ވެލާނާ އިންޓަނޭޝަނަލް އެއަރޕޯޓުގެ އައު ސީޕްލޭން ޓާމިނަލް ވަކިބަޔަކަށް ދިނުމަށް، ވަކި އަގަކަށް ކުލިކުރުމަށް އަދި ވަކިގޮތަކަށް އޮޕަރޭޓްކުރުމަށްވެސް ކުރީ ސަރުކާރަކުން އެއަރޕޯޓަކަށްވެސް އަދި ވަކި ފަރާތަކަށްވެސް ނާންގާކަމަށް ވިދާޅުވެ، އެކަމާއި ގުޅޭގޮތުން ދައްކަމުންދާ ވާހަކަ އެސަރުކާރުގެ އިކޮނޮމިކް މިނިސްޓަރު މުޙައްމަދު ސައީދު ދޮގުކުރައްވައިފި އެވެ.

މިހާރު ރައްޔިތުންގެ މަޖިލީހުގެ މާވަށު ދާއިރާގެ މެންބަރުކަންވެސް ކުރައްވަމުން ގެންދަވާ ސައީދު މިކަމާއި ގުޅިގެން ޓްވީޓްތަކެއް ކުރެއްވީ އާ ސީޕްލޭން ޓާމިނަލް ހިންގުން ޓްރާންސް މޯލްޑިވިއަން އެއަރވޭސް (ޓީއެމްއޭ)އަށް ދޭނެ ކަމުގެ ޔަޤީންކަން ކުރީގެ އިކޮނޮމިކް މިނިސްޓަރު މުޙައްމަދު ސައީދު، ޓީއެމްއޭ އަށް ދެއްވި ކަމަށް، މިހާރުގެ އިކޮނޮމިކް އެންޑް ޑިވެލޮޕްމަންޓް މިނިސްޓަރު ފައްޔާޒް އިސްމާއީލް ވިދާޅުވި ޚަބަރު ޓްވީޓް ކުރައްވަމުންނެވެ.

ސައީދު ވިދާޅުވީ އެއީ އިތުރު ފުޅެއްކަމަށެވެ. އަދި ފިނިހަކަ ދުވެލީގައި ސަރުކާރުގެ ފުރަތަމަ ހާފު ނިމުނުއިރު މިހާތަނައް ކުރެވުނު ކަމެއްނެތްކަމަށް ސައީދު ވިދާޅުވި އެވެ. ކުރީސަރުކާރުން ވާނީ މުޅިއެއަރޕޯޓުގެ ތަރައްޤީ އަށް އެންމެ ޒަމާނީ ތަޞައްވުރެ އްކުރެހި، ފައިސާ ހޯދި، މަސައްކަތް ފެށި، ބާރު ސްޕީީޑު ގައި ކުރިއަށް ގެންގޮސްފައިކަމަށް ސައީދު ވިދާޅުވި އެވެ. އަދި ވަޅުޖަހާފައި އޮތް އިޤްތސާދެއް ދުނިޔޭގެ އެންމެ މަތީ ފެންވަރުގައި ރޭޓު ކޮށް އަަލުން އަނބުރާ އިތުބާރު ޤާއިމުކޮށްފައިކަމަށް ސައީދު ވިދާޅުވި އެވެ.

ސައީދު މިމޭރުމުން ޓްވީޓް ކުރައްވާފައިވާއިރު މަޖިލީހުގެ މާލިއްޔަތު ކޮމެޓީގައި ވާހަކަ ދައްކަވަމުން ފިނޭންސް މިނިސްޓަރު އިބްރާހީމް އަމީރު ވިދާޅުވީ ކުރީގެ ސަރުކާރުގައި ނިންމާފައި އޮތީ، ޓީއެމްއޭގެ މެޖޯރިޓީ ހިއްސާ އޮންނަ ބެއިން ކެޕިޓަލަށް ޓީއެމްއޭއަށް އާ ޓާމިނަލް ހިންގަން ދޭން ކަމަށެވެ. އޭރުގެ ސަރުކާރުގެ އިތުރުން އެމްއޭސީއެލްގެ މެނޭޖުމަންޓުން ވެސް އެކަމަށް ރުހުން ދީފައިވާ ކަމަށް މިނިސްޓަރު ވިދާޅުވިއެވެ.

އައު ސީޕްލޭން ޓާމިނަލްގެ މައްސަލައާއި ގުޅިގެން އޭސީސީން ކޮށްފައިވާ ތަހުޤީޤުގެ މައްޗަށް ނެރެފައިވާ ރިޕޯޓަށް ބަލާލާއިރު އައު ސިޕްލޭން ޓާމިނަލް ހިންގުން ޓީއެމްއޭއާއި ޙަވާލު ކުރާނެކަމަށް ބުނެ އެމްއޭސީއެލް އާއި ޓީއެމްއޭ އާއި ދެމެދު ވަނީ މަޝްވަރާތަކެއް ކުރެވިފައެވެ. އަދި މިކަމުގައި ދެކެވުނު ވާހަކަތައް ނިމުމަކަށް އައިސް އެގްރީމެންޓުގައި ސޮއިކުރުމާހަމައަށް ގޮސްފައިވާކަން އޭސީސީގެ ރިޕޯޓުން ހާމަވެއެވެ.

މިމައްސަލާގައި ފިނޭންސް މިނިސްޓްރީން އެންމެފަހުން ނިންމާފައިވަނީ، ޓީއެމްއޭ އަށް ބިން ދޫކޮށްފައިވާ އަގަށް އައު ސީޕްލޭން ޓާމިނަލުން 6،300 އަކަމީޓަރު، މިހާރުވެސް ބިން ދީފައިވާ އަގު ކަމަށްވާ 10.35 ޑޮލަރަށް ކުރިއަށް އޮތް ދެ އަހަރަށް އެ ކުންފުންޏަށް ދޫކުރުމަށެވެ. އަދި ޓަރމިނަލްގެ ބާކީ ބައި ބިޑު އުޞޫލުން އެހެން ފަރާތްތަކަށް ދިނުމަށާއި، މިހާރުގެ ޓަރމިނަލްގައިވެސް އެކި ފަރާތްތަކަށް ދީފައިވާ އަގުތަކުގައި ބިންތައް މިހާރުވެސް ދޫކޮށްފައިވާ ބޮޑުމިނުމުގައި ދޫކުރުމަށް ވަނީ ނިންމާފަ އެވެ. މިނިސްޓްރީން ބުނެފައިވަނީ ދެ އަހަރަށް ފަހު ވާދަވެރި ބިޑު އުސޫލުން ޓާމިނަލްއިން ޖާގަ ދޫކުރާނެ ކަމަށެވެ.

އަލަށް ހަދާ ސީޕްލޭން ޓާމިނަލް އާއި ގުޅޭގޮތުން ސަރުކާރުން ނިންމި ނިންމުން ރަނގަޅުކަމަށް ރައްޔިތުންގެ މަޖިލީހުގެ މާލިއްޔަތު ކޮމިޓީ އިން ނިންމާފައިވާއިރު، މި މައްސަލައިގެ ޖިނާޢީ ތަހުޤީޤެއް އޭސީސީއިން ދަނީ ކުރަމުންނެވެ.