ސަސްޕެންޝަނަށްފަހު ކުޅުނު ފުރަތަމަ މެޗުން ސިޓީއަށް މޮޅެއް

ޔުއެފާއިން މެންޗެސްޓާ ސިޓީއަށް ދިން ސަސްޕެންޝަނަށްފަހު އެޓީމުން ކުޅުނު ފުރަތަމަ މެޗުން މޮޅުވެއްޖެ އެވެ.

އިނގިރޭސި ޕްރިމިއާ ލީގުގައި ބުދަ ދުވަހުގެރޭ ކުޅުނު މެޗުން ވެސްޓް ހޭމްގެ މައްޗަށް ސިޓީ ކުރިހޯދީ 2-0 ގެ ނަތީޖާއަކުންނެވެ.

ފައިނޭންޝިއަލް ފެއާޕްލޭ (އެފްއެފްޕީ)ގެ އުސޫލުތަކާ ހިލާފުވުމުގެ އިތުރަށް ޔުއެފާ ކްލަބު ލައިސަންސިންގައި މަކަރު ހަދާފައި ވާތީ ޔުއެފާއިން ވަނީ މި މަހުގެ 14 ވަނަ ދުވަހު ކުރިއަށް އޮތް ދެ ސީޒަނަށް ޔޫރަޕުގެ މުބާރާތްތަކުން ސިޓީ ސަސްޕެންޑް ކޮށްފައެވެ. ޔުއެފާއިން ކުރިއަށް އޮތް ދެ ސީޒަނަށް ސިޓީ ސަސްޕެންޑް ކުރުމުން، 2020/2021 އަދި 2021/2022 ވަނަ އަހަރުގެ ސީޒަނުގެ ޗެމްޕިއަންސް ލީގުގައި އެޓީމަށް ނުކުޅެވޭނެ އެވެ.

މި ސަސްޕެންޝަނުގެ ކުރިން ކުޅުނު ދެ މެޗުންވެސް ސިޓީ ވަނީ ބަލިވެފައެވެ. އެއީ ލީގު ކަޕްގައި ޔުނައިޓެޑާ ދެކޮޅަށް ކުޅުނު މެޗާއި ލީގުގައި ޓޮޓެންހަމާ ދެކޮޅަށް ކުޅުނު މެޗެވެ.

ލީގުގައި ބުދަ ދުވަހުގެރޭ ވެސްޓް ހޭމް އަތުން ސިޓީ މޮޅުވުމުން، އެއްވަނައިގައި ލިވަޕޫލް މިހާރު އޮތީ 22 ޕޮއިންޓުގެ ލީޑަކާއެކުއެވެ. ލިވަޕޫލަށް 26 މެޗުން 76 ޕޮއިންޓު ލިބިފައިވާއިރު، ސިޓީއަށް 26 މެޗުން ލިބިފައިވަނީ 54 ޕޮއިންޓެވެ.

ބުދަ ދުވަހުގެރޭގެ މެޗަކީ މީގެ 10 ދުވަސް ކުރިން ކުޅެން ހަމަޖެހިފައި އޮތް މެޗެކެވެ. މި މެޗު ފަސްކުރީ މޫސުން ގޯސްވުމާއި ގުޅިގެންނެވެ.

ސިޓީގައި ދަނޑުގައި ކުޅުނު މި މެޗުގެ 30 ވަނަ މިނެޓުގައި އެޓީމަށް ލީޑު ނަގައިދިނީ ކެވިން ޑި ބްރޭނާގެ އަހީއާއެކު ރޮޑްރީ އެވެ. އަދި ސިޓީއަށް 62 ވަނަ މިނެޓުގައި ލީޑު ފުޅާކޮށްދިނީ ބެނާޑޯ ސިލްވާގެ އެހީއާއެކު ކެވިން ޑި ބްރޭނާ އެވެ.

ލީގުގައި ދެން ސިޓީން މެޗެއް ކުޅޭނީ މި މަހުގެ 22 ވަނަ ދުވަހު އެވެ. އެ ދުވަހު ސިޓީ ނުކުންނާނީ ތިންވަނައިގައި އޮތް ލެސްޓާ ސިޓީއާ ދެކޮޅަށެވެ.