މިހާރު ހުށަހެޅެމުންދާ ބިލުތަކަކީ އަންޒަމާނު ކަރަޔަށް ވައި އެރިއިރުގެ ތަކެތި، ހުސް ބަހަނާ!: ނަޝީދު
ސަރުކާރުން ބިލެއްް ހުށަހަޅާއިރު ގިނަ ފަހަރު މަޝްވަރާ ކުރެވިފައި އޮންނަނީ ހާމަކަން މައްޗަކު ނޫން: ނަޝީދު
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
މިހާރު ހުށަހެޅެމުންދާ ބިލުތަކަކީ އަންޒަމާނު ކަރަޔަށް ވައި އެރިއިރުގެ ތަކެތި ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ބުދަ ދުވަހުގެ މަޖިލީހުގެ ޖަލްސާގައި ސަރުކާރުގެ ފަރާތުން ހުށަހެޅުނު "ނަފްސާނީ ސިއްޙަތާއި ބެހޭ ބިލު" އަނބުރާ ގެންދެވިކަން އިއުލާނު ކުރައްވާ ނަޝީދު ވިދާޅުވީ ބިލުގެ ގޮތުގައި ބައެއް ފަހަރު މަޖިލީހަށް ހުށަހެޅެނީ ސުރުހީއެއް ކަމަށެވެ.
ނަޝީދު ވިދާޅުވީ ބަދަލު ގެނެސް، ރައްޔިތުން ބޭނުންވާ ގޮތް ދެނެގަނެ އެ ބިލެއް ފުރިހަމަ ކުރަނީ އެކި ފަރާތްތަކާއި މަޝްވަރާ ކުރުމަށްފަހު މަޖިލީހުން ކަމަށެވެ. ނަޝީދު ވިދާޅުވީ އާއްމުންގެ މަޝްވަރާއާއި ބައިވެރިވުން އެ ބިލަކަށް ގެންނަން ޖެހެނީ މަޖިލީހުން ކަމަށެވެ.
މިދިޔަ ދައުރު ނިމުނު އިރުގައި 56 ބިލެއްގެ މަސައްކަތް އެއްފަހަރާ ލިބުނުކަން ފާހަގަކުރައްވާ މަޖިލީހުގެ ރައީސް ވިދާޅުވީ އެ ބިލުތައް މެމްބަރުންގެ ތެރޭގައި ބަހާލެވުނު ކަމަށެވެ. އަދި އެ ބިލުތަކަކީ ބޭރުގެ ގައުމުތަކުގެ ޕްރެޝަރ ބޮޑުވުމުން ދިވެހި ސަރުކާރުން ބަހަނާ ދެއްކުމުގެ ނިޔަތުގައި ސަރުކާރުގެ އެކި ވުޒާރާތަކުގައި ފަށާފައި ހުރި ބައިވަރު މަސައްކަތްތަކެއް ކަމަށެވެ. ރައީސް ނަޝީދު ވިދާޅުވީ ދިވެހިން ބޭނުންވަނީ ބަހަނާތަކެއް ނޫން ކަމަށެވެ. ދިވެހި ރައްޔިތުން ބޭނުންވަނީ މެމްބަރުންގެ ފަރާތުން އެކަންތައް ކުރުމަށް ކަމަށެވެ.
އެމްޑީޕީގެ ރައީސް، ނަޝީދު ވިދާޅުވީ ސަރުކާރުން ހުށަހަޅުއްވާފައިވާ ބިލުތަކަކީ އެއްވެސް ހާލެއްގައި ދިވެހި ރައްޔިތުންގެ ޑިމޮކްރެޓިކް ޕާޓީގެ މެނިފެސްޓޯގެ އަމާޒްތައް ސީދާގޮތުގައި ފާހަގަވާ ބިލުތަކެއް ނޫން ކަމަށެވެ. އަދި މިއަދު ހުށަހެޅިގެންދާ ބިލުތަކަކީ 1980ގެ އަހަރުތަކުއްސުރެ އެކި ވުޒާރާތަކުގައި އެކި ގޮތްގޮތަށް ހުރި ބިލުތަކެއް ކަމަށެވެ.
ނަޝީދު ވިދާޅުވީ އެކަމާ ގުޅިގެން މިއަދުގެ ބައެއް ޒުވާނުންނާއި ރައްޔިތުން އަދި ކުދިން ކަންބޮޑުވުން ފާޅުކުރާނެ ކަމަށެވެ. އަދި އެކަންބޮޑުވުން ބަލައިގަންނަކަމަށެވެ. ރައީސް ނަޝީދު ވިދާޅުވީ، އެ ބިލުތަކަކީ އަންޒަމާނު ކަރަޔަށް ވައި އެރިއިރުގެ ތަކެތިކަން ހުރިހާ ރައްޔިތުންނަށް ސާފުކޮށްދޭން ބޭނުންވާ ކަމަށެވެ.
