ކޮރޯނާވައިރަސް ޖެހިގެން މަރުވި މީހުންގެ އަދަދު 2244 އަށް!
ބުރާސްފަތި ދުވަހުގެ ނިޔަލަށް އެކަނިވެސް ހުބޭ ޕްރޮވިންސުން ވަނީ 115 މީހަކު މަރުވެފައި
ކޮރޯނާ ވައިރަސްޖެހިގެން މީހަކަށް ފަރުވާދިނުމަށް ގެންދަނީ
ދުނިޔޭގެ އެކި ކަންކޮޅުތަކުގައި ކޮރޯނާ ވައިރަސް ޖެހިގެން މަރުވި މީހުންގެ އަދަދު 2244 އަށް އަރައިފިއެވެ.
ނޮވެލް ކޮރޯނާވައިރަސް ފެތުރިގެން އައި މަރުކަޒު ހުބޭ ޕްރޮވިންސްގެ ހެލްތް އޮތޯރިޓީން ހާމަކޮށްފައިވާ ގޮތުގައި ބުރާސްފަތި ދުވަހުގެ ނިޔަލަށް އެކަނިވެސް އެ ޕްރޮވިންސުން ވަނީ 115 މީހަކު މަރުވެފައެވެ. އަދި މިއާއެކު ޗައިނާއިން މަރުވި މީހުންގެ އަދަދު ވަނީ 2233 އަށް އަރާފައެވެ. އެހެނިހެން ގައުމުތަކުގައި މަރުވި މީހުންގެ އަދަދަކީ މިހާރު 11 އެވެ.
ހުބޭ ޕްރޮވިންސުން ވަނީ ބުރާސްފަތި ދުވަހުގެ ނިޔަލަށް އިތުރު 411 މީހަކު ކޮރޯނާ ވައިރަސްއަށް ޕޮޒިޓިވްވި ކަމަށް ބުނެފައެވެ. އަދި މިއާއެކު ހުބޭ ޕްރޮވިންސުން މި ބައްޔަށް ޕޮޒިޓިވްވި މީހުންގެ އަދަދު ވަނީ 62422 އަށް އަރާފައެވެ.
ޗައިނާ ނޫން އެހެން ގައުމުތަކަށް ބަލާއިރު އެންމެ ގިނައިން މީހުން މަރުވެފައިވަނީ ޖަޕާނުންނެވެ. މިހާތަނަށް ޖަޕާނުން ވަނީ 3 މީހަކު މަރުވިކަމަށް ބުނެފައެވެ. އަދި ހޮންކޮންގ އަދި އިރާނުން ވަނި 2 މީހަކު މަރުވި ކަން ހާމަކޮށްފައެވެ. މީގެ އިތުރުން ތައިވާން، ފިލިޕިންސް، ސައުތުކޮރެއާ އަދި ފްރާންސް، މިއިން ކޮންމެ ގައުމަކުން ވަނީ އެކަކު މަރުވިކަމަށް އިއުލާންކޮށްފައެވެ.
ދުނިޔޭގެ އެކި ކަންކޮޅުތަކުގައި ކޮރޯނާވައިރަސް ޖެހުނު މީހުންގެ އަދަދު ވަނީ 76154 އަށް އަރާފައެވެ.
