ކައުންސިލް އިންތިޚާބުގައި ވާދަކުރާ ފަރާތްތަކުގެ ފޯމްތައް ޗެކްކޮށް ނިމޭނީ މާދަމާ: އީސީ
3000 އަށް ވުރެ ގިނަ ފޯމް ވަނީ އީސީއަށް ހުށަހަޅާފައި
އިލެކްޝަންސް ކޮމިޝަންގެ މެންބަރުން
އަންނަ އެޕްރީލް މަހުގެ ހަތަރުވަނަ ދުވަހު ބާއްވާ ލޯކަލް ކައުންސިލް އިންތިޚާބުގައި ވާދަކުރާ ފަރާތްތަކުގެ ފޯމްތައް ޗެކްކޮށް ނިމޭނީ މާދަމާ ކަމަށް އިލެކްޝަންސް ކޮމިޝަނުން (އީސީ) އިން ބުނެފިއެވެ.
ރާއްޖެ އެމްވީއަށް މައުލޫމާތު ދެއްވަމުން އީސީގެ ނައިބް ރައީސް އަހުމަދު އަކްރަމް ވިދާޅުވީ ކައުންސިލްތަކުގެ އިންތިޚާބުގައި ވާދަ ކުރުމަށްޓަކައި ހުޅުވާލި ފުރުޞަތު ބުރާސްފަތި ދުވަހު ގެ ހަވީރު 4:00 އަށް ސުންގަޑި ހަމަވިއިރު 3،000 ވުރެ ގިނަ ފޯމު ހުށަހަޅާފައިވާ ކަމަށެވެ. އަދި ފޯމްތައް ޗެކްކުރުމުގެ މަސައްކަތް މިހާރުވެސް ކުރަމުންދާ ކަމަށް އޭނާ ވިދާޅުވިއެވެ.
ފޯމްތައް ޗެކްކޮށް ނިމޭނީ ހޮނިހިރު ކަމަށާއި ފޯމްތަކުގައި އެއްވެސް މައްސަލައެއް އުޅޭނަމަ އެފަރާތްތަކަށް ފޯމް ހުށަހެޅި ކެންޑިޑޭޓުންނަށް ހޮނިހިރު ދުވަހު އަންގާނެ ކަމަށާއި ކައުންސިލް އިންތިޚާބުގައި ވާދަކުރުމަށް ހުށަހަޅާފައިވާ ފޯމްތައް ޗެކްކުރުމަށްފަހު އިންތިޚާބުގައި ވާދަކުރާ ކެންޑިޑޭޓުންގެ ނަންތައް ވަރަށް އަވަހަށް އިއުލާން ކުރައްވާނެ ކަމަށް އަކްރަމް ވިދާޅުވިއެވެ.
އަންނަ އޭޕްރީލް މަހުގެ ހަތަރު ވަނަ ދުވަހު ބާއްވާ ލޯކަލް ކައުންސިލްތަކުގެ އިންތިޚާބަކީ ލަމަރުކަޒީ ޤާނޫނަށް ބޮޑެތި ބަދަލުތަކެއް ގެނައުމަށްފަހު ބޭއްވޭ ވަރަށް ތަފާތު އިންތިޚާބެކެވެ.
މީގެކުރިން ބޭއްވި ލޯކަލް ކައުންސިލްތަކުގެ އިންތިޚާބާ ތާފަތުކޮށް، މި އިންތިޚާބުގައި ސިޓީތަކުގެ މޭޔަރު ކަމުގެ މަޤާމާއި، އަތޮޅު ކައުންސިލްގެ ރައީސްގެ މަޤާމާއި، ރަށު ކައުންސިލްގެ ރައީސް ކަމުގެ މަޤާމަށް ބޭފުޅުން އިންތިޚާބު ކުރާނީ، އެ މަޤާމުތަކަށް ކުރިމަތިލި ކެންޑިޑޭޓުންނަށް ވޯޓުދީގެންނެވެ.
އަންހެނުންނަށް ކައުންސިލްތަކުގެ 33 އިން ސައްތަ ޚާއްޞަކޮށްފައިވާއިރު، ބޮޑެތި ބާރުތަކެއްވެސް ކައުންސިލްތަކަށް ދީފައިވެއެވެ. އަދި މާލީ ބާރުވެރިކަން ވެސް ކައުންސިލްތަކަށް ދީފައިވާއިރު، ކައުންސިލްތަކުގެ އުމުރު ވެސް ވަނީ ތިން އަހަރުން ފަސް އަހަރަށް އިތުރުކޮށްފައެވެ.
