ކޮރޯނާވައިރަސް ޖެހިގެން މަރުވި މީހުންގެ އަދަދު 2005 އަށް
19 ފެބުރުއަރީ 2020 | ބުދަ 03:42ޗައިނާގެ ހުބޭ ޕްރޮވިންސްއިން އެކަނިވެސް އަންގާރަ ދުވަހު ވަނީ 132 މީހަކު މަރުވެފައި
ކޮރޯނާ ވައިރަސް ޖެހިގެން މަރުވި މީހެއްގެ ހަށިގަނޑު ގެންދަނީ
ދުނިޔޭގެ އެކި ހިސާބުތަކުގައި އެންކޯވް-19 ނުވަތަ ނޮވެލް ކޮރޯނާވައިރަސް ޖެހިގެން މަރުވި މީހުންގެ އަދަދު 2000 އަށްވުރެން އިތުރުވެއްޖެއެވެ.
އަންގާރަ ދުވަހު އާންމުކުރި ކޮރޯނާގެ އެންމެ ފަހުގެ ތަފްސީލުތަކަށް ބަލާއިރު ދުނިޔޭގެ އެކި ކަންކޮޅުތަކުގައި ކޮރޯނާ ވައިރަސް ޖެހިގެން 2000 އަށްވުރެ ގިނަ މީހުން މަރުވެފައިވާ އިރު، މި ވައިރަސް ފެތުރިގެން އައި ޗައިނާގެ ހުބޭ ޕްރޮވިންސްއިން އެކަނިވެސް އަންގާރަ ދުވަހު ވަނީ 132 މީހަކު މަރުވެފައެވެ.
ހުބޭ ޕްރޮވިންސުން އެންމެ ފަހުން ނެރުނު ތަފާސް ހިސާބުތަކަށް ބަލާއިރު، އެ ޕްރޮވިންސްއިން 2000 މީހަކު ވަނީ މަރުވެފައެވެ. އެހެނިހެން ގައުމުތަކުގައި މި ބަލީގައި މަރުވި މީހުންގެ އަދަދު މިހާރު ވަނީ 5 އަށް އަރާފައެވެ. މީގެ ތެރޭގައި ހިމެނެނީ ހޮންގކޮންގ، ތައިވާން، ޖަޕާން، ފިލިޕީންސް އަދި ފުރާންސެވެ.
ބަލީގައި 2005 މީހަކު ޖުމްލަ މަރުވެފައިވާ އިރު، ކޮރޯނާވައިރަސް ޖެހުނު މީހުންގެ އަދަދު ވަނީ 75،121 އަށް އަރާފައެވެ. މީގެ ތެރެއިން އެންމެ ގިނަ ކޭސް ފެނިފައިވަނީ އަދިވެސް ޗައިނާއިންނެވެ.
ޗައިނާގެ ނެޝަނަލް ހެލްތް ކޮމިޝަނުން ވަނި ކުރު މުއްދަތެއްގެ ތެރޭގައި އެކި ޕްރޮވިންސްތަކުން މަރުވި މީހުންގެ ހިސާބުތައް އާންމުކުރުމަށް ނިންމާފައެވެ.
