ކޮރަޕްޝަނާއި ނުފޫޒުގެ ސަބަބުން ފަނޑިޔާރުންގެ ނިޔާތައް އަނިޔާއަކަށް ވެގެން ހިނގައިދާނެ: ރައީސް
އިދާރީ ހިންގުން ބަދަލުވަމުން އަންނަކަމީ، ރައްޔިތުންނަށް ލިބޭ ވަރަށް ބޮޑު ހިތްހަމަޖެހުމަކަށް ވާނެ ކަމެއް: ރައީސް
ރައީސް ސޯލިހު އާއި އުއްތަމަ ފަނޑިޔާރު މުއްތަސިމް އަދުނާން
ކޮރަޕްޝަނާއި ފައިސާގެ ދަހިވެތިކަމާއި، އަމިއްލަ މަސްލަހަތުތަކާއި ތަފާތު ނުފޫޒު ފަދަ ކޮންމެ ކަމަކީވެސް، ފަނޑިޔާރުން އިއްވާ ނިޔާތައް، އަނިޔާއަކަށް ވެގެން ހިނގައިދާނެ ކަންތައްތައް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެެވެ.
ޤަޟާއީ އަހަރު 2020"ގެ އިފްތިތާހީ ޖަލްސާ އިފްތިތާހު ކޮށްދެއްވައި ވާހަކަފުޅު ދައްކަވަމުން ރައީސް ވިދާޅުވީ، ސަރުކާރުން ވައުދުވީ ރައްޔިތުންގެ ހައްގުތައް ހިމާޔަތްކޮށް ރައްކާތެރި ކޮށްދިނުމަށް މަސައްކަތްކުރާ، ފަނޑިޔާރުގެއެއް ޤާއިމުކޮށްދިނުން ކަމަށެވެ. ސަރުކާރު ކުރިއަށްދަނީ އެ ވައުދުގެ މަތީގައި ކަމަށް ވިދާޅުވިއެވެ.
ފަނޑިޔާރުގެ އިސްލާހު ކުރުމަށް، މިދިޔަ އަހަރެއްހާ ދުވަހުގެ ތެރޭގައި ވަރަށް ގިނަ މަސައްކަތްތަކެއް ކުރެވިފައިވާކަން ފާހަގަކުރައްވަމުން ރައީސް ވިދާޅުވީ، އަދިވެސް ކުރަން ހުރި ވަރަށް ގިނަ ކަންކަން އެބަހުރި ކަމަށެވެ.
މުޅި ޝަރުޢީ ނިޒާމަށް ބަލާއިރު،ކޯޓުތަކުން ޚިދުމަތްތައް ހޯދުމުގައި ރައްޔިތުންނަށް ފަސޭހަވާނެ ގޮތްތަކަށް އިދާރީ ހިންގުން ބަދަލުވަމުން އަންނަކަމީ، ރައްޔިތުންނަށް ލިބޭ ވަރަށް ބޮޑު ހިތްހަމަޖެހުމަކަށް ވާނެ ކަމެއް ކަމަށް ރައީސް ސޯލިހު ވިދާޅުވިއެވެ.
އެމަނިކުފާނު ވިދާޅުވީ، މިހާރު ފެތުރިފައިވާ އިޖްތިމާޢީ ވަރަށް ގިނަ މައްސަލަތަކަށްވެސް، އެކަށީގެންވާ ޙައްލެއް ހޯދުމުގައި އެންމެ މުހިންމު ދައުރެއް އަދާކުރެވޭނީ ފަނޑިޔާރުގެއިން ކަމަށެވެ.
އެއީ ކުޑަކުދިންނަށް ގޯނާކުރުމާއި އިހުމާލުވުމުގެ މައްސަލަތަކާއި، މާރާމާރީއާއި ގޭންގުކުށްތަކާއި މަސްތުވާތަކެތީގެ މައްސަލަތައް ކަމަށް ވިޔަސް، އެފަދަ ކޮންމެ މައްސަލައެއް ހައްލުކުރުމުގައި، ކޯޓުތަކުގެ ދައުރު ވަރަށް ބޮޑުކަމަށް ވިދާޅުވިއެވެ.
ރައީސް ވިދާޅުވި ގޮތުގައި، އޭގެ ތެރެއިންވެސް އެންމެ މުހިންމު ކަމަކީ، އަދުލު އިންސާފު އޭގެ ވަގުތުގައި ގާއިމުކުރުމެވެ.
ހަމައެކަނި ކޯޓުތަކުގެ އިދާރީ ހިންގުން ބަދަލުކޮށް ޤާނޫނުތައް އިޞްލާޙްކުރުމުން ރައްޔިތުން ބޭނުންވާ ހަގީގީ ބަދަލު ނުފެންނާނެ ކަމަށް ގަބޫލުފުޅުކުރައްވާ ކަމަށް ރައީސް ވިދާޅުވިއެވެ. ރައްޔިތުން ބޭނުންވާ ބަދަލަކީ، އަދުލު އިންޞާފުގެ މަގުން ނިޔާތައް ކަނޑައެޅުން ކަމަށާއި، އެކަން ފަނޑިޔާރުގެއިން ފެންނަން ފަށާނީ ފަނޑިޔާރުން، އެ ބޭފުޅުންގެ އަމިއްލަ ނަފްސުން ފެށިގެން، އިސްލާހީ ބަދަލުތަކަށް ފުރުޞަތު ދެއްވައިގެން ކަމަށް ރައީސް ސޯލިހު ފަނޑިޔާރުންނަށް އިލްތިމާސް ކުރެއްވިއެވެ.
ފަނޑިޔާރުންގެ ނަޒާހަތްތެރިކަމަށް ހުރަސްއަޅާ ފަދަ ކަންކަމަށް، ފާޅުގައި ނޫނެކޭ ބުނުމުގެ ހިތްވަރު، ފަނޑިޔާރުންގެ ކިބައިގައި އަށަގަނެގެން ނޫނީ، އަދުލު އިންސާފު ގާއިމެއް ނުކުރެވޭނެ ކަމަށް ރާއްޖޭގެ ގިނަ ފަނޑިޔާރުން ތަކެއް ބައިވެރިވެ ވަޑައިގެންނެވި ހަފްލާގައި ރައީސް ވިދާޅުވިއެވެ. އެކަން ނުކުރެވޭހާ ހިނދަކު، ރައްޔިތުންގެ ހައްގުތައް ވެސް ރައްކާތެރިއެއް ނުކުރެވޭނެ ކަމަށާއި، އަދި އިޖްތިމާޢީ ހަމަޖެހުމާއި އަމާންކަމެއް ވެސް ގާއިމެއް ނުކުރެވޭނެ އެމަނިކުފާނު ފާހަގަކުރެއްވިއެވެ.
