ސުޕްރީމް ކޯޓުގެ ޝަރީއަތުގެ އަޑުއެހުންތަކުގެ އޯޑިއޯ ރެކޯޑިންގ އާންމުކުރަން ފަށައިފި
18 ފެބުރުއަރީ 2020 | އަންގާރަ 17:54ސުޕްރީމް ކޯޓުގެ ޝަރީއަތްތަކުގެ އޯޑިއޯ އާންމު ކުރުމަކީ ރަނގަޅު ފެށުމެއް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަދި އުއްތަމަ ފަނޑިޔާރު އަހުމަދު މުއުތަސިމް އަދުނާން އަދި ސުޕްރީމް ކޯޓުގެ ފަނޑިޔާރު ހުސްނުއްސުއޫދު
ސުޕްރީމް ކޯޓުގައި ހިންގޭ ޝަރީޢަތްތަކުގެ އޯޑިއޯ ރެކޯޑިންގ ސުޕްރީމް ކޯޓުގެ ވެބްސައިޓްގައި ޝާއިޢުކުރަން ފައްޓަވައިފިއެވެ.
ސުޕްރީމް ކޯޓުގެ ޝަރީއަތްތަކުގެ ރެކޯޑިން އާންމު ކުރަން ފަށާފައިވާކަން އިއުލާން ކުރެއްވީ ޖުޑީޝަލް އަހަރު ފެށުމަށް އަންގާރަ ދުވަހުގެ ރޭ ބޭއްވި ރަސްމިއްޔާތުގައި އުއްތަމަ ފަނޑިޔާރު އަހުމަދު މުއުތަސިމް އަދުނާނެވެ. މިއީ ދިވެހި ރާއްޖޭގައި ޝަރީއަތްތަކުގެ އޯޑިއޯ ރެކޯޑިން އާންމުކުރަން ފެށި ފުރަތަމަ ފަހަރެވެ.
ސުޕްރީމް ކޯޓުގައި މިއަހަރު ބާއްވާފައިވާ ޝަރީއަތްތުގެ އޯޑިއޯ ރެކޯޑިންގތައް މިހާރު ވަނީ އެ ކޯޓުގެ ވެބްސައިޓްގައި ޝާއިޢު ކޮށްފައެވެ.
އުއްތަމަ ފަނޑިޔާރު އަހުމަދު މުއުތަސިމް އަދުނާން ވިދާޅުވީ، ސުޕްރީމް ކޯޓުގެ ޝަރީއަތުގެ އަޑުއެހުންތަކުގެ ވީޑިއޯ ލައިވްކޮށް ބެލޭނެ އިންތިޒާމު ވެސް ބަޖެޓް ހަމަޖެހުނުހާ އަވަހަކަށް ހަމަޖެހިގެންދާނެ ކަމަށެވެ. މީގެއިތުރުން ޝަރީއަތުގެ އަޑުއެހުންތަކަށް ވަދެނިކުތުމުގެ އުސޫލުތައް ވެސް ފަސޭހަވެގެންދާނެ ކަމަށްވެސް އެމަނިކުފާނު ވިދާޅުވި އެވެ.
ސުޕްރީމް ކޯޓުގައި ކުރިން ތިއްބެވި ފަނޑިޔާރުންގެ ސުލޫކީ މައްސަލަތަކެއް ފެންމަތިވެ، އެ ފަނޑިޔާރުންގެ ބެންޗު އެއްކޮށް ވަނީ ވަކިކޮށްފަ އެވެ. ސުޕްރީމް ކޯޓުގެ ފަނޑިޔާރުންގެ ބެންޗުގައި މިހާރު ތިއްބެވި ފަނޑިޔާރުންގެ ބެންޗުން ފުރަތަމަ ޝަރީއަތްތައް ފެށީވެސް މިއަހަރުގެ ޖެނުއަރީ މަހުން ފެށިގެން ނެވެ.
ރާއްޖޭގައި ފުރަތަމަ ފަހަރަށް ޝަރީއަތެއް ޓީވީން ލައިވް ބްރޯޑްކާސްޓްކުރީ ކްރިިމިނަލް ކޯޓުގައި، ކުރީގެ ރައީސް އަބްދުﷲ ޔާމީންގެ މައްޗަށް ދައުލަތުން ދައުވާކުރި މަނީ ލޯންޑްރިންގ މައްސަލައިގެ ޝަރީއަތުގެ އަޑުއެހުންތަކެވެ. ނަމަވެސް އޭގެ ފަހުން އެހެން އެއްވެސް ޝަރީއަތެއް ޓީވީން ލައިވް ބްރޯޑްކާސްޓް ކޮށްފައެއް ނުވެއެވެ.
ނަމަވެސް ޓީވީން ލައިވް ބްރޯޑްކާސްކުރުމަށް މުހިއްމު ބައެއް ޝަރީއަތްތަކުގެ ދައުލަތުގެ ފަރާތުންނާއި ދިފާއީ ވަކީލުން ވެސް އެދިފައި އެވެ. އެގޮތުން ދައުލަތުގެ އެންމެ ބޮޑު ހިޔާނާތް ކަމަށްވާ އެމްއެމްޕީއާރުސީގެ ހިޔާނާތާއި ގުޅިގެން ކުރީގެ ނާއިބު ރައީސް އަހުމަދު އަދީބުގެ މައްޗަށް އުފުލާފައިވާ ދައުވާތަކުގެ ޝަރީއަތުގެ އަޑުއެހުންތައް ޓީވީން ލައިވް ކުރުމަށް ދައުލަތުގެ ފަރާތުންނާއި އަދީބުގެ ފަރާތުން ވެސް ވަނީ ކްރިމިނަލް ކޯޓުގައި އެދިފަ އެވެ. ނަމަވެސް އެމައްސަލަތައް އަދި އޮތީ ކޯޓުގައި މަޑުޖެހިފަ އެވެ.
ޖުޑީޝަރީ އިސްލާހު ކުރުމަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރިޔާސީ ވައުދުފުޅެކެވެ. އަދި މިހާރު ހިނގަމުންދާ 19 ވަނަ ރައްޔިތުންގެ މަޖިލީގެ ސުޕަރ މެޖޯރިޓީ ލިބިފައިވާ ސަރުކާރު ހިންގާ މައި ޕާޓީ، އެމްޑީޕީގެ "އެޖެންޑާ 19"ގައި ވެސް، ޖުޑީޝަރީ އިސްލާހު ކުރުމަކީ އެޕާޓީގެ ވެސް ވައުދެކެވެ.
އެގޮތުން ޖުޑީޝަލް ސަރވިސް ކޮމިޝަން (ޖޭއެސްސީ)ގެ ގާނޫނަށް ބޮޑެތި ބަދަލުތަކެއް ގެނެސް، ފުނި ޖެހިފައިއޮތް ފަނޑިޔާރުންގެ ސުލޫކީ މައްސަލަތައް ބެލުމާއި، އަދުލް އިންސާފު ގާއިމު ކުރުމަށް ކޯޓުތަކަށް ދިމާވެފައިވާ ގޮންޖެހުންތައް ހައްލު ކުރުމަށްވެސް ސަރުކާރާއި ރައްޔިތުންގެ މަޖިލީހާއި ޖޭއެސްސީން ދަނީ މަސައްކަތް ކުރަމުންނެވެ.
