ކޮމިޓީތަކުގައި ހުރި މަސައްކަތްތައް ރޭގަނޑާއެކު މަސައްކަތް ކުރައްވައިގެން ވީ އެންމެ އަވަހަށް ނިންމުމަށް ނަޝީދު އެދިވަޑައިގެންފި

ކޮމިޓީތަކުގައި މިހާރު ހުރި މަސައްކަތްތައް ރޭގަނޑުގައިވެސް މަސައްކަތް ކުރައްވައިގެން ވީ އެންމެ އަވަހަކަށް ނިންމާލަދިނުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މެންބަރުންގެ ކިބައިން އެދިވަޑައިގެންފި އެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައިވަނީ މަޖިލީހުގައި މިހާރު ހުރި މަސައްކަތްތަކުގެ ތަފްސީލު އަމީން ޢާންމު ފާތިމަތު ނިއުޝާ މަޖިލީހުގެ ރައީސްގެ އެދިވަޑައިގަތުމަށް އިއްވަވާފަ އެވެ. އެތަފުސީލުތަކައް ބަލާލާއިރު ފުރަތަމަ ކިޔުމުގައި ދެ ބިލެއްގެ މަސައްކަތްވެ އެވެ. އިބްތިދާޢީ ބަހުޘްގެ މަރުޙަލާގައި 11 ބިލެއް އޮތްއިރު ،ނުނިމިހުރި މަސައްކަތުގެ ގޮތުގައި ތަޅުމުގައި ބަހުޘްކުރުމަށް 6 ބިލެއް އެބައޮތެވެ. ކޮމެޓީތަކުން ދިރާސާކުރުމަށް 18 ބިލެއް އެބައޮތެވެ.

މިތަފުސީލުތައް އަމީން ޢަންމު ދެއްވުމުން މަޖިލީހުގެ ރައީސް ވިދާޅުވީ މިހުރިހާ ބިލުތަކެއްގެ މަސައްކަތް ބާރަށް ގެންގޮސް ނިންމާލަންޖެހޭ ކަމަށެވެ. އެހެންކަމުން ކޮމިޓީތަކުގެ މަސައްކަތްތައް ރޭގަނޑާއެކު ކުރިޔަށްދާނެ ކަމަށް އުންމީދު ކުރައްވާކަމަށް ރައީސް ނަޝީދު ވިދާޅުވި އެވެ.

ރައްޔިތުންގެ މަޖިލީހުގެ މިދައުރުގެ ޖަލްސާތައް ފަށާފައިވަނީ މިފެބްރުއަރީ މަހުގެ 3 ވަނަ ދުވަހު އެވެ. އޭގެފަހުން ޖަލްސާތަކާއި ކޮމިޓީތަކުގެ މަސައްކަތްތައް ކުރިޔަށްދާއިރު 19 ވަނަ ރައްޔިތުންގެ މަޖިލިސް ފާހަގަވެގެން ގޮސްފައިވަނީ ޙަކާތްތެރި ގިނަ މަސައްކަތްތަކެއް ކުރާ މަޖިލީހެއްގެ ގޮތުގަ އެވެ.