އަންގާރަ ދުވަހުގެ މަޖިލީހުގެ ޖަލްސާއަށް ޕްލޭނިންގް މިނިސްޓަރ ހާޒިރުކުރަނީ
17 ފެބުރުއަރީ 2020 | ހޯމަ 18:41މިނިސްޓަރާއި ސުވާލު ކުރުމަށް ހުށަހަޅާފައިވަނީ ތިމަރަފުށި ދާއިރާގެ މެންބަރު ޢަބްދުﷲ ރިޔާޟް
މިނިސްޓަރ އޮފް ނެޝަނަލް ޕްލޭނިންގ އެންޑް އިންފްރާސްޓަކްޗަރ މުޙައްމަދު އަސްލަމް
އަންގާރަ ދުވަހު މިނިސްޓަރ އޮފް ނެޝަނަލް ޕްލޭނިންގ އެންޑް އިންފްރާސްޓަކްޗަރ މުޙައްމަދު އަސްލަމްއާއި ސުވާލު ކުރުމަށް ރައްޔިތުންގެ މަޖިލީހަށް ހާޒިރުކުރުމަށް އެޖެންޑާ ކޮށްފިއެވެ.
މިނިސްޓަރާއި ސުވާލު ކުރުމަށް ހުށަހަޅާފައިވަނީ ތިމަރަފުށި ދާއިރާގެ މެންބަރު ޢަބްދުﷲ ރިޔާޒްއެވެ. އެގޮތުން މިނިސްޓަރާއި ސުވާލު ކުރެވެނީ ތިމަރަފުށީ މަގު ހެދުމަށް 2019 ވަނަ އަހަރު ބަޖެޓުކުރެވިފައި ވީނަމަވެސް މިއަދާ ހަމައަށް ޢަމަލީ މަސައްކަތް ފެށިފައިނުވާތީ، ތިމަރަފުށީ މަގު ހެދުމުގެ ޢަމަލީ މަސައްކަތް ފެށޭނެ ތާރީޚަކާއި ގުޅިގެންނެވެ.
އޭގެއިތުރުން، ތ. ވޭމަންޑޫ އަދި ކިނބިދޫ ކޯޒްވޭ އަކުން ގުޅާލުމަށް 2019 ވަނަ އަހަރުގެ ބަޖެޓުގައި ހިމެނިފައިވާއިރު މި ޕްރޮޖެކްޓުގެ ޢަމަލީ މަސައްކަތް ފެށޭނެ ތާރީޚަކާއި ގުޅިގެންވެސް މެމްބަރު ސުވާލު ކުރައްވާނެއެވެ.
މީގެއިތުރުން އަންގާރަ ދުވަހުގެ ޖަލްސާއަށް ވަނީ ރައްޔިތުންގެ މަޖިލީހުގެ އިންތިޚާބީ ދާއިރާތައް ކަނޑައެޅުމާ ބެހޭ ޤާނޫނަށް އިޞްލާޙު ގެނައުމުގެ ބިލު، މިނިވަން މުއައްސަސާތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓު ކޮމިޓީތަކުން ހުށަހަޅާ ކަންކަމުގެ ތެރޭގައި އެޖެންޑާ ކޮށްފައެވެ.
"ރިވައިޒްޑް ކިޔޯޓޯ ކޮންވެންޝަން" ގައި ދިވެހިރާއްޖެއިން ބައިވެރިވުމާމެދު ރައްޔިތުންގެ މަޖިލީހުގެ ރުހުން ހޯދުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލަ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓުވެސް އޭގެ ދަށުން ހުށަހެޅުމަށް އެޖެންޑާ ކޮށްފައިވެއެވެ.
