ޒުވާނުންގެ ޤައުމީ ދުވަސް އަތޮޅުތެރޭގައި ފާހަގަ ކުރަނީ
މި ދުވަސް މިއަހަރު ފާހަގަ ކުރުމަށް ބޭނުންވަނީ ޒުވާނުންގެ ޢީދެއްގެ ގޮތުގައި
ޔޫތް މިނިސްޓަރު އަހުމަދު މަހުލޫފް
ޒުވާނުންގެ ގައުމީ ދުވަސް 2020 އަތޮޅުތެރޭގައި ފާހަގަކުރަން ނިންމައިފިއެވެ.
ޔޫތް މިނިސްޓްރީން ބުނީ މި އަހަރުގެ ޒުވާނުންގެ ޤައުމީ ދުވަސް ފާހަގަ ކުރުމަށް ހަމަޖެހިފައިވަނީ 22 އޮކްޓޯބަރ 2020 ވާ ބުރާސްފަތި ދުވަހު ކަމަށެވެ. އަދި މިނިސްޓްރީގެ ފަރާތުން މި ދުވަސް މިއަހަރު ފާހަގަ ކުރުމަށް ބޭނުންވަނީ ޒުވާނުންގެ ޢީދެއްގެ ގޮތުގައި ކަމަށެވެ.
އެގޮތުން ރާއްޖޭގެ އެކި ކަންކޮޅުތަކުގައި ހިމެނޭ ޒުވާނުން ބައިވެރިކުރުމަކީ މި ދުވަސް ފާހަގަ ކުރުމުގެ އެއް މަގުސަދު ކަމަށާއި، މިފަހަރުގެ ޒުވާނުންގެ ދުވަސް ފާހަގަ ކުރުމަށް ގަސްތުކޮށްފައިވަނީ އަތޮޅުތެރޭގައި ކަމަށެވެ.
ޔޫތް މިނިސްޓްރީން ބުނީ މި ދުވަސް ފާހަގަކުރުމަށް ބޭނުންވާ ރަށްތަކުން ޕްރޮޕޯސަލް ތައްޔާރުކުރުމަށް ބޭނުންވާ މައުލޫމާތު ހޯދުމަށް އަންނަ މަހުގެ 10 ވަނަ ދުވަހުގެ 11:00 އަށް ސޯޝަލް ސެންޓަރަށް ދުރުވެ މައުލޫމާތު ސާފު ކުރުމަށް އެދޭ ކަމަށެވެ. އަދި އެންމެ ރަނގަޅު ޕްރޮޕޯސަލްއެއް ހުށަހަޅާ ރަށެއްގައި މިއަހަރުގެ ޤައުމީ ޒުވާނުންގެ ދުވަހުގެ ހަރަކާތްތަކާއި، ރަސްމީ ޖަލްސާ ބޭއްވިގެން ދާނެ ކަމަށް ޔޫތް މިނިސްޓްރީން ބުނެއެވެ.
ޔޫތް މިނިސްޓްރީން ބުނީ ޒުވާނޫންގެ ދުވަސް ބާއްވަން ޕްރޮޕޯސަލް ހުށަހަޅަން ބޭނުންވާ ފަރާތްތަކުން މާފަންނު ސޯޝަލް ސެންޓަރގެ ކައުންޓަރ އަށް ހުށަހެޅުމަށް އެދޭ ކަމަށެވެ. އަދި އީމެއިލް މެދުރިކޮށް ޕްރޮޕޯސަލް ހުށަހަޅަން ބޭނުންވާ ފަރާތްތަކުން މެއިލް ކުރުމަށާއި، ޕްރޮޕޯސަލް ހުށަހެޅޭނެ އެންމެ ފަހުގެ ތާރީޚަކީ އެޕްރީލް މަހުގެ 30 ވަނަ ދުވަސްކ ކަމަށެވެ.
