ހޮރައިޒަންއިން މަސްދޯނީގައި ބޯފެން ފިލްޓަރ ކުރެވޭނެ ގޮތް ހަދަނީ
25 ފެބުރުއަރީ 2020 | އަންގާރަ 18:28އުކާލެވޭ ޕްލާސްޓިކް ބޭނުންކުރާ މިންވަރު މަދުކުރެވޭނެ
މާންދޫގައި ބޭއްވި ރަސްމިއްޔާތުގެ ތެރެއިން
ހޮރައިޒަން ފިޝަރީޒް އަދި ބްލޫޔޫ ކޮންސަލްޓިންގ ގުޅިގެން ލ. އަތޮޅުގެ މަސްދޯނިފަހަރުގައި ބޯފެން ފިލްޓަރ ކުރެވޭނެ ނިޒާމު ގާއިމު ކުރުމުގެ ޕްރޮޖެކްޓެއް ފަށައިފިއެވެ.
އެއްފަހަރު ބޭނުންކޮށްފައި އުކާލެވޭ ޕްލާސްޓިކް ބޭނުންކުރާ މިންވަރު މަދުކުރުމުގެ މަގުސަދުގައި ކުރިއަށް ގެންދާ މިޕްރޮޖެކްޓް ފަށާފައިވަނީ ހުކުރު ދުވަހު ހަވީރު މާންދޫގައި ބޭއްވި ހަފުލާއެއްގައެވެ.
މިހަފުލާގައި ވާހަކަ ދައްކަވަމުން ބްލޫޔޫގެ ކޮންސަލްޓަންސީގެ ޕްރޮޖެކްޓް މެނޭޖަރު އަބްދުﷲ ޝާކިރު މުހައްމަދު ވިދާޅުވީ، މިޕްރޮޖެކްޓްގެ ދަށުން ފެއަރ ޓްރޭޑް ޕްރޮގުރާމުގައި ބައިވެރިވާ ހުރިހާ ދޯނިފަހަރުގައިވެސް ބޯފެން ފިލްޓަރ ކުރާ ނިޒާމު ގާއިމު ކުރެވިގެންދާނެ ކަމަށާއި، އަމާޒަކީ މަސްދޯނިފަހަރަކީ އެއްފަހަރު ބޭނުންކޮށްފައި އުލާކެވޭ ޕްލާސްޓިކް ބޭނުން ނުކުރާ ދޯނިފަހަރަށް ވެގެންދިޔުން ކަމަށެވެ.
ޝާކިރު ވިދާޅުވީ، ޅ. އަތޮޅުގައި މަސްވެރިކަން ކުރާ އުޅަނދުފަހަރުން އެވްރެޖް ގޮތެއްގައި ކޮންމެ ދަތުރަކު 45 ކޭސް ފެން ބޭނުންކުރާ ކަމަށެވެ. އަދި އެއީ ލ. އަތޮޅުގައި މަސްވެރިކަން ކުރާ އުޅަނދު ފަހަރުގެ އަދަދަށް ބަލާއިރު ވަރަށް ބޮޑު މިންވަރެއް ކަމަށާއި، އެ އަދަދު މަދުކުރެވިއްޖެނަމަ އެއީ ޕްލާސްޓިކްގެ ސަބަބުން ތިމާވެށްޓަށް ކުރިމަތިވަމުންދާ ގޮންޖެހުންތަކަށް ހައްލު ހޯދުމުގެ މަސައްކަތުގައި ވެވޭ ވަރަށް ބޮޑު ހިއްސާއެއް ކަމަށެވެ .
މިހާރުވެސް ޕައިލެޓް ޕްރޮޖެކްޓެއްގެ ދަށުން އެ އަތޮޅު ހިތަދޫގެ ދެ ދޯންޏެއްގައި ބޯފެން ފިލްޓަރ ކުރެވޭނެ ނިޒާމު ގާއިމުކޮށް ޓެސްޓް ކުރެވިފައިވާ ކަމަށާއި، ދޯނިފަހަރުގައި ހަރުކުރާ ފިލްޓަރ ސިސްޓަމްތަކަކީ، ރައްކާތެރިކަން ކަށަވަރުކުރެވިފައިވާ ފެނެއްކަމަށް އޭނާ ވިދާޅުވި އެވެ.
މީގެ އިތުރުން ޝާކިރު ވިދާޅުވީ ހޮރައިޒަން ފިޝަރީޒް އަދި ބްލޫޔޫ ކޮންސަލްޓިންގ ގުޅިގެން ކުރިއަށް ގެންދާ ފެއަރ ޓްރޭޑް ޕްރޮގްރާމުގެ ދަށުން ލ. އަތޮޅުގެ ފަސް ރަށެއްގައި މިހާރު ފެއަރ ޓްރޭޑް ޖަމިއްޔާތައް އެކުލަވާލެވިފައިވާ ކަމަށާއި، އަތޮޅުގެ އެހެން ރަށްރަށަށް އެ ހަރަކާތް ފުޅާކުރުމުގެ މަސައްކަތް ކުރަމުންދާ ކަމަށެވެ.
ފެއަރ ޓްރޭޑް ޕްރޮގްރާމުގެ ދަށުން މަސްވެރިންގެ ޖަމްޢިއްޔާތައް މިހާރު އެކުލަވާލެވިފައިވަނީ ލ. ގަމާއި، ހިތަދޫ، ކުނަހަންދޫ، މާމެންދޫ އަދި މާބައިދޫގައެވެ.
މިޕްރޮގުރާމުގެ ދަށުން ފެއަރ ޓްރޭޑްގައި ބައިވެރިވާ މަސްދޯނިފަހަރުން ހޮރައިޒަން ފިޝަރީޒް އަށް ކިރާ މަހުން ޕްރީމިއަމްގެ ގޮތުގައި މަސްވެރިންނަށް އިތުރު އާމްދަނީ އެއް ލިބޭއިރު، އެފައިސާ އަކީ އިޖްތިމާއީ ތަރައްޤީގެ އެކި ދާއިރާތަކަށް ޚަރަދު ކުރުމަށް ލިބޭ ފައިސާއެކެވެ. އެފައިސާގެ ތެރެއިން 30 އިންސައްތަ ތިމާވެށްޓާއި ގުޅުން ހުރި ހަރަކާތްތަކަށް ޚަރަދު ކުރަންޖެހޭއިރު، މަސްދޯނިފަހަރުގައި ބޯފެން ފިލްޓަރ ކުރާ ސިސްޓަމް ބެހެއްޓިގެން ދިޔުމަކީ އެ ފަންޑުގެ ތެރެއިން |ކުރިއަށް ގެންދާ އެއް ހަރަކާތެވެ.
މިހަރަކާތުގެ ތެރެއިން މަސްދޯނިފަހަރުގައި ބޭނުންކުރާ ޕްލާސްޓިކްގެ މިންވަރު މަދުކޮށް، އަދިމުޅި ވ. އަތޮޅުގައި އެއްފަހަރު ބޭނުންކޮށްފައި އެއްލާލެވޭ ޕްލާސްޓިކް ބޭނުންކުރުން ހުއްޓާލުމަކީ މުސްތަގުބަލުގެ އަމާޒެއް ކަމަށް ބްލޫޔޫ ކޮންސަލްޓިންގ އިން ބުނެއެވެ. އަދި މިހަރަކާތް ކުރިއަށް ގެންދިޔުމުގައި މަސްވެރި ޖަމްއިއްޔާތަކާއި މަސްވެރިންގެ އެއްބާރުލުމާއި އެހީތެރިކަން ލިބޭކަން ބްލޫޔޫ އިން ފާހަގަކުރެއެވެ.
ފެއަރ ޓްރޭޑްގައި ބައިވެރިވާ ގަމު މަސްވެރިންގެ ޖަމްއިއްޔާގެ ރައީސް އަލީ ހަފީޒް ވިދާޅުވީ، މަސްދޯނިފަހަރުގައި ބޯފެނުގެ ގޮތުގައި މިހާރު ގިނައިން ބޭނުން ކުރަނީ، ފުޅީގައި ބަންދުކޮށްފައިވާ ފެން ކަމަށާއި، ބޭނުން ކުރުމަށްފަހު ކަނޑަށް އުކާލާ ޕްލާސްޓިކްފުޅީގެ އަދަދު ނިސްބަތުން ބޮޑު ކަމަށެވެ. އަދި މިޕްރޮގުރާމުގެ ދަށުން އެކަމަށް އެދެވޭ ހައްލެއް ލިބި، ފެނަށް ކުރަންޖެހޭ ޚަރަދު ކުޑަވެގެންދާނެ ކަމަށާއި، މިޕްރޮގުރާމުގެ ފައިދާ ކޮންމެ މަސްވެރިޔަކަށް ވެސް ލިބޭނެ ކަމަށް ޤަބޫލުކުރާ ކަމަށް ހަފީޒު ވިދާޅުވިއެވެ.
