ގަބޫލުކުރަނީ ތިމަރަފުށި މަގުތަކުގެ އަމަލީ މަސައްކަތް ފެށިއްޖެ ކަމަށް: އަސްލަމް
ތިމަރަފުށި މަގުހެދުމުގެ މަސައްކަތް 31 ޑިސެމްބަރު 2019 ގައި އާރުޑީސީ އާއިވަނީ ހަވާލުކުރެވިފަ
މިނިސްޓަރ އޮފް ނެޝަނަލް ޕްލޭނިންގ އެންޑް އިންފްރާސްޓަކްޗަރ މުޙައްމަދު އަސްލަމް
މިހާރު ތިމަރަފުށީގެ މަގުތަކުގެ އަމަލީ މަސައްކަތް ފެށިފައިވާ ކަމަށް ޤަބޫލުކުރައްވާ ކަމަށް މިނިސްޓަރ އޮފް ނެޝަނަލް ޕްލޭނިންގ އެންޑް އިންފްރާސްޓަކްޗަރ މުޙައްމަދު އަސްލަމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ތިމަރަފުށި ދާއިރާގެ މެންބަރު ޢަބްދުﷲ ރިޔާޒް ތިމަރަފުށީ މަގު ހެދުމަށް 2019 ވަނަ އަހަރު ބަޖެޓުކުރެވިފައި ވީނަމަވެސް މިއަދާ ހަމައަށް ޢަމަލީ މަސައްކަތް ފެށިފައިނުވާތީ، އެރަށުގެ މަގު ހެދުމުގެ ޢަމަލީ މަސައްކަތް ފެށޭނެ ތާރީޚަކާއި ގުޅިގެން ކުރެއްވި ސުވާލަށް ޖަވާބުދެއްވަމުންނެވެ.
އަންގާރަ ދުވަހުގެ ޖަލްސާގައި ވާހަކަދައްކަވަމުން އަސްލަމް ވިދާޅުވީ ތިމަރަފުށި މަގުހެދުމުގެ މަސައްކަތް 31 ޑިސެމްބަރު 2019 ގައި ޑިޒައިން އެންޑް ބިލްޑް އުސޫލުން މަސައްކަތް ކުރުމަށް ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) އާއި ހަވާލުކުރެވިފައިވާކަމަށެވެ. އަސްލަމް ވިދާޅުވީ 2019 ވަނަ އަހަރާއި 2020 ވަނަ އަހަރުގެ ބަޖެޓުގައި އެ މަޝްރޫޢަށް ޖުމުލަކޮށް 75.7 މިލިއަން ރުފިޔާ ކަނޑައަޅާފައިވާކަމަށެވެ. މިނިސްޓަރ ވިދާޅުވީ މަސައްކަތުގެ ތާވަލަށް ބަލާއިރު އާރުޑީސީން މި މަސް ނިމެންވާއިރަށް ޑިޒައިން ކުރުމަށް ބޭނުންވާ ސަރވޭތައް ކޮށް ނިންމާނެ ކަމަށާއި އަދި މަސައްކަތް ކުރަމުންދަނީ އީއައިއޭގެ މަސައްކަތް ފެށުމަށް ކަމަށެވެ.
ސުވާލާއި ގުޅިގެން އިތުރަށް އަސްލަމް ވިދާޅުވީ ދިވެހި ރާއްޖޭގައި އެކި ތަންތަނުގައި އެކި ފެންވަރަށް މަގުތައް ހެދެމުންދާ ކަމަށެވެ. އެގޮތުން ބޭނުންވާ ވަރަށް ވުރެ ބޮޑަށް ޑިޒައިންގެ މަސައްކަތް ބައެއް ފަހަރު ކުރެވޭ ކަމަށާއި، އަދި މަގުތައް ވެސް އެގޮތަށް ހެދިފައި އެބަހުރި ކަމަށެވެ. އަސްލަމް ވިދާޅުވީ އެއީ ދައުލަތަށް އެންމެ ފައިދާވާގޮތަށް ގޮތް ކަމަށް ދެކިވަޑައިނުގަންނަވާކަމަށެވެ. އެހެންކަމުން މަގުތަކަށް ކުރެވޭ ޑިޒައިން ތަކަކީ އެއީ އެތަނަކަށް އެންމެ ބޭނުންވާ ގޮތަށް ކުރެވޭ ޑިޒައިނެއްތޯ ޔަގީން ކުރުމަށް ކަމާބެހޭ ފަރާތްތަކާއި މަޝްވަރާ ކުރަމުންދާނެ ކަމަށެވެ.
މީގެއިތުރުން ތިމަރަފުށީގެ މަގުތައް ހަވާލު ކުރެވުނު މަސައްކަތުގައި ސްޓޯމް ވޯޓަރ ޑްރެއިނޭޖް ސިސްޓަމް އެއް ގާއިމު ކުރެވޭނެތޯއާއި އެ މަސައްކަތް ހަވާލުކުރެވުނު ރޯޑް ޑިވެލޮޕްމެންޓް ކޯޕަރޭޝަން ގައި އެ މަސައްކަތް ކުރުމުގެ ގާބިލުކަން އެބަހުރިތޯ މެންބަރު ކުރެއްވި ސުވާލަށް ޖަވާބުދެއްވަމުން މިނިސްޓަރ ވިދާޅުވީ ކުރިން ރާއްޖޭގައި މަގު ހެދުމުގެ މަސައްކަތް ކުރާ ހަމައެކަނި ދިވެހި ކުންފުންޏަކީ އެމްޓީސީސީކަމަށެވެ. ދެން ހުރީ ހުސް ބޭރު ކުންފުނިތަކެއްކަން ފާހަގަކުރައްވާ މިނިސްޓަރ ވިދާޅުވީ މަގުހެދުމުގެ މަސައްކަތް ކުރެވޭނެ ކުންފުންޏެއް ރާއްޖޭގައި ބިނާ ކުރަންޖެހޭ ކަމަށެވެ. އަސްލަމް ވިދާޅުވީ އާރުޑީސީ އުފެއްދުމުގެ މަޤްޞަދަކީ އެއީ ކަމަށެވެ. އަދި އާރުޑީސީ އަށް ރާއްޖޭގެ މަގުތައް ރަނގަޅު ފެންވަރެއްގައި ހެދުމުގެ ޤާބިލުކަން ހުރިކަމަށެވެ.
