އިސް ވަކީލެއްގެ ގޮތުގައި މަސައްކަތްކުރައްވާ ޑރ. މުޙައްމަދު ޖަމީލް އަޙްމަދު ބުދަ ދުވަހު ކުރެއްވި ޓުވީޓެއްގައި ވިދާޅުވީ ކުރީގެ ރައީސް ޔާމީން އިތުރު ދެ މައްސަލައެއްގައި ބުރާސްފަތި ދުވަހުގެ 2:00 އަށް ފުލުހުންގެ ތަހުޤީޤަށް މާލެއަށް ހާޒިރުކުރާނެ ކަމަށް އަންގާފައިވާ ކަމަށެވެ.
އަދި ފުލުހުންގެ އިދާރާއަކީ ސަރުކާރުން ޖަހާހާ ބެރަކަށް ނަށާތަނަކަށްވެ ނިމިއްޖެ ކަމަށް ޓްވީޓްގައި ވެއެވެ. ދިވެހި ގައުމަށް ޤާނޫނު އަސާސީގެ ދަށުން މިނިވަން މުއައްސަސާތައް ލިބޭނީ ކޮން ދުވަހަކުންތޯ އޭނާ ވަނީ ސުވާލު އުފައްދަވާފައެވެ.
ހޯމަ ދުވަހުގެ މެންދުރު ހައިކޯޓުގައި ވަނީ ރައީސް ޔާމީނުގެ މައްޗަށް އިއްވާފައިވާ ޙުކުމްގެ އިސްތިޢުނާފުގެ އަޑުއެހުމެއް ބާއްވާފައެވެ. ހައިކޯޓަށް ހުށަހަޅާފައިވާ އިސްތިޢުނާފު މައްސަލަ ނިމެންދެން ރައީސް ޔާމީން ކަފާލާތުގެ ދަށުން ދޫކޮށްދެއްވުން އެދި ހުށައަޅާފައިވާ މައްސަލައާ ގުޅިގެން ހައިކޯޓުގައި މި މައްސަލަ ބައްލަވާ ފަނޑިޔާރުންގެ ބެންޗުން ވަނީ، ރައީސް ޔާމީން ޖަލުން ދޫކޮށްލުމުގެ ޢަމުރެއް ނެރެންޖެހޭ ތަނެއް ނެތްކަމަށާއި، އެމަނިކުފާނުގެ މައްޗަށް ކޮށްފައިވާ ޙުކުމް ތަންފީޒުކުރުން ފަސްކުރުމުގެ ޢަމުރެއް ނެރެންޖެހޭ ތަނެއްވެސް ނެތް ކަމަށް ވިދާޅުވެފައެވެ.
އިސްތިޢުނާފު މައްސަލަ ނިމެންދެން ކަފާލާތުގެ ދަށުން ބަންދުން މިނިވަން ކުރުމުގެ ޢަމުރަކަށްވެސް ޔާމީނުގެ ފަރާތްޕުޅުން މީގެކުރިން ވަނީ އެދިފައެވެ. އެމައްސަލައިގައި ހައި ކޯޓުން ވަނީ އެފަދަ ޢަމުރެއް ނެރެދެވެން ނެތްކަމަށް ނިންމާފަ އެވެ.
ރައީސް ޔާމީނަކީ މަނީ ލޯންޑަރިންގގެ ކުށް ސާބިތުވާކަމަށް ކްރިމިނަލް ކޯޓުގެ ފަސް ފަނޑިޔާރުންގެ އިއްތިފާޤުން ފަސް އަހަރު ދުވަހުގެ ޖަލު ޙުކުމެއް އިއްވުމާއި ގުޅިގެން ޖަލުގައި ޙުކުމް ތަންފީޒުކުރައްވަމުންގެންދަވާ ކުށްވެރިޔެކެވެ.
