ދުނިޔޭގެ އެކި ހިސާބުތަކުގައި ހަލުވިކަމާއެކު ފެތުރެމުންދާ އެންކޯވް-19 ނުވަތަ ނޮވެލްކޮރޯނާ ވައިރަސްއަށް ވެކްސިންއެއް އުފައްދަން އަހަރެއް ނުވަތަ ދޮޅު އަހަރު ނަގާފާނެކަމަށް ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯއިން ބުނެފިއެވެ.
ޑަބްލިއުއެޗްއޯގެ ޑިރެކްޓަރ ޖެނެރަލް ޓެޑްރޮސް އަދަނޮމް ވިދާޅުވީ ކޮރޯނާވައިރަސްއަށް ވެކްސިންއެއް އުފައްދަން 12 މަސް ނުވަތަ 18 މަސް ދުވަސް ނަގާފާނެ ކަމަށެވެ. އޭނާ ވިދާޅުވީ ވެކްސިން ތައްޔާރުކުރަމުންދަނީ އެންމެ ނާޒުކު ދަނޑިވަޅަށް ކަމަށާއި، މިވަގުތަށް ދެން އެންމެ މުހިންމީ ބަލީގައި މަރުވާ މީހުންގެ އަދަދު ދަށްކުރުން ކަމަށެވެ.
ކޮރޯނާވައިރަސްގައި މިހާތަނަށް 2000 އަށްވުރެ ގިނަ މީހުން މަރުވެފައިވާ އިރު، ބަލި ޖެހުނު މީހުންގެ އަދަދު 75000 އަށްވުރެ މައްޗަށް ވަނީ އަރާފައެވެ.
ޑަބްލިއުއެޗްއޯގެ "އިންފެކްޝަސް ހަޒާޑްސް މެނޭޖްމަންޓް ޑިޕަޓްމަންޓުގެ ޑިރެކްޓަރު ޑރ. ސިލްވީ ބްރިއަންޑް ވިދާޅުވީ 16 ހަފްތާއެއްހާ ދުވަސްތެރޭގައި ކޮރޯނާ ވެކްސިންއަށް ކެންޑިޑޭޓެއް ކަނޑައެޅިގެންދާނެ ކަމަށާއި، ނަމަވެސް ވެކްސިން ޑިވަލަޕްކުރަން މަސްތަކެއް ހޭދަވާނެ ކަމަށާއި، އިންސާނުންނަށް އޭގެން އަސަރުކުރޭތޯ އަޖުމަބެލުމަށް ވެސް ދުވަސްތަކެއް ހޭދަވާނެ ކަމަށެވެ.
